Ahadith

حضرت صفوان بن عَسَّالؓ نے بیان کیا کہ رسول اللہ ﷺ ہمیں ارشاد فرمایا کرتے تھے کہ ہم اپنے موزے تین دن تک پیشاب، پاخانہ اور نیند کی وجہ سے بے شک نہ اُتاریں سوائے جنابت کی حالت میں۔

حضرت بُسرَۃ بنت صَفوَانؓ نے بیان کیا کہ رسول اللہ ﷺ نے فرمایا جب تم میں سے کوئی اپنی شرمگاہ کو چھوئے تو اُسے وضو کرنا چاہئے۔

حضرت جابر بن عبد اللہؓ نے بیان کیا کہ رسول اللہ ﷺ نے فرمایا جب تم میں سے کوئی اپنی شرمگاہ کو چھوئے تو اُس پر وضو ہے۔

حضرت ام حبیبہؓ نے بیان فرمایا کہ میں نے رسول اللہ ﷺ کو فرماتے ہوئے سنا جو اپنی شرمگاہ کو چھوئے تو اُسے وضو کرنا چاہئے۔

حضرت ابو ایوبؓ نے بیان کیا کہ میں نے رسول اللہ ﷺ کو فرماتے ہوئے سنا جو اپنی شرمگاہ کو چھوئے اُسے وضو کرنا چاہئے۔

قیس بن طلق حَنَفِیَّ نے اپنے والد سے روایت کی ہے انہوں نے کہا کہ میں نے رسول اللہ ﷺ سے سنا آپؐ سے شرم گاہ کو چھونے کے بارہ میں پوچھا گیا تو آپؐ نے فرمایا اس میں وضو نہیں ہے، وہ تو تیرے (جسم کا) حصہ ہی ہے۔

حضرت ابو امامہؓ نے بیان کیا کہ رسول اللہ ﷺ سے شرمگاہ چھونے کے متعلق سوال کیا گیا۔ آپؐ نے فرمایا وہ تیرے (جسم کا) ٹکڑا ہے۔

حضرت ابو ہریرہؓ سے روایت ہے کہ نبی ﷺ نے فرمایا جسے آگ نے بدل دیا ہو، اس (کے استعمال) کی وجہ سے وضو کرو۔ حضرت ابن عباسؓ نے کہا کیا گرم پانی کے استعمال سے بھی میں وضو کروں؟ تو انہوں نے ان کو کہا اے میرے بھتیجے! جب تم رسول اللہ ﷺ کی کوئی حدیث سنو تو اُس کے بارہ میں مثالیں نہ دیا کرو۔

حضرت عائشہ ؓ نے بیان فرمایا کہ رسول اللہ ﷺ نے فرمایا جس چیز کو آگ چھو جائے تو اُس (کے استعمال) کی وجہ سے وضو کرو۔