Ahadith

حضرت رُبَیِّع بنت مُعَوِّذ بن عَفْرَاء ؓ نے بیان کیا کہ رسول اللہ ﷺ نے وضو کیا اور اپنے سر کا دو بار مسح کیا۔

حضرت ابن عباسؓ سے روایت ہے کہ رسول اللہﷺ نے اپنے دونوں کانوں کے اندرونی حصہ کا شہادت کی دونوں انگلیوں سے مسح کیا۔ اور اپنے دونوں انگوٹھے دونوں کانوں کے پیچھے لے جاکر باہر کی طرف پھیرے۔ پھر آپؐ نے ان دونوں کے باہر بھی اور دونوں کے اندر بھی مسح کیا۔

حضرت رُبَیِّعؓ سے روایت ہے نبی ﷺ نے وضو کیا اور اپنے دونوں کانوں کے باہر اور اندر مسح کیا۔

حضرت رُبَیِّعؓ بِنْت مُعَوِّذ بن عَفْرَاءؓ نے بیان کیا کہ نبی ﷺ نے وضو کیا ، اپنی دونوں انگلیاں دونوں کانوں کے اندر داخل کیں۔

حضرت مِقدَام بن مَعدِیکَرِبؓ سے روایت ہے کہ رسول اللہ ﷺ نے وضو کیا اور اپنے سر کا اور دونوں کانوں کے اندر اور باہر کا مسح کیا۔

حضرت عبد اللہ بن زیدؓ بیان کرتے ہیں کہ رسول اللہ ﷺ نے فرمایا دونوں کان، سر کا حصہ ہیں۔

حضرت ابو امامہ ؓ سے روایت ہے کہ رسول اللہ ﷺ نے فرمایا دونوں کان، سر کا حصہ ہیں۔ آپ ؐ سر کا ایک مرتبہ مسح کیا کرتے تھے اور آنکھوں کے گوشوں پر بھی ہاتھ پھیرتے تھے۔

حضرت ابو ہریرہؓ بیان کرتے ہیں کہ رسول اللہ ﷺ نے فرمایا دونوں کان، سر کا حصہ ہیں۔

حضرت مُسْتَوْرِدْ بن شدّادؓ نے بیان کیا کہ میں نے رسول اللہ ﷺ کو دیکھا۔ آپؐ نے وضو کیا اور آپؐ نے اپنے ہاتھ کی چھوٹی انگلی کو دونوں پیروں کی انگلیوں میں پھیرا۔