Ahadith

حضرت ابو ہریرہؓ سے روایت ہے کہ رسول اللہ ﷺ نے قضائے حاجت کی ، پھر برتن سے پانی لے کر صفائی کی پھر اپنے ہاتھ کو زمین پر رگڑا۔

ابراہیم بن جریر اپنے والد سے روایت کرتے ہیں کہ نبی ﷺ درختوں کے جھنڈ میں داخل ہوئے اور قضائے حاجت کی۔ حضرت جریرؓ آپؐ کے پاس پانی کی چھاگل لے کر آئے، آپؐ نے اس سے صفائی کی اور اپنے ہاتھ کو مٹی سے مَلا۔

حضرت جابرؓ نے بیان کیا کہ ہمیں نبی ﷺ نے ارشاد فرمایا کہ ہم اپنے مشکیزوں کے منہ باندھا کریں اور ہم اپنے برتنوں کو ڈھانک کر رکھیں۔

حضرت عائشہؓ نے بیان فرمایا کہ میں رسول اللہ ﷺ کے لئے رات کو تین برتن ڈھانک کر رکھا کرتی تھی ، ایک برتن آپؐ کے وضو کے لئے ، ایک برتن آپؐ کی مسواک کے لئے اور ایک برتن آپؐ کے پینے کے لئے۔

حضرت ابن عباسؓ نے بیان کیا کہ رسول اللہ ﷺ اپنے وضوء کا انتظام کسی کے سپرد نہ فرماتے تھے اور نہ ہی صدقہ میں جو آپؐ دیا کرتے تھے اور یہ کام آپؐ خود ہی کر لیا کرتے تھے۔

ابو رزین نے بیان کیا کہ میں نے حضرت ابو ہریرہؓ کو اپنے ماتھے پر ہاتھ مارتے دیکھا۔ وہ کہہ رہے تھے ، اے اہل عراق! تم سمجھتے ہو کہ میں رسول اللہ ﷺ پر جھوٹ باندھ رہا ہوں ، اس سے تمہیں آرام حاصل ہو اور مجھ پر گناہ ہو ، میں گواہی دیتا ہوں کہ میں نے رسول اللہ ﷺ کو فرماتے ہوئے سنا ہے کہ جب تم میں سے کسی کے برتن میں کتا منہ ڈال دے تو وہ اُسے (برتن کو) سات بار دھوئے۔

حضرت ابو ہریرہؓ سے روایت ہے کہ رسول اللہ ﷺ نے فرمایا جب تم میں سے کسی کے برتن میں سے کتا پی لے تو وہ اُسے سات بار دھوئے۔

حضرت عبد اللہ بن مغفلؓ سے روایت ہے کہ رسول اللہ ﷺ نے فرمایا جب برتن میں کتا منہ ڈالے ، تو اُسے سات بار دھو لو اور آٹھویں بار مٹی سے مانجو۔

حضرت ابن عمرؓ نے بیان کیا کہ رسول اللہ ﷺ نے فرمایا جب تم میں سے کسی کے برتن میں کتا منہ ڈال دے تو اُسے چاہئے کہ اسے سات بار دھوئے۔