Ahadith

حضرت ابو ہریرہ ؓ نے بیان کیا کہ رسول اللہ ﷺ کہا کرتے تھے اَللّٰہُمَّ انْفَعْنِيْ بِمَا عَلَّمْتَنِيْ وَعَلِّمْنِيْ مَا یَنْفَعُنِيْ وَزِدْنِيْ عِلْمًا وَالْحَمْدُ لِلّٰہِ عَلَی کُلِّ حَالٍ اے اللہ! مجھے اُس علم سے نفع عطا کر جو تو نے مجھے سکھایا ہے اور مجھے وہ علم سکھا جو مجھے نفع دے اور مجھے علم میں بڑھا اور ہر حال میں اللہ کے لئے حمد ہے۔

حضرت ابو ہریرہؓ نے بیان کیا کہ رسول اللہ ﷺ نے فرمایا جس نے وہ علم حاصل کیا جس سے اللہ کی رضا چاہی جاتی ہے مگر اُس نے اُسے نہیں سیکھا سوائے اس کے کہ اس کے ذریعہ کوئی دنیا کا سامان پائے وہ قیامت کے دن جنت کی خوشبو نہ پائے گا۔ عَرف کے معنے خوشبو کے ہیں۔

حضرت ابن عمرؓ سے روایت ہے کہ نبیﷺ نے فرمایا جس نے کم عقل لوگوں سے بحث کرنے یا علماء پر فخر کرنے یا لوگوں کو اپنی طرف متوجہ کرنے کے لئے علم حاصل کیا، وہ آگ میں ہے۔

حضرت جابر بن عبد اللہ ؓ سے روایت ہے کہ نبی ﷺ نے فرمایا علم اس غرض کے لئے حاصل نہ کرو کہ اس کے ذریعہ علماء پر فخر کرو اور نہ اس لئے کہ اس کے ذریعہ نادانوں سے بحث کرو اور نہ اس کے ذریعہ مجالس میں فضیلت چاہو۔ جس نے ایسا کیا تو آگ ہے آگ ہے۔

حضرت ابن عباسؓ سے روایت ہے کہ نبی ﷺ نے فرمایا میری امت کے کچھ لوگ دین میں تفقّہ حاصل کریں گے اور قرآن پڑھیں گے پھر کہیں گے کہ ہم حاکموں کے پاس جاتے ہیں اور ان کی دنیا میں سے کچھ حصہ پائیں گے اور اپنے دین میں ان سے الگ رہیں گے لیکن ایسا نہیں ہوسکے گا جیسے کیکر کے درخت سے سوائے کانٹوں کے کچھ نہیں چنا جاتا اسی طرح ان کے قرب سے کوئی (پھل) نہیں چنا جاتا سوائے _محمد بن صباح نے کہا_ گویا آپؐ کی مُراد خطاؤں سے تھی۔

حضرت ابو ہریرہؓ نے بیان کیا کہ رسول اللہ ﷺ نے فرمایا جُبُّ الحُزن سے اللہ کی پناہ مانگو۔ لوگوں نے عرض کیا کہ جُبُّ الحُزن کیا ہے؟ آپؐ نے فرمایا یہ جہنم میں ایک وادی ہے۔ جہنم اس سے ہر روز چار سو مرتبہ پناہ مانگتی ہے۔ انہوں نے عرض کیا یا رسولؐ اللہ! اس میں کون داخل ہوگا۔ رسول اللہ ﷺ نے فرمایا یہ ایسے قرآن پڑھنے والوں کے لئے تیار کی گئی ہے جو اپنے اعمال میں ریاکاری کرتے ہیں۔ اللہ کے نزدیک سب سے زیادہ ناپسندیدہ قرآن پڑھنے والے وہ ہیں جو حکام سے میل جول رکھتے ہیں۔ (راوی) محاربی کہتے ہیں کہ ظالم اُمراء مراد ہیں۔

حضرت عبد اللہ بن مسعودؓ کہتے ہیں کہ اگر اہل علم نے علم کی حفاظت کی ہوتی اور اس کو اُس کے اہل کے پاس رکھا ہوتا تو اس کے ذریعہ سے اپنے زمانے والوں پر سردار بن جاتے لیکن انہوں نے اس کو دنیا والوں کے لئے استعمال کیا تاکہ اُن کی دنیا سے کچھ حاصل کر لیں۔ پس وہ اُن کے سامنے ذلیل ہوگئے ، میں نے تمہارے نبی ﷺ کو یہ فرماتے ہوئے سنا ہے جس نے تمام غموں کا ایک غم بنا لیا ، یعنی آخرت کا غم ، تو اللہ اُس کی دنیا کے غموں کے لئے کافی ہو جاتا ہے اور جسے احوال دنیا کی فکروں نے پریشان کیا۔ اللہ اُس کی پرواہ نہیں کرتا کہ اس کی وادیوں میں سے کس (وادی) میں ہلاک ہو۔

حضرت عبد اللہ بن عمرؓ سے روایت ہے کہ نبی ﷺ نے فرمایا جس نے علم حاصل کیا غیر اللہ کے لئے یا فرمایا اس کے ذریعہ غیر اللہ کو چاہا، وہ اپنی جگہ جہنم میں بنا لے۔

حضرت حذیفہؓ نے بیان کیا کہ میں نے رسول اللہ ﷺ کو فرماتے ہوئے سنا اس لئے علم نہ سیکھو تاکہ اس کے ذریعہ علماء پر فخر کرو ، یا اس کے ذریعہ تم نادانوں سے بحث کرو ، یا لوگوں کو اپنی طرف متوجہ کرو۔ جس نے ایسا کیا وہ آگ میں ہے۔

حضرت ابو ہریرہؓ نے بیان کیا کہ جس نے علم سیکھا تاکہ علماء پر فخر کرے اور نادانوں سے بحث میں مقابلہ کرے، اور اس کے ذریعہ لوگوں کی توجہ اپنی طرف پھیرے، اللہ تعالیٰ اُسے جہنم میں داخل کرے گا۔