Ahadith

ہشام بن عروہ اپنے والد سے روایت کرتے ہیں انہوں نے کہا حضرت عائشہؓ کے پاس حضرت ابن عمرؓ کی اس بات کا ذکر ہوا کہ میّت کو اس کے گھر والو ں کے اس پر رونے کی وجہ سے عذاب دیا جاتا ہے۔ انہوں نے فرمایا اللہ تعالیٰ ابو عبدالرحمان پر رحم فرمائے۔ انہوں نے ایک بات سنی پھر وہ انہیں یادنہ رہی۔ بات یہ تھی ایک یہودی کا جنازہ رسول اللہﷺ کے سامنے سے گزرااور وہ لوگ اس پر رو رہے تھے تو آپؐ نے فرمایا تم روتے ہو اور یقینا اسے عذاب دیا جا رہا ہے٭۔

ہشام اپنے والد سے روایت کرتے ہیں حضرت عائشہؓ کے پاس ذکر ہوا کہ حضرت ابن عمرؓ یہ بات نبیﷺ تک پہنچاتے تھے کہ میّت کو گھر والوں کے اس پر رونے کی وجہ سے اس کی قبر میں عذاب دیا جاتا ہے۔ انہوں (حضرت عائشہؓ ) نے فرمایا انہیں بھول ہوئی۔ رسول اللہﷺ نے صرف یہ فرمایا تھا اسے اس کی غلطی یااس کے گناہ کی وجہ سے عذاب دیا جا رہا ہے۔ اور اس کے گھر والے اب اس پر رورہے ہیں۔ اور یہ آپؐ کے اس فرمان کی طرح ہے جب رسول اللہﷺ بدر کے دن گڑھے پر کھڑے ہوئے اور اس میں مشرکوں میں سے بدر میں ہلاک ہونے والے پڑے ہوئے تھے۔ آپؐ نے ان سے جو فرمایا سو فرمایا۔ یہ یقیناوہ سن رہے ہیں جو میں کہہ رہا ہوں۔ یقینا ان (ابن عمرؓ ) کو اس میں بھول ہوئی۔ آپؐ نے صرف یہ فرمایا تھا کہ یقینا اب وہ جانتے ہیں جو کچھ میں ان سے کہتا تھاوہ حق ہے۔ پھر آپؓ (حضرت عائشہؓ ) نے یہ آیات پڑھیں اِنَّکَ لَا تُسْمِعُ۔ ۔ ۔ (النمل: 81) ترجمہ: تو ہرگز مُردوں کو نہیں سُناسکتا وَمَا اَنْتَ بِمُسْمِعٍ۔ ۔ ۔ (فاطر: 23) اور جو قبروں میں پڑے ہوئے ہیں انہیں ہرگز نہیں سنا سکتا۔ آپؐ نے یہ اس وقت فرمایا جب انہوں نے آگ میں اپنی جگہیں بنالی تھیں۔

حضرت عمرہ بنتِ عبدالرحمان سے روایت ہے وہ بیان کرتی ہیں کہ انہوں نے حضرت عائشہؓ سے سنا جبکہ ان سے ذکر کیا گیا تھاکہ حضرت عبداللہ بن عمرؓ کہتے ہیں کہ میّت کو زندوں کے رونے کی وجہ سے عذاب دیا جاتا ہے۔ حضرت عائشہؓ نے کہا اللہ تعالیٰ ابو عبدالرحمان کی مغفرت فرمائے۔ انہوں نے (ارادۃً)غلط نہیں کہامگر بھول گئے ہیں یاانہیں غلط فہمی ہوئی۔ بات یہ ہوئی کہ رسول اللہﷺ ایک یہودیہ کے پاس سے گزرے جس پر رویا جا رہا تھا۔ آپؐ نے فرمایا یہ اس پر رو رہے ہیں اور اسے اس کی قبر میں عذاب دیا جا رہاہے۔

علی بن ربیعہ سے روایت ہے انہوں نے کہا کوفہ میں سب سے پہلے جس پر نوحہ کیا گیا۔ وہ قرظہ بن کعب تھے۔ اس پرحضرت مغیرہ بن شعبہؓ نے کہا میں نے رسول اللہﷺ کو فرماتے سنا ہے جس پر نوحہ کیا جائے یقینا اسے اس نوحہ کی وجہ سے جو اس پر کیا گیا قیامت کے دن عذاب دیا جائے گا۔

حضرت ابو مالک اشعریؓ نے بیان کیا کہ نبیﷺ نے فرمایا چار چیزیں میری امت میں جاہلیت کے معاملات میں سے ہیں جسے وہ نہیں چھوڑیں گے۔ حسب میں فخراور نسب میں طعنہ زنی، ستاروں کے ذریعہ بارش طلب کرنا اور نوحہ کرنا اور فرمایا نوحہ کرنے والی جب اپنی موت سے پہلے توبہ نہ کرے تو قیامت کے دن اسے اٹھایا جائے گاکہ اس پر تارکول کا لباس ہوگا اور قمیص خارش کی ہوگی۔

عمرہ کہتی ہیں انہوں نے حضرت عائشہؓ کو فرماتے ہوئے سنا جب رسول اللہﷺ کے پاس حضرت زید بن حارثہؓ اور حضرت جعفر بن ابی طالبؓ اور حضرت عبداللہ بن رواحہؓ کی شہادت کی خبر آئی، رسول اللہﷺ تشریف فرما تھے۔ آپؐ غمگین نظر آ رہے تھے۔ وہ فرماتی ہیں میں دروازہ کے سوراخ سے دیکھ رہی تھی کہ ایک شخص آپؐ کے پاس آیا۔ اُس نے کہا یارسولؐ اللہ! جعفرؓ (کے خاندان) کی خواتین۔ ۔ ۔ اور اس نے ان کے رونے کا ذکر کیا۔ آپؐ نے اسے ارشادفرمایا کہ وہ جاکر انہیں منع کرے وہ گیااو رپھر آپؐ کے پاس آکر بتایا کہ انہوں نے اس کی بات نہیں مانی۔ آپؐ نے اسے دوبارہ ارشاد فرمایا کہ وہ جائے اور ان کو منع کرے۔ وہ گیا پھر آپؐ کے پاس آیا اور کہا خدا کی قسم یا رسولؐ اللہ! وہ ہم پر غالب آگئی ہیں۔ راویہ کہتی ہیں حضرت عائشہؓ بیان کرتی تھیں کہ رسول اللہﷺ نے فرمایاجاؤاور ان کے منہ میں مٹّی ڈالو۔ (یعنی انہیں ان کے حال پر چھوڑدو)٭۔ حضرت عائشہؓ بیان کرتی ہیں میں نے کہا اللہ تمہاری ناک خاک آلود ہ کرے خدا کی قسم! نہ تو تم وہ کرسکے ہو جو تمہیں رسول اللہﷺ نے حکم دیا ہے اور نہ تم رسول اللہﷺ کو تکلیف دینے سے باز آتے ہو۔ عبدالعزیز کی روایت میں ہے اور تم رسول اللہﷺ کو تنگ کرنے سے باز نہیں آتے۔