Ahadith

آدم نے ہم سے بیان کیا کہ ابن ابی ذئب نے ہمیں بتایا۔ انہوں نے سعید مقبری سے، سعید نے حضرت ابوہریرہ رضی اللہ عنہ سے روایت کی۔ اُنہوں نے کہا رسول اللہ ﷺ نے فرمایا: تم میں سے کسی کو اس کا عمل نجات نہیں دلائے گا۔ لوگوں نے کہا: یا رسول اللہ ! اور نہ ہی آپؐ؟ آپؐ نے فرمایا۔ نہ ہی میں سوائے اس کے کہ اللہ مجھے اپنی آغوش رحمت میں لے۔ تم بہت سنوار کر عمل کرو اور میانہ روی اختیار کرو اور صبح بھی (اللہ کی عبادت) کرو اور شام کو بھی کرو اور کچھ رات کو بھی اور میانہ روی اختیار کرو میانہ روی اختیار کرو پہنچ جاؤ گے۔

عبدالعزیز بن عبداللہ نے ہم سے بیان کیا کہ سلیمان (بن بلال) نے ہمیں بتایا۔ انہوں نے موسیٰ بن عقبہ سے، موسیٰ نے ابوسلمہ بن عبدالرحمٰن سے، ابوسلمہ نے حضرت عائشہؓ سے روایت کی کہ رسول اللہ ﷺ نے فرمایا: سنوار کر ٹھیک طور پر عمل کرو اور میانہ روی اختیار کرو اور سمجھ لو کہ تم میں سے کسی کو اُس کا عمل جنت میں ہرگز داخل نہیں کرے گا اور اللہ کو عملوں میں سے وہ عمل بہت پسند ہے جو ہمیشہ ہوتا رہے گو وہ تھوڑا ہی ہو۔

محمد بن عرعرہ نے مجھ سے بیان کیا کہ شعبہ نے ہمیں بتایا۔ انہوں نے سعد بن ابراہیم سے، سعد نے ابوسلمہ سے، ابوسلمہ نے حضرت عائشہ رضی اللہ عنہا سے روایت کی۔ آپ فرماتی تھیں: نبی ﷺ سے پوچھا گیا۔ کونسے اعمال اللہ کو بہت پسند ہیں؟ فرمایا: وہ جسے ہمیشہ کیا جائے گو وہ تھوڑا ہی ہو اور فرمایا: اعمال میں سے اتنے ہی کی ذمہ داری اُٹھاؤ جتنی کہ تم طاقت رکھتے ہو۔

عثمان بن ابی شیبہ نے مجھ سے بیان کیا کہ جریر نے ہمیں بتایا۔ انہوں نے منصور سے، منصور نے ابراہیم (نخعی) سے، ابراہیم نے علقمہ سے روایت کی انہوں نے کہا: میں نے اُم المؤمنین حضرت عائشہؓ سے پوچھا، میں نے کہا: اُم المؤمنینؓ نبی ﷺ کا طرزِ عمل کیا تھا۔ کیا آپؐ کوئی دِن (روزہ کے لئے) مخصوص کیا کرتے تھے؟ تو اُنہوں نے کہا: نہیں آپ کا عمل دائمی صورت رکھتا تھا اور تم میں سے کون ہے جو ایسی استطاعت رکھتا ہو جو رسول اللہ ﷺ رکھتے تھے۔

علی بن عبداللہ نے ہم سے بیان کیا۔ محمد بن زبرقان نے ہمیں بتایا کہ موسیٰ بن عقبہ نے ہم سے بیان کیا۔ انہوں نے ابو سلمہ بن عبد الرحمٰن سے روایت کی۔ اُنہوں نے حضرت عائشہؓ سے، حضرت عائشہؓ نے نبی ﷺ سے روایت کی۔ آپؐ نے فرمایا: سنوار کر ٹھیک طور پر عمل کرو اور میانہ روی اختیار کرو اور خوش رہو۔ کیونکہ تم میں سے کسی کو اُس کا عمل جنت میں ہرگز داخل نہیں کرے گا۔ صحابہ نے کہا: یا رسول اللہ! اور نہ ہی آپؐ؟ آپؐ نے فرمایا: اور میں بھی نہیں سوائے اس کے کہ اللہ مجھے اپنی مغفرت اور رحمت میں لے لے۔ (مدینی نے) بیان کیا کہ میرا خیال ہے کہ (موسیٰ بن عقبہ نے) یہ حدیث ابو سلمہ سے ابو النضر کے واسطے سے سنی ہے۔ ابو سلمہ نے حضرت عائشہؓ سے۔ اور عفان (بن مسلم) نے بیان کیا کہ ہم سے وُہیب نے بیان کیا انہوں نے موسیٰ بن عقبہ سے روایت کی، کہا کہ میں نے ابو سلمہ سے سنا اور انہوں نے حضرت عائشہؓ سے اور انہوں نے نبی ﷺ سے کہ آپؐ نے فرمایا: سنوار کر ٹھیک طور پر عمل کرو اور خوش رہو۔ اور مجاہد نے بیان کیا کہ سَدَادًا سَدِيدًا ہر دو کے معنی صدق کے ہیں۔

