Ahadith

عبد اللہ بن شقیق نے بیان کیا کہ میں نے حضرت عائشہؓ سے کہا کہ آپؐ کے صحابہؓ میں سے کون رسول اللہ ﷺ کو زیادہ محبوب تھے۔ حضرت عائشہؓ نے فرمایا ابو بکرؓ۔ میں نے پوچھا پھر کون تو فرمایا عمرؓ۔ میں نے پوچھا پھر کون تو فرمایا ابو عبیدہؓ۔

حضرت ابن عباسؓ نے بیان کیا کہ جب حضرت عمرؓ نے اسلام قبول کیا تو جبریلؓ نازل ہوئے اور فرمایا اے محمدؐ! عمرؓ کے اسلام قبول کرنے سے آسمان والے خوش ہوئے۔

حضرت ابی بن کعب ؓ نے بیان کیا کہ رسول اللہ ﷺ نے فرمایا پہلا شخص جس سے اللہ تعالیٰ قیامت کے دن مصافحہ کرے گا اور پہلا شخص جسے وہ سلام کرے گا اور پہلا شخص جس کا ہاتھ پکڑے گا اور اسے جنت میں داخل کرے گا، عمر ؓ ہیں۔

حضرت عائشہؓ نے بیان کیا کہ رسول اللہ ﷺ نے فرمایا اے اللہ! خاص طور پر عمرؓ بن خطاب کے ذریعہ اسلام کو عزت عطا فرما۔

عبد اللہ بن سلمہ نے بیان کیا کہ میں نے حضرت علی ؓ کو فرماتے ہوئے سنا کہ رسول اللہ ﷺ کے بعد لوگوں میں سے سب سے بہتر حضرت ابو بکرؓ ہیں اور حضرت ابو بکر ؓ کے بعد لوگوں میں سے سب سے بہتر حضرت عمر ؓ ہیں۔

حضرت ابو ہریرہ ؓ نے بیان کیا کہ ہم رسول اللہ ﷺ کی خدمت میں بیٹھے ہوئے تھے کہ آپ ؐ نے فرمایا اس دوران کہ مَیں سویا ہوا تھا مَیں نے اپنے آپؐ کو جنت میں دیکھا اور میں نے ایک عورت کو دیکھا جو محل کے ایک طرف وضو کر رہی تھی۔ میں نے پوچھا کہ یہ محل کس کا ہے؟ اس نے کہا کہ عمرؓ کا۔ مجھے عمرؓ کی غیرت یاد آئی اور میں واپس آگیا۔ حضرت ابوہریرہ ؓ بیان کرتے ہیں کہ اس پر حضرت عمرؓ بن خطاب رو پڑے اور عرض کیا یا رسولؐ اللہ! میرے ماں اور باپ آپؐ پر قربان۔ کیا میں آپ ؐ سے غیرت کروں گا؟

حضرت ابو ذرؓ نے بیان کیا کہ میں نے رسول اللہ ﷺ کو فرماتے ہوئے سنا اللہ تعالیٰ نے حق کو عمرؓ کی زبان پر رکھ دیا ہے اور وہ حق ہی کہتے ہیں۔

حضرت ابو ہریرہ ؓ سے روایت ہے کہ رسول اللہ ﷺ نے فرمایا ہر نبی کا جنت میں ایک رفیق ہے اور اس میں میرا رفیق عثمان بن عفان ؓ ہے۔

حضرت ابو ہریرہؓ سے روایت ہے کہ نبیﷺ حضرت عثمانؓ سے مسجد کے دروازے پر ملے اور فرمانے لگے کہ عثمان! یہ جبریلؑ ہیں انہوں نے مجھے خبر دی ہے کہ اللہ تعالیٰ نے اُمِّ کلثومؓ کا نکاح رقیہؓ جتنے حق مہر پر اور اس سے (آپؓ کے) حسنِ سلوک پر آپؓ کے ساتھ کر دیا ہے۔