Ahadith

حضرت ابو بردہؓ اپنے والدؓ سے روایت کرتے ہیں وہ کہتے ہیں رسول اللہﷺ نے مجھے اور حضرت معاذ ؓ کو یمن بھیجا اور فرمایا تم دونوں لوگوں کو دعوت دو اور خوشخبری دو اور نفور نہ پیدا کرو اور آسانی پیدا کرو اور مشکل نہ پیدا کرو۔ راوی کہتے ہیں میں نے عرض کیا یا رسولؐ اللہ! ہمیں ان دو مشروبات کے بارہ میں فتویٰ دیں جو ہم یمن میں بناتے ہیں اَلْبِتْع جو شہد سے بنایا جاتا ہے (اس سے) نبیذ بنایا جاتا ہے یہاں تک کہ اس میں تیزی آجاتی ہے اور المزر مکئی اور جَو سے بنایا جاتا ہے اور (اس سے) نبیذ بنایا جاتا ہے یہاں تک کہ اس میں تیزی آجاتی ہے۔ راوی کہتے ہیں رسول اللہﷺ کو جوامع الکلم انتہائی کمالات کے ساتھ عطا فرمائے گئے تھے۔ آپؐ نے فرمایا میں ہر نشہ کرنے والی چیز سے منع کرتا ہوں وہ مدہوش کر کے نماز سے (روک دیتی ہے۔)

حضرت جابرؓ سے روایت ہے کہ ایک شخص جیشان سے آیا اور جیشان یمن میں ہے۔ اس نے نبیﷺ سے ایک مشروب کے متعلق پوچھا جو ان کے علاقہ میں لوگ پیتے ہیں جو مکئی سے بنائی جاتی ہے اسے مزر کہا جاتا ہے۔ نبیﷺ نے فرمایا کیا وہ نشہ دینے والی ہے؟ اس نے کہا جی ہاں۔ رسول اللہﷺ نے فرمایا ہر نشہ آور چیز حرام ہے۔ اللہ عزوجل نے عہد کیا ہے کہ جو نشہ آور چیز پیئے گا کہ وہ اسے طینۃ الخبال پلائے گا۔ لوگوں نے کہا یا رسولؐ اللہ! طینۃ الخبال کیا ہے؟ آپؐ نے فرمایا دوزخیوں کا پسینہ ہے یا دوزخیوں کا نچوڑ ہے۔

حضرت ابن عمرؓ سے روایت ہے وہ کہتے ہیں رسول اللہ ﷺ نے فرمایا ہر نشہ آور چیز خمر ہے اور ہر نشہ آور چیز حرام ہے اور جس نے دنیا میں خمر پی اور وہ اسی حال میں مر گیا کہ وہ ہمیشہ پیتا تھا اور اس نے توبہ نہ کی وہ اسے آخرت میں نہ پیئے گا۔

حضرت ابن عمرؓ سے روایت ہے وہ کہتے ہیں رسول اللہ ﷺ نے فرمایا ہر نشہ آور چیز خمر ہے اور ہر نشہ آور چیز حرام ہے۔

نافع حضرت ابن عمرؓ سے روایت کرتے ہوئے بیان کرتے ہیں اور مجھے یہی علم ہے کہ وہ (حضرت ابن عمر) نبیؐ سے یہ بیان کرتے ہیں آپؐ نے فرمایا ہر نشہ آور چیز خمر ہے اور ہر خمر حرام ہے۔

حضرت ابن عمرؓ سے روایت ہے کہ رسول اللہﷺ نے فرمایا جس نے دنیا میں شراب پی وہ اس سے آخرت میں محروم ہوگا۔

حضرت ابن عمرؓ سے روایت ہے وہ کہتے ہیں جس نے دنیا میں شراب پی اور اس سے توبہ نہ کی وہ آخرت میں اس سے محروم کیا گیا اور وہ اسے نہ پلائی جائے گی۔ مالک سے کہا گیا انہوں نے اسے مرفوع بیان کیا ہے اس نے کہا ہاں۔

حضرت ابن عمرؓ سے روایت ہے کہ رسول اللہ ﷺ نے فرمایا جو دنیا میں شراب پیئے گا وہ آخرت میں اسے نہیں پیئے گا سوائے اس کے کہ وہ توبہ کرے۔

حضرت ابن عباسؓ سے روایت ہے وہ کہتے ہیں رسول اللہﷺ کے لئے رات کے ابتدائی حصہ میں نبیذ بنائی جاتی تھی۔ جب صبح ہوتی تو آپؐ اسے نوش فرماتے۔ اس دن اور آنے والی رات اور اگلی صبح اور اگلی رات اور اگلا دن عصر تک۔ اگر اس میں سے کچھ بچ جاتا تو اسے خادم کو پلاتے یا اس کے بارہ میں ارشاد فرماتے تو اسے گرا دیا جاتا۔