Ahadith

عقبہ بن عامر جہنی سے روایت ہے کہ وہ مصر سے حضرت عمرؓ بن خطاب کے پاس آئے۔ حضرت عمرؓ نے پوچھا ، کتنی مدت سے تم نے موزے نہیں اُتارے ؟ انہوں نے کہا جمعہ سے جمعہ تک۔ آپ (حضرت عمرؓ) نے فرمایا تم نے سنت کو پالیا۔

حضرت مغیرہ بن شعبہؓ سے روایت ہے کہ رسول اللہﷺ نے وضو کیا اور جرابوں اور جوتوں پر مسح کیا۔

حضرت ابو موسیٰ اشعری ؓ سے روایت ہے کہ رسول اللہ ﷺ نے وضو کیا اور جرابوں اور جوتوں پر مسح کیا۔ (راوی) مُعَلَّی نے اپنی روایت میں کہا ہے کہ مجھے اس کا علم نہیں سوائے اس کے کہ کہا دونوں جوتوں پر۔

حضرت بلال ؓ سے روایت ہے کہ رسول اللہ ﷺ نے دونوں موزوں اور سر کے کپڑے پر مسح کیا۔

حضرت عمرو بن اُمیہؓ نے بیان کیا کہ میں نے رسول اللہ ﷺ کو موزوں اور عمامہ پر مسح کرتے ہوئے دیکھا۔

زید بن صُوحَان کے آزادہ کردہ غلام ابو مسلم نے بیان کیا کہ میں حضرت سلمانؓ کے ساتھ تھا۔ انہوں (حضرت سلمانؓ) نے ایک آدمی کو دیکھا جو وضو کے لئے اپنے موزے اتار رہا تھا۔ حضرت سلمانؓ نے اسے کہا اپنے موزوں پر اور اپنے سر کے کپڑے پر اور اپنی پیشانی پر مسح کرلو کیونکہ میں نے رسول اللہ ﷺ کو موزوں اور سر کے کپڑے پر مسح کرتے دیکھا ہے۔

حضرت انس بن مالکؓ نے بیان کیا کہ میں نے رسول اللہ ﷺ کو دیکھا آپؐ نے وضو کیا اور آپؐ پر قِطری عمامہ تھا۔ آپؐ نے عمامہ کے نیچے سے اپنا ہاتھ داخل کیا اور اپنے سر کے اگلے حصے کا مسح کیا اور عمامہ اتارا نہیں۔

حضرت عمار بن یاسرؓ نے بیان کیا کہ حضرت عائشہؓ کا ہار گر گیا اور وہ اس کی تلاش کی وجہ سے پیچھے رہ گئیں۔ حضرت ابو بکرؓ حضرت عائشہؓ کے پاس گئے اور اُن پر لوگوں کو سفر سے روکنے کی وجہ سے ناراض ہوئے۔ اس (موقعہ) پر اللہ تعالیٰ نے تیمم کی رخصت نازل فرمائی۔ راوی نے کہا کہ ہم نے اس دن کندھوں تک تیمم کیا۔ راوی نے کہا کہ حضرت ابو بکرؓ حضرت عائشہؓ کے پاس (پھر) گئے اور فرمایا کہ میں نہیں جانتا تھا کہ تو (اتنی) برکت والی ہے۔

حضرت عمار بن یاسر ؓ نے بیان کیا کہ ہم نے رسول اللہ ﷺ کے ساتھ تیمم کیا کندھوں تک۔