Ahadith

حضرت اسماء بنت حضرت ابوبکرؓ سے روایت ہے کہ ایک دن نبیﷺ فکر مند ہوئے۔ وہ کہتی ہیں ان کی مراد سورج گرہن کے دن سے تھی۔ آپؐ نے قمیض لی (اور مسجد چلے گئے) یہانتک کہ آپؐ کو چادر پہنچائی گئی۔ پھر آپؐ نے لوگوں کو لمبا قیام کروایا۔ اگر کوئی شخص آتا تواُ سے سمجھ نہ آتی کہ نبیﷺ نے رکوع کیا ہے لمبے قیام کی وجہ سے وہ نہ بتا سکتا کہ آپؐ نے رکوع بھی کیا ہے۔ ایک اور روایت میں ہے کہ آپؐ نے لمبا قیام کیا پھر رکوع کیا۔ اور حضرت (اسماءؓ ) نے کہا پس میں دیکھنے لگی ایک عورت کو جو مجھ سے زیادہ عمر رسیدہ تھی اور دوسری عورت کو جو مجھ سے زیادہ بیمار تھی۔

حضرت اسماء بنت حضرت ابو بکرؓ سے روایت ہے کہ نبیﷺ کے عہد میں سورج گرہن ہوا۔ آپؐ فکر مند ہوئے اور جلدی سے (بغیر اوپر کی چادر اوڑھے) قمیض میں چلے گئے۔ پھرآپؐ کو بڑی چادر بھجوا ئی گئی۔ وہ کہتی ہیں میں نے اپنا کام پورا کیا پھر میں آئی اور مسجد میں داخل ہوئی تو میں نے رسول اللہﷺ کو حالت قیام میں دیکھا میں بھی آپؐ کے ساتھ کھڑی ہوگئی۔ آپؐ نے لمبا قیام کیا یہانتک کہ میں نے بیٹھنے کا ارادہ کیا پھر میں ایک کمزور عورت کی طرف متوجہ ہوئی تو میں نے کہا کہ یہ مجھ سے زیادہ کمزور ہے پس میں بھی کھڑی رہوں گی پھر آپؐ نے رکوع کیا اور لمبا رکوع کیا۔ پھر آپؐ نے سر اٹھایا اور لمبا قیام کیا یہانتک کہ اگر کوئی شخص آتا تو اسے خیال ہوتا کہ آپؐ نے رکوع نہیں کیا۔

حضرت ابن عباسؓ سے روایت ہے کہ رسول اللہﷺ کے زمانہ میں سورج کو گرہن لگا۔ رسول اللہﷺ نے نماز پڑھی اور لوگ آپؐ کے ساتھ تھے۔ آپؐ نے قریباًسورۃ بقرۃ (کی قراء ت) کے برابر لمبا قیام کیاپھر آپؐ نے لمبا رکوع کیا پھر سر اٹھایا اور لمبا قیام کیا مگر وہ پہلے قیام سے چھوٹا تھا۔ پھر لمبا رکوع کیا وہ پہلے رکوع سے چھوٹا تھا پھر سر اُٹھایا اور لمبا قیام کیا وہ پہلے قیام سے چھوٹا تھا پھر لمبا رکوع کیا وہ پہلے رکوع سے چھوٹا تھا۔ پھر آپؐ نے سجدہ کیا پھر لمبا قیام کیا جو پہلے قیام سے چھوٹا تھاپھر لمبا رکوع کیا جو پہلے رکوع سے چھوٹا تھا پھر سر اٹھایاپھر لمبا قیام کیا جو پہلے قیام سے چھوٹا تھا پھر لمبا رکوع کیا جو پہلے رکوع سے چھوٹا تھا پھر آپؐ نے سجدہ کیا اور نماز سے فارغ ہوئے اور سورج روشن ہوچکا تھا پھر فرمایاسورج اور چاند اللہ کے نشانات میں سے دو نشان ہیں یہ کسی کی موت پر نہ زندگی پر گہناتے ہیں۔ جب تم یہ دیکھو تو اللہ کو یاد کرو۔ انہوں نے عرض کیا یارسولؐ اللہ! ہم نے آپؐ کو اپنی اس جگہ پر کسی چیز کو پکڑتے ہوئے دیکھا ہے پھر ہم نے دیکھا کہ آپ رک گئے ہیں۔ فرمایا کہ میں نے جنت دیکھی تو اس میں سے ایک خوشہ لینے لگا۔ اگر میں وہ لے لیتا تو تم ضرور رہتی دنیا تک اس میں سے کھاتے۔ اور میں نے آگ دیکھی اور آج کے دن کی طرح کا منظر کبھی نہیں دیکھا۔ اور میں نے اس میں بہت عورتیں دیکھیں۔ انہوں نے عرض کیا کیوں یا رسولؐ اللہ !فرمایا ان کے ’’کفر‘‘ کی وجہ سے عرض کیاگیاکیاوہ اللہ کاانکار کرتی ہیں فرمایا خاوند کی ناشکری اور احسان کی ناقدری کی وجہ سے، اگر تم عمر بھر بھی ان میں سے کسی ایک سے بھلائی کرو پھر وہ کوئی ناپسندیدہ بات دیکھے تو کہتی ہے میں نے تجھ سے کبھی خیر نہیں دیکھی۔ ایک اور روایت میں (کَفَفْتَ) کے بجائے تَکَعْکَعْتَکے الفاظ ہیں۔

