Ahadith

حضرت انسؓ بن مالک بیان کرتے ہیں کہ ہم میں ایک شخص بنو نجار میں سے تھا۔ جس نے سورۃ البقرۃ اور آل عمران پڑھی ہوئی تھی۔ وہ رسول اللہﷺ کا کاتب تھا۔ پھر وہ بھاگ گیا اور اہلِ کتاب سے جاملا۔ راوی کہتے ہیں انہوں نے اس سے عزت و احترام کا سلوک کیا اور کہنے لگے یہ محمد(ﷺ ) کا کاتب تھا۔ وہ اسے پاکر بہت خوش تھے۔ جبکہ وہ انہیں کے پاس تھا اللہ نے اس کی گردن توڑدی۔ انہوں نے اس کے لئے گڑھا کھودا اور اسے دفن کر دیالیکن زمین نے اسے نکال کر(زمین کی) سطح پر پھینک دیا۔ انہوں نے (دوبارہ) اس کے لئے گڑھا کھودا اور اُسے دفن کیا تو زمین نے اسے پھر باہر پھینک دیا۔ انہوں نے اس کے لئے پھرگڑھا کھودا اور اُسے دفن کیا۔ زمین نے اسے پھر نکال کر باہر پھینک دیا۔ پھر انہوں نے اسے یونہی پڑا رہنے دیا۔

حضرت جابرؓ سے روایت ہے کہ رسول اللہﷺ ایک سفر سے تشریف لائے۔ جب آپؐ مدینہ کے قریب تھے تو شدید آندھی چلی۔ قریب تھا کہ وہ سوار کو دفن کردے۔ راوی کا گمان ہے کہ رسول اللہﷺ نے فرمایا یہ آندھی کسی منافق کی موت کے لئے بھیجی گئی ہے۔ جب آپؐ مدینہ پہنچے تو منافقوں میں سے ایک بڑا سردار مر چکا تھا۔

ایاس کہتے ہیں میرے والدنے بتایا کہ ہم رسول اللہﷺ کے ساتھ ایک شخص کی عیادت کرنے گئے جسے بخار تھا۔ وہ کہتے ہیں میں نے اپنا ہاتھ اس پر رکھا اور کہا اللہ کی قسم! میں نے آج کے دن تک کسی شخص کو اتنا زیادہ گرم نہیں دیکھا تھا۔ اس پر نبیﷺ نے فرمایا کیا میں تمہیں اس شخص کے بارہ میں نہ بتاؤں جس کاجسم قیامت کے دن اس سے بھی زیادہ گرم ہوگا۔ یہ دو سوار شخص جو اپنی گردن موڑے جا رہے ہیں۔ آپؐ نے اپنے ساتھیوں میں سے دو مَردوں کی طرف اشارہ کیا۔

حضرت ابن عمرؓ سے روایت ہے کہ نبیﷺ نے فرمایا منافق کی مثال اس بکری کی طرح ہے جو دوریوڑوں کے درمیان پریشان ہے کبھی اس کی طرف جاتی ہے کبھی اس کی طرف۔ ایک روایت میں (تَعِیْرُ اِلَی ہٰذِہِ مَرَّۃً وَ اِلَی ہٰذِہِ مَرَّۃًکی بجائے) تَکِرُّ فِیْ ہٰذِہِ مَرَّۃً وَفِیْ ہٰذِہِ مَرَّۃً کے الفاظ ہیں۔