Ahadith

حضرت جابرؓ سے روایت ہے وہ کہتے ہیں کہ عمر بھر کے لئے کچھ دیناجس کی رسول اللہﷺ نے اجازت فر مائی یہ ہے کہ انسان کہے یہ تمہارے لئے اور تمہاری اولاد کے لئے ہے اور جب یہ کہے کہ یہ تیرے لئے ہے جب تک تو زندہ ہے تو وہ اس کے مالک کو واپس ہوگا۔

حضرت جابر بن عبد اللہؓ سے روایت ہے کہ رسول اللہﷺ نے اس شخص کے بارہ میں جس کے لئے اور جس کی اولاد کے لئے عمر بھر کے لئے کچھ دیا گیایہ فیصلہ فرمایا کہ وہ قطعی طور پر اس کاہے۔ دینے والے کے لئے اس میں کوئی شرط یا استثناء کرنا جائز نہیں۔ ابو سلمہ کہتے ہیں وجہ یہ ہے کہ اس نے ایسی چیز دی ہے جس میں ورثہ کے احکام جاری ہوگئے اور ورثہ(کے احکام) نے اس کی شرط کو ختم کردیا۔

حضرت جابر بن عبد اللہؓ سے روایت ہے وہ بیان کرتے ہیں کہ رسول اللہﷺ نے فرمایا عمر بھرکے لئے دی گئی چیز اسی کی ہوگی جس کو وہ دی گئی۔ ایک اور روایت میں عَنْ جَابِرِ بْنِ عَبْدِ اللّٰہِ اَنَّ نَبِیَّ اللّٰہِﷺ کے الفاظ ہیں۔ ایک روایت میں عَنْ جَابِرٍ یَرْفَعُہُ اِ لَی النَّبِیِّﷺ کے الفاظ ہیں۔

حضرت جابرؓ سے روایت ہے وہ کہتے ہیں کہ رسول اللہﷺ نے فرمایا کہ اپنے مال اپنے پاس سنبھال کر رکھو اور انہیں ضائع نہ کرو کیونکہ جس نے عمر بھر کے لئے کچھ دیا تو وہ اسی کی ملکیت ہو گا جس کو عمر بھر کے لئے دیا گیا۔ چاہے وہ زندہ رہے یا فوت ہوجائے اور اس کی اولاد کے لئے ہو گا۔ ایک اور روایت میں یہ مزید ہے کہ انصار مہاجرین کو (اپنی جائیدادیں ) عمر بھر کے لئے دینے لگے تو رسول اللہﷺ نے فرمایا تم اپنے اموال اپنے پاس ہی رکھو۔

حضرت جابرؓ سے روایت ہے وہ کہتے ہیں کہ مدینہ کی ایک عورت نے اپنا ایک باغ عمر بھر کے لئے اپنے ایک بیٹے کو دے دیا پھر وہ بیٹا فوت ہوگیا اور اس کے بعد وہ عورت بھی فوت ہوگئی اور اس(عورت) نے اولاد چھوڑی اور اس (مرحوم) کے بھائی بھی تھے جو عمر بھر کے لئے ہبہ کرنے والی کے بیٹے تھے عمر بھر کے لئے ہبہ کرنے والی کی اولادنے کہا کہ اب یہ باغ ہمارے پاس واپس آگیا ہے مگر جس کے نام عمر بھر کا ہبہ کیا گیا تھا اس کی اولادنے کہا کہ یہ ہمارے والد کی ملکیت ہے اس کی زندگی میں بھی اور اس کے مرنے کے بعد بھی چنانچہ وہ اپنا جھگڑا حضرت عثمانؓ کے آزاد کردہ غلام طارق کے پاس لے کر گئے۔ انہوں نے حضرت جابرؓ کو بلایا تو انہوں نے رسول اللہﷺ کے بارہ میں گواہی دی کہ(آپؐ نے فرمایا) کہ عمر بھر کا ہبہ اس کی ملکیت ہے جسے وہ دیا گیا تو طارق نے اس کے مطابق فیصلہ کیا پھر عبد الملک کو تحریراً یہ اطلاع دی اور حضرت جابرؓ کی گواہی کا بھی ذکر کیا تو عبد الملک نے کہا کہ حضرت جابرؓ نے سچ کہا۔ طارق نے یہ فیصلہ نافذ کیا وہ آج تک اس شخص کے بیٹوں کا ہے جِسے یہ عمر بھر کے لئے دیا گیا تھا۔

سلیمان بن یسار سے روایت ہے کہ طارق نے عمر بھر کے ہبہ کا فیصلہ وارث کے حق میں حضرت جابر بن عبد اللہؓ کی رسول اللہﷺ سے روایت کی بناء پر کیاتھا۔