ابراہیم بن منذر نے مجھے بتایا کہ محمد بن فلیح نے ہم سے بیان کیا انہوں نے کہا میرے باپ نے مجھے بتایا۔ انہوں نے ہلال بن علی سے، انہوں نے کہا میں نے حضرت انس بن مالک رضی اللہ عنہ کو یہ کہتے ہوئے سنا۔ ایک دن رسول اللہ علیہ وسلم نے ہمیں نماز پڑھائی۔ پھر آپ منبر پر کھڑے ہوئے اور آپؐ نے مسجد کے قبلہ کی جانب اپنے ہاتھ سے اشارہ کیا اور فرمایا: ابھی جبکہ میں نے تمہیں نماز پڑھائی، جنت و دوزخ مجھے دکھائی گئیں۔ جو اس دیوار پر متمثل تھیں۔ میں نے خیر و شر میں آج کے دن کی طرح کوئی دن نہیں دیکھا۔ میں نے خیر و شر میں آج کے دن کی طرح کوئی دن نہیں دیکھا۔

قتیبہ بن سعید نے ہم سے بیان کیا کہ یعقوب بن عبدالرحمٰن نے ہمیں بتایا۔ اُنہوں نے عمرو بن ابی عمرو سے، عمرو نے سعید بن ابی سعید مقبری سے، سعید نے حضرت ابوہریرہ رضی اللہ عنہ سے روایت کی۔ اُنہوں نے کہا۔ میں نے رسول اللہ ﷺ سے سنا آپؐ فرماتے تھے: اللہ نے رحمت کو جس دن پیدا کیا۔ اس کے سو حصے بنا لئے اور پھر اپنے پاس ننانوے حصے رحمت کے روک لئے اور اپنی تمام مخلوقات میں ایک حصہ رحمت کا بھیج دیا۔ اگر کافر اس ساری رحمت کو جانتا جو اللہ کے پاس ہے تو جنت سے مایوس نہ ہوتا اور اگر مؤمن اس سارے عذاب کو جانتا جو اللہ کے پاس ہے تو آگ سے نڈر نہ ہوتا۔

ابوالیمان نے ہم سے بیان کیا کہ شعیب نے ہمیں بتایا۔ انہوں نے زہری سے، زہری نے کہا مجھے عطاء بن یزید نے خبر دی کہ حضرت ابو سعیدؓ نے انہیں بتایا کہ کچھ انصاری لوگوں نے رسول اللہ ﷺ سے کچھ مانگا تو اُن میں سے جس نے بھی آپؐ سے مانگا آپؐ نے اس کو دیا یہاں تک کہ جو آپ کے پاس تھا ختم ہوگیا تو جب سب کچھ ختم ہوگیا یعنی آپؐ نے اپنے دونوں ہاتھوں سے خرچ کر ڈالا تو آپؐ نے ان سے فرمایا: جو (مال) بھلائی بھی میرے پاس ہو گی میں اس کو تم سے چھپا کر نہیں رکھوں گا اور بات یہ ہے کہ جو سوال سے بچے گا اللہ اُسے بچائے گا اور جو اپنے نفس پر زور ڈال کر صبر کرے گا اللہ اس کو صبر دے گا اور جو شخص استغناء چاہے گا اللہ اُسے مستغنی کر دے گا اور صبر سے بہتر اور اس سے بڑھ کر کوئی نعمت تمہیں ہرگز نہیں ملے گی۔

خلاد بن یحيٰ نے ہم سے بیان کیا کہ مسعر (بن کدام) نے ہمیں بتایا۔ زیاد بن علاقہ نے ہم سے بیان کیا۔ انہوں نے کہا میں نے حضرت مغیرہ بن شعبہؓ سے سنا وہ کہتے تھے: نبی ﷺ اتنی دیر تک نماز پڑھتے کہ آپؐ کے پاؤں سوج جاتے یا (کہا:) پھول جاتے۔ تو آپؐ سے کہا جاتا۔ آپؐ فرماتے: کیا میں شکر گزار بندہ نہ بنوں۔