حضرت ابن عباسؓ نبیﷺ کے بارہ میں روایت کرتے ہیں کہ آپؐ نے کسوف کی نماز پڑھائی۔ آپؐ نے قر اءت کی پھر رکوع کیا پھر قر اءت کی پھر رکوع کیا پھر قر اءت کی پھر رکوع کیا پھر قر اءت کی پھر رکوع کیا پھر آپؐ نے سجدہ کیا اور راوی کہتے ہیں اور دوسری (رکعت بھی) اس جیسی تھی۔

حضرت عبد اللہؓ بن عمرو بن العاص کہتے ہیں کہ جب رسول اللہﷺ کے زمانہ میں سورج گرہن ہواتو اعلان کیا گیا کہ نماز باجماعت ہونے والی ہے آپؐ نے ایک رکعت میں دو رکوع کئے پھر آپؐ کھڑے ہوئے اور دوسری رکعت میں دو رکوع کئے پھر سورج سے اندھیرا دور ہوگیا۔ حضرت عائشہؓ کہتی ہیں کہ میں نے کبھی ایسا رکوع نہیں کیا نہ کبھی ایسا سجدہ کیاجو اس سے زیادہ لمبا ہو۔

حضرت ابو مسعودؓ سے روایت ہے رسول اللہﷺ نے فرمایا یقینا سورج اور چاند انسانوں میں سے کسی کی موت کے لئے نہیں گہناتے بلکہ وہ اللہ کے نشانات میں سے دو نشان ہیں۔ پس جب تم اس کو دیکھو تو اٹھو اور نماز پڑھو۔ سفیان اور وکیع کی روایت میں ہے جب ابراہیمؓ فوت ہوئے تو سورج گرہن ہوا لوگوں نے کہا کہ یہ ابراہیمؓ کی موت کی وجہ سے گہنایا ہے۔

حضرت ابو موسیٰ ؓ کہتے ہیں کہ نبیﷺ کے عہد میں سورج گرہن ہوا توآپؐ فکر مندہوکر کھڑے ہوگئے مبادا کہیں یہ ’’وہ گھڑی‘‘ ہو آپؐ مسجد تشریف لائے اور نماز پڑھانے کے لئے کھڑے ہوئے جس کا قیام، رکوع اور سجدہ بہت زیادہ لمبا تھا کہ میں نے کبھی آپؐ کو نماز میں ایسا کرتے نہیں دیکھا۔ پھر آپؐ نے فرمایا یہ نشانات جنہیں اللہ بھیجتا ہے کسی کی زندگی اور موت کی وجہ سے نہیں ہوتے بلکہ اللہ انہیں بھیجتا ہے (اور)ان کے ذریعہ اپنے بندوں کوڈراتا ہے۔ پس جب تم ان(نشانات) میں سے کچھ دیکھو تو اس کے ذکر دعا اور استغفار میں ڈرتے ڈرتے لگ جاؤ۔