Ahadith

حضرت مِقدَام بن مَعدِیکرب ؓ سے روایت ہے کہ رسول اللہ ﷺ نے وضو کیا اور اپنے پیر تین تین بار دھوئے۔

حضرت رُبَیِّع ؓ کہتی ہیں کہ میرے پاس حضرت ابن عباسؓ آئے اور مجھ سے اس حدیث کے بارے میں پوچھا _ یعنی وہ حدیث جو حضرت رُبَیِّع ؓ نے بیان کی کہ رسول اللہ ﷺ نے وضو کیا اور اپنے دونوں پاؤں دھوئے _ حضرت ابن عباسؓ نے کہا کہ لوگ (پاؤں ) دھونے کے علاوہ (اور کچھ) نہیں مانتے اور میں اللہ کی کتاب میں (پاؤں پر) مسح کے علاوہ کچھ نہیں پاتا۔

حضرت ابو بردہؓ نے مسجد میں بیان کیا کہ انہوں نے حضرت عثمان بن عفانؓ کو بیان کرتے ہوئے سنا کہ نبی ﷺ نے فرمایا جس نے وضو پورے طور پر کیا ، جیسے اللہ نے اس کے بارہ میں حکم دیا ہے تو فرض نمازیں کفارہ ہیں اُن (خطاؤں) کا جو ان (نمازوں) کے درمیان ہوتی ہیں۔

حضرت رفَاعہ بن رافعؓ سے روایت ہے کہ وہ نبیﷺ کے پاس بیٹھے ہوئے تھے تو آپؐ نے فرمایا حقیقت یہ ہے کہ کسی کی نماز مکمل نہیں ہوتی یہاں تک کہ پوری طرح وضو کرے جیسے اللہ تعالیٰ نے اُس کو حکم دیا ہے۔ اپنے چہرے اور دونوں ہاتھوں کو کہنیوں تک دھوئے اور اپنے سر کا مسح کرے اور اپنے دونوں پاؤں ٹخنوں تک (دھوئے)۔

حضرت حَکَم بن سُفیَانَ ثَقَفِیِّ ؓ سے روایت ہے کہ انہوں نے رسول اللہ ﷺ کو دیکھا ، آپؐ نے وضو کیا پھر ایک چُلّو پانی لیا اور اپنی شرم گاہ پر چھڑکا۔

حضرت اُسامہ بن زید بن حارثہؓ نے بیان کیا کہ رسول اللہ ﷺ نے فرمایا مجھے جبریلؑ نے وضو سکھایا اور مجھے حکم دیا کہ اپنے کپڑے کے نیچے پانی چھڑکوں۔ اس وجہ سے کہ وضو کے بعد پیشاب کا کوئی قطرہ نکل گیا ہو۔

حضرت ابو ہریرہؓ نے بیان کیا کہ رسول اللہ ﷺ نے فرمایا جب تو وضو کرے تو پانی چھڑکا کر۔

حضرت جابرؓ سے روایت ہے انہوں نے کہا کہ رسول اللہ ﷺ نے وضو کیا اور شرم گاہ پر پانی چھڑکا۔

حضرت اُمّ ہانی ؓ بنت ابی طالب نے بیان کیا ، جب فتح مکہ کا سال تھا رسول اللہ ﷺ نہانے کے لئے گئے۔ حضرت فاطمہؓ نے آپؐ پر پردہ کیا۔ پھر آپ ؐ نے اپنا کپڑا لیا اور اپنے آپ پر اُسے لپیٹ لیا۔

حضرت قیس بن سعدؓ نے بیان کیا کہ ہمارے پاس نبی ﷺ تشریف لائے۔ ہم نے آپؐ کے لئے پانی رکھا، آپؐ نے غسل کیا، پھر ہم آپؐ کے لئے ایک چادر لائے جو ورس سے رنگی ہوئی تھی۔ آپؐ نے اُسے اپنے اوپر لپیٹ لیا گویا کہ میں اب بھی آپؐ کے شکم مبارک پر ورس کا رنگ دیکھ رہا ہوں۔