Ahadith

عبدالمہیمن بن عباس بن سہل ساعدی اپنے والد سے اور وہ ان کے دادا سے روایت کرتے ہیں کہ رسول اللہ ﷺ نے اپنے موزوں پر مسح کیا اور ہمیں بھی موزوں پر مسح کرنے کا ارشاد فرمایا۔

حضرت انس بن مالک ؓ نے بیان کیا کہ میں رسول اللہ ﷺ کے ساتھ ایک سفر میں تھا۔ آپؐ نے دریافت فرمایا کچھ پانی ہے ؟ آپؐ نے وضوء کیا اور اپنے موزوں پر مسح کیا ، پھر لشکر سے جا ملے اور اُن کی امامت کروائی۔

ابن بُرَیدۃ اپنے والد سے روایت کرتے ہیں کہ نجاشی نے نبی ﷺ کی خدمت میں سیاہ رنگ کے سادہ موزے ہدیہ کے طور پر بھیجے۔ آپؐ نے وہ پہنے، پھر وضو کیا اور ان پر مسح کیا۔

حضرت مغیرہ بن شعبہؓ کے کاتب ورّاد حضرت مغیرہ بن شعبہؓ سے روایت کرتے ہیں کہ رسول اللہ ﷺ نے اپنے موزے کے اوپر اور اس کے نیچے مسح کیا۔

حضرت جابرؓ نے بیان کیا کہ رسول اللہ ﷺ ایک آدمی کے پاس سے گزرے جو وضو کر رہا تھا اور اپنے موزے دھو رہا تھا۔ آپؐ نے اپنے ہاتھ سے اشارہ فرمایا گویا آپؐ نے اسے منع فرمایا کہ تمہیں صرف مسح کرنے کا حکم دیا گیا ہے۔ رسول اللہ ﷺ نے اپنے ہاتھ سے اس طرح اشارہ کیا: پاؤں کی انگلیوں سے شروع کرتے ہوئے پنڈلی تک اور اپنی انگلیوں سے لکیریں سی ڈالتے ہوئے۔

شُریح بن ھانی نے بیان کیا کہ میں نے حضرت عائشہؓ سے موزوں پر مسح کے بارے میں سوال کیا۔ انہوں نے فرمایا کہ حضرت علیؓ کے پاس جاؤ اور اُن سے پوچھو۔ وہ اس بارے میں مجھ سے زیادہ جانتے ہیں۔ میں حضرت علیؓ کے پاس آیا اور ان سے مسح کے بارے میں سوال کیا۔ تو انہوں نے فرمایا رسول اللہ ﷺ ہمیں حکم دیتے تھے کہ ہم مسح کریں مقیم کے لئے ایک دن رات اور مسافر کے لئے تین دن۔

حضرت خزیمہ بن ثابتؓ نے بیان کیا کہ رسول اللہﷺ نے مسافر کے لئے تین دِن (مسح کی مدت) مقرر کی ہے۔ (راوی نے کہا) اگر سوال کرنے والا سوال کرتا چلا جاتا تو آپؐ اس کو پانچ (دن) کر دیتے۔

حضرت خزیمہ بن ثابت ؓ سے روایت ہے کہ نبی ﷺ نے مسافر کے لئے موزوں پر مسح کرنے کے بارہ میں فرمایا ’’تین دِن‘‘ _ میرا خیال ہے کہ آپؐ نے ’’ان کی راتیں‘‘ بھی فرمایا۔

حضرت ابو ہریرہؓ نے بیان کیا کہ لوگوں نے عرض کیا یا رسولؐ اللہ! موزوں پر وضو کب تک ہے؟ آپؐ نے فرمایا مسافر کے لئے تین دن اور راتیں اور مقیم کے لئے ایک دن رات۔

عبد الرحمان بن ابی بکرہ نے اپنے والد سے روایت کی ہے کہ نبی ﷺ نے مسافر کے لئے رخصت دی ہے _کہ جب وہ وضو کرے اور اپنے موزے پہن لے اور پھر اُس کا وضو ٹوٹ جائے _کہ وہ مسح کرے تین دن اور تین راتیں اور مقیم کے لئے ایک دن اور ایک رات۔