Ahadith

یحيٰ بن صالح نے ہم سے بیان کیا کہ فلیح بن سلیمان نے ہمیں بتایا۔ سعید بن حارث نے ہم سے بیان کیا کہ انہوں نے حضرت ابن عمر رضی اللہ عنہما سے سنا۔ وہ کہتے تھے: کیا تمہیں نذر سے منع نہیں کیا گیا؟ نبی ﷺ نے فرمایا کہ نذر نہ کسی بات کو آگے کرتی ہے اور نہ پیچھے کرتی ہے بلکہ صرف یہ ہوتا ہے کہ نذر کے ذریعہ بخیل سے کچھ نکال لیا جاتا ہے۔

خلاد بن یحيٰ نے ہم سے بیان کیا کہ سفیان (ثوری) نے ہمیں بتایا۔ انہوں نے منصور سے روایت کی کہ عبداللہ بن مرہ نے ہمیں خبر دی۔ انہوں نے حضرت عبداللہ بن عمرؓ سے روایت کی۔ انہوں نے کہا کہ نبی ﷺ نے نذر سے منع کیا اور فرمایا کہ وہ کسی بات کو نہیں ٹالتی بلکہ اس کے ذریعہ بخیل سے کچھ نکالا جاتا ہے۔

ابوالیمان نے ہم سے بیان کیا کہ شعیب نے ہمیں خبر دی۔ ابوالزناد نے ہمیں بتایا۔ ابوالزناد نے اعرج سے، اعرج نے حضرت ابوہریرہؓ سے روایت کی۔ انہوں نے کہا: نبی ﷺ نے فرمایا: نذر ابن آدم کا کچھ بھی نہیں کرتی جو اس کے لئے مقدر نہ ہو بلکہ نذر اس کو اُس تقدیر کے حوالے کر دیتی ہے جو اس کے لئے مقدر کی گئی ہوتی ہے اور اس کے ذریعہ اللہ بخیل سے کچھ نکالتا ہے اور وہ اللہ کی خاطر وہ کچھ دیتا ہے جو پہلے اس کی خاطر دینے کا نہیں تھا۔

مسدد نے ہم سے بیان کیا۔ انہوں نے یحيٰ بن سعید (قطان) سے، یحيٰ نے شعبہ (بن حجاج) سے روایت کی، کہا: ابوجمرہ نے مجھ سے بیان کیا کہ زہدم بن مضرب نے ہمیں بتایا، کہا: میں نے حضرت عمران بن حصینؓ سے سنا۔ وہ نبی ﷺ سے روایت کرتے تھے کہ آپؐ نے فرمایا: تم میں سے بہتر وہ لوگ ہیں جو میرے زمانے میں ہیں۔ پھر وہ لوگ جو ان کے معاً بعد آئیں گے، پھر وہ جو اُن کے معاً بعد آئیں گے۔ حضرت عمرانؓ کہتے تھے: میں نہیں جانتا آپؐ نے اپنے زمانہ کے بعد دو بار یا تین بار ذکر کیا، پھر اس کے بعد ایسے لوگ آئیں گے جو نذریں مانیں گے اور پوری نہیں کریں گے اور خیانت کریں گے اور انہیں امین نہ سمجھا جائے گا اور گواہی دیں گے حالانکہ ان سے گواہی نہیں طلب کی جائے گی اور ان میں موٹاپا نمایاں ہوگا۔

ابونعیم نے ہم سے بیان کیا کہ مالک نے ہمیں بتایا۔ انہوں نے طلحہ بن عبدالملک سے، طلحہ نے قاسم سے، قاسم نے حضرت عائشہ رضی اللہ عنہا سے، حضرت عائشہؓ نے نبیؐ ﷺ سے روایت کی۔ آپؐ نے فرمایا: جس نے یہ منت مانی ہو کہ وہ اللہ کی فرمانبرداری کرے گا تو وہ اُس کی فرمانبرداری کرے اور جو یہ منت مانے کہ وہ اُس کی نافرمانی کرے گا تو وہ اس کی نافرمانی نہ کرے۔

محمد بن مقاتل ابو الحسن نے ہم سے بیان کیا کہ عبداللہ (بن مبارک) نے ہمیں بتایا۔ عبیداللہ بن عمر نے ہمیں خبر دی۔ عبیداللہ نے نافع سے، نافع نے حضرت ابن عمرؓ سے روایت کی کہ حضرت عمرؓ نے کہا: یا رسول اللہ! میں نے زمانہ جاہلیت میں یہ منت مانی تھی کہ مسجد حرام میں ایک رات اعتکاف بیٹھوں گا۔ آپؐ نے فرمایا: اپنی نذر کو پورا کرو۔

ابوالیمان نے ہم سے بیان کیا کہ شعیب نے ہمیں بتایا۔ انہوں نے زُہری سے روایت کی، کہا: عبیداللہ بن عبداللہ نے مجھے خبر دی کہ حضرت عبداللہ بن عباسؓ نے انہیں بتایا کہ حضرت سعد بن عبادہ انصاریؓ نے نبیﷺ سے ایک نذر کے متعلق مسئلہ پوچھا جو اُن کی ماں کے ذمہ تھی اور وہ پیشتر اس کے کہ اس نذر کو پورا کرتی فوت ہو گئی تو آپؐ نے اُن کو حکم دیا کہ وہ اس کی طرف سے نذر پوری کریں۔ تو اس کے بعد یہی طریقہ جاری ہوگیا۔

آدم نے ہم سے بیان کیا کہ شعبہ نے ہمیں بتایا۔ شعبہ نے ابوبشر سے روایت کی، کہا: میں نے سعید بن جبیر سے سنا۔ انہوں نے حضرت ابن عباس رضی اللہ عنہما سے روایت کی۔ حضرت ابن عباسؓ نے کہا: ایک شخص نبی ﷺ کے پاس آیا اور آپؐ سے کہنے لگا کہ میری بہن نے حج کرنے کی نذر مانی تھی وہ فوت ہوگئی ہے۔ نبی ﷺ نے فرمایا: اگر اس پر کوئی قرضہ ہوتا تو کیا تم اسے ادا کرتے؟ اس نے کہا: ہاں۔ آپؐ نے فرمایا: اللہ کا حق ادا کرو۔ وہ زیادہ لائق ہے کہ اس کے حق کو پورا کیا جائے۔

ابو عاصم نے ہم سے بیان کیا۔ انہوں نے مالک سے، مالک نے طلحہ بن عبدالملک سے، طلحہ نے قاسم (بن محمد) سے، قاسم نے حضرت عائشہ رضی اللہ عنہا سے روایت کی۔ آپؓ فرماتی تھیں: نبی ﷺ نے فرمایا: جو اللہ کی فرمانبرداری کرنے کی نذر مانے تو چاہیئے کہ اُس کی فرمانبرداری کرے اور جو اس کی نافرمانی کرنے کی نذر مانے تو اُس کی نافرمانی نہ کرے۔