Ahadith

حضرت سلمان فارسیؓ سے روایت ہے کہ رسول اللہ ﷺ نے وضو کیا اور اُونی جُبّہ جو آپؐ پر تھا اُسے اُٹھایا اور اپنے چہرے کو پونچھ لیا۔

حضرت انس بن مالک ؓ سے روایت ہے کہ نبی ﷺ نے فرمایا جس نے وضو کیا اور اچھی طرح وضو کیا۔ پھر تین بار کہا میں گواہی دیتا ہوں کہ اللہ کے سوا کوئی عبادت کے لائق نہیں۔ اُس کا کوئی شریک نہیں اور میں گواہی دیتا ہوں کہ محمدؐ اس کے بندے اور اس کے رسولؐ ہیں۔ اُس کے لئے جنت کے آٹھ دروازے کھولے جاتے ہیں ان میں جس سے چاہے داخل ہو۔

حضرت عمر بن خطابؓ نے بیان کیا رسول اللہ ﷺ نے فرمایا ہر مسلمان شخص جو وضو کرتا ہے اور اچھی طرح وضو کرتا ہے اور پھر یہ کہتا ہے میں گواہی دیتا ہوں اللہ کے سوا کوئی عبادت کے لائق نہیں اور میں گواہی دیتا ہوں محمدؐ اس کے بندے اور اس کے رسولؐ ہیں اُس کے لئے جنت کے آٹھ دروازے کھول دئیے جاتے ہیں۔ ان میں سے جس سے چاہے وہ داخل ہو۔

نبی ﷺ کے صحابی حضرت عبد اللہ بن زیدؓ نے بیان کیا کہ ہمارے پاس رسول اللہ ﷺ تشریف لائے ہم آپؐ کے لئے پیتل کے ایک برتن میں پانی نکال کر لائے اور آپؐ نے اُس سے وضو کیا۔

حضرت زینب بنت جحشؓ سے روایت ہے کہ اُن کے پاس پیتل کا ایک بڑا لگن تھا۔ وہ کہتی ہیں کہ میں اس میں رسول اللہ ﷺ کا سر (مبارک دھوکر) کنگھی کیا کرتی تھی۔

حضرت ابو ہریرہؓ سے روایت ہے کہ نبی ﷺ نے ایک برتن میں سے وضو کیا۔

حضرت عائشہؓ نے بیان فرمایا کہ رسول اللہ ﷺ سو جاتے یہاں تک کہ سانس کی آواز آنے لگتی۔ پھر کھڑے ہوتے اور نماز پڑھتے اور وضو (تازہ) نہ کرتے۔ وکیع کہتے ہیں کہ ان کی مُراد یہ تھی کہ جب آپؐ سجدہ میں ہوتے۔

حضرت عبد اللہ ؓ سے روایت ہے کہ رسول اللہ ﷺ سو گئے حتی کہ سانس کی آواز آنے لگی پھر آپ اُٹھے اور آپؐ نے نماز پڑھی۔

حضرت ابن عباسؓ نے بیان کیا کہ آپؐ کی نیند یہ ہوتی اور آپؐ بیٹھے ہوئے ہوتے۔ اُن کی مراد نبی ﷺ سے تھی۔