Ahadith

حضرت ابن عباسؓ سے روایت ہے کہ نبیﷺ نے فرمایا دودھ پر کلی کرو کیونکہ اس میں چکنائی ہے۔

نبی ﷺ کی زوجہ مطہرہ حضرت ام سلمہؓ نے بیان فرمایا کہ رسول اللہ ﷺ نے فرمایا جب تم دودھ پیئو تو کلی کرو کیونکہ اس میں چکنائی ہے۔

عبدالمہیمن بن عباس بن بن سہل بن سعد ساعدی نے اپنے والد سے اور وہ ان کے دادا سے روایت کرتے ہیں کہ رسول اللہ ﷺ نے فرمایا دودھ پینے پر کلّی کرو کیونکہ اس میں چکنائی ہے۔

حضرت انس بن مالک ؓ نے بیان کیا کہ رسول اللہ ﷺ نے بکری کا دودھ دوہا اور اس کے دودھ میں سے پیا ، پھر پانی منگوایا اور کلی کی اور فرمایا اس میں چکنائی ہے۔

عروہ بن زبیر سے روایت ہے کہ حضرت عائشہؓ نے فرمایا کہ رسول اللہ ﷺ نے اپنی ایک بیوی کا بوسہ لیا پھر نماز کے لئے چلے گئے اور وضو نہیں کیا۔ راوی کہتے ہیں میں نے کہا وہ آپؓ ہی ہیں؟ تو آپؓ مسکرا دیں۔

حضرت عائشہؓ نے بیان فرمایا کہ رسول اللہ ﷺ وضو کیا کرتے تھے پھر بوسہ بھی لے لیتے اور نماز ادا کرتے اور وضو (تازہ) نہیں کرتے تھے اور کئی دفعہ آپؐ نے میرے ساتھ ایسا کیا۔

حضرت علیؓ نے بیان فرمایا کہ رسول اللہ ﷺ سے مذی کے بارے میں سوال کیا گیا۔ آپؐ نے فرمایا اس کی وجہ سے وضو ہے اور منی کی وجہ سے غسل ہے۔

حضرت مقداد بن اسودؓ سے روایت ہے کہ انہوں نے نبی ﷺ سے ایسے آدمی کے بارے میں سوال کیا جو اپنی بیوی کے پاس جاتا ہے لیکن انزال نہیں کرتا۔ آپؐ نے فرمایا جب تم میں سے کوئی ایسا پائے تو اُسے چاہئے اپنی شرم گاہ پر پانی چھڑکے، یعنی اُس کو دھوئے اور وضو کرے۔

حضرت سہل بن حُنیفؓ نے بیان کیا کہ میں مذی کی وجہ سے تکلیف اٹھاتا تھا اور اس کی وجہ سے میں بہت غسل کیا کرتا تھا۔ میں نے رسول اللہ ﷺ سے پوچھا تو آپؐ نے فرمایا اس کے لئے تو تمہیں وضو ہی کافی ہے۔ میں نے کہا یا رسولؐ اللہ! میں کیا کروں، اگر مذی میرے کپڑے میں لگ جائے؟ آپؐ نے فرمایا تمہارے لئے ایک چلو پانی کافی ہے جس کو تم اپنے کپڑے پر چھڑک دو، جس جگہ تم دیکھو کہ وہ لگی ہے۔