Ahadith

حضرت یعلی بن مرہؓ اپنے والد سے روایت کرتے ہیں انہوں نے کہا کہ میں نبی ﷺ کے ساتھ ایک سفر میں تھا۔ آپؐ نے قضائے حاجت کا ارادہ کیا اور مجھے کہا کہ اُن دو کھجور کے درختوں کے پاس جاؤ - وکیع نے کہا کہ یعنی دو کھجور کے چھوٹے درخت - اور ان دونوں کو کہو کہ رسول اللہ ﷺ حکم دیتے ہیں کہ تم دونوں ایک جگہ اکٹھے ہو جاؤ۔ پس وہ ایک جگہ اکٹھے ہو گئے، آپؐ نے ان کے ذریعہ اپنے آپ کو چھپایا اور قضائے حاجت کی۔ پھر مجھے فرمایا ان دونوں کے پاس جاؤ اور ان دونوں سے کہو کہ تم میں سے ہر ایک اپنی جگہ پر لوٹ جائے۔ میں نے ان دونوں کو کہا پس وہ دونوں لوٹ گئے۔

حضرت عبد اللہ بن جعفرؓ سے روایت ہے کہ نبی ﷺ کو قضائے حاجت کے وقت پردے کے لئے اونچی جگہ یا کھجوروں کے گھنے جھنڈ سب سے زیادہ پسند تھے۔

حضرت ابن عباسؓ نے بیان کیا کہ رسول اللہ ﷺ رستہ چھوڑ کر ایک گھاٹی کی طرف مُڑ گئے اور پیشاب کیا اور آپ کے دونوں پاؤں کو کشادہ کرنے کی وجہ سے جب آپؐ نے پیشاب کیا مجھے آپؐ کے لئے فکر ہونے لگا۔

حضرت ابو سعید خدریؓ سے روایت ہے کہ رسول اللہ ﷺ نے فرمایا دو افراد آپس میں قضائے حاجت کے وقت باتیں نہ کریں کہ اُن دونوں میں سے ہر ایک اپنے ساتھی کو بغیر لباس کے دیکھ رہا ہو۔ اس بات کو اللہ عزّ وجل سخت ناپسند فرماتا ہے۔

حضرت جابر بن عبد اللہ ؓ سے روایت ہے کہ رسول اللہ ﷺ نے منع فرمایا کہ ٹھہرے ہوئے پانی میں پیشاب کیا جائے۔

حضرت ابو ہریرہ ؓ نے بیان کیا کہ رسول اللہ ﷺ نے فرمایا تم میں سے کوئی ٹھہرے ہوئے پانی میں ہر گز پیشاب نہ کرے۔

حضرت ابن عمرؓ سے روایت ہے کہ رسول اللہ ﷺ نے فرمایا تم میں سے کوئی بھی پینے کے پانی میں ہرگز پیشاب نہ کرے۔

حضرت عبد الرحمن بن حسنہ ؓ نے بیان کیا کہ رسول اللہ ﷺ ہمارے پاس باہر تشریف لائے اور آپؐ کے ہاتھ میں ایک چمڑے کی ڈھال تھی، آپؐ نے اسے رکھ دیا۔ (اور پھر اُس کی اوٹ میں ) بیٹھ کر پیشاب کیا۔ کسی نے کہا کہ آپؐ کو دیکھو، پیشاب کرتے ہیں جیسے عورت پیشاب کرتی ہے۔ اس بات کو نبی ﷺ نے سن لیا اور فرمایا تجھ پر افسوس، کیا تمہیں معلوم نہیں جو بنی اسرائیل میں ایک شخص کو تکلیف پہنچی تھی۔ جب اُن (کے کپڑے) کو پیشاب لگ جاتا تو اُسے قینچیوں سے کتر دیتے تھے۔ اس شخص نے اُن کو اس سے منع کردیا۔ پس اس کو قبر میں عذاب دیا گیا۔