Ahadith

حضرت عمرانؓ بن حُصین سے روایت ہے کہ یعلی بن مُنْیَہ یا ابن اُمَیَّہ ایک شخص سے لڑ پڑا۔ اُن میں سے ایک نے دوسرے (کے ہاتھ پر) کاٹا۔ اس نے اس کے منہ سے اپنا ہاتھ کھینچا تو اس کا اگلا دانت ٹوٹ گیا۔ راوی ابن مثنیٰ کہتے ہیں کہ اس کے اگلے دو دانت ٹوٹ گئے وہ دونوں نبی ﷺ کے پاس جھگڑا لے کر گئے۔ آپؐ نے فرمایا کیا تم میں سے ایک شخص اس طرح کاٹتا ہے جیسا کہ ایک سانڈ کاٹتا ہے! اس کی کوئی دیت نہیں ہے۔

حضرت عمرانؓ بن حصین سے روایت ہے کہ ایک شخص نے دوسرے شخص کے بازو پر کاٹ لیا۔ اس نے اسے کھینچا تو پہلے کا اگلا دانت گر گیا۔ معاملہ نبیﷺ کے پاس پیش ہوا۔ آپؐ نے اس کی دیت کو باطل قرار دیا اور فرمایا کیا تم چاہتے تھے کہ اس کا گوشت کھا جاؤ!

حضرت صفوان بن یعلیؓ سے روایت ہے کہ حضرت یعلیؓ بن منیہ کے مزدور نے کسی شخص کا بازو کاٹ کھایا۔ اس نے (اپنا بازو) کھینچا تو اس (مزدور کا) اگلا دانت گر گیا۔ معاملہ نبیﷺ کی خدمت میں پیش ہوا۔ آپؐ نے اس کی دیت باطل قرار دے دی اور فرمایا تم یہ چاہتے تھے کہ تم اس (کے بازو) کو چباؤ جیسا کہ سانڈ چباتا ہے۔

حضرت عمرانؓ بن حصین سے روایت ہے کہ ایک شخص نے دوسرے شخص کا ہاتھ کاٹ لیا۔ اس نے اپنا ہاتھ کھینچا تو اس (شخص) کا اگلا دانت یا اگلے دو دانت گر گئے اس نے نبیﷺ سے مدد چاہی رسول اللہﷺ نے فرمایا تم مجھے کیا کہتے ہو تم مجھے یہ کہتے ہو کہ میں اسے حکم دوں کہ وہ اپنا ہاتھ تمہارے منہ میں چھوڑ دے تاکہ تم اسے ایسے چباؤ جیسے نر اونٹ چباتا ہے۔ تم اپنا ہاتھ اس کے آگے رکھو تاکہ وہ اسے چبائے پھر تم اسے کھینچ لو۔

حضرت صفوان بن یعلیؓ بن منیہ اپنے باپ سے روایت کرتے ہیں انہوں نے کہا کہ نبیﷺ کے پاس ایک شخص آیا۔ اس نے ایک شخص کا ہاتھ کاٹ لیا تھا۔ اس نے اپنا ہاتھ کھینچا تو اس کے اگلے دو دانت گر گئے یعنی (اس شخص کے) جس نے اُسے کاٹا تھا۔ راوی کہتے ہیں کہ نبیﷺ نے اس کی دیت کو باطل قرار دیا اور فرمایا تم چاہتے تھے کہ تم اسے چباؤ جیسا کہ نرا اونٹ چباتا ہے۔

حضرت صفوان بن یعلیؓ بن امیہ اپنے باپ سے بیان کرتے ہیں انہوں نے کہا کہ میں نبیﷺ کے ساتھ غزوئہ تبوک میں شامل ہوا۔ راوی کہتے ہیں یعلیؓ کہتے تھے یہ غزوہ میرے نزدیک میرے پختہ ترین اعمال میں سے ہے۔ یعلیؓ کہتے ہیں میرا ایک مزدور تھا۔ اس کی ایک شخص سے لڑائی ہوگئی اور ان میں سے ایک نے دوسرے کا ہاتھ کاٹ لیا۔ راوی کہتے ہیں انہوں نے کہا مجھے صفوان نے بتایا تھا کہ ان دونوں میں سے جس نے دوسرے کا ہاتھ کاٹا تھا تو جس کا ہاتھ کاٹا گیا تھا اس نے اپنا ہاتھ کاٹنے والے کے منہ سے کھینچ لیا اور اس کے اگلے دو دانتوں میں سے ایک دانت باہر نکل آیا۔ وہ دونوں نبیﷺ کے پاس آئے۔ آپؐ نے اس کے دانت کی دیت باطل قرار دی۔

حضرت انسؓ سے روایت ہے کہ حضرت رُبَیّعؓ کی بہن حضرت ام حارثہؓ نے ایک شخص کو زخمی کر دیا۔ وہ نبیﷺ کے پاس جھگڑا لے کر گئے۔ نبیﷺ نے فرمایا قصاص، قصاص۔ حضرت رَبِیعؓ کی ماں نے کہا یا رسولؐ اللہ! کیا فلاں عورت سے قصاص لیا جائے گا اللہ کی قسم! اس سے قصاص نہیں لیا جائے گا نبیﷺ نے فرمایا سبحان اللہ اے امّ ِربیعؓ قصاص اللہ کا قانون ہے۔ اس نے کہا نہیں اللہ کی قسم! اس سے کبھی قصاص نہیں لیا جائے گا۔ راوی کہتے ہیں وہ اسی طرح کہتی رہیں یہانتک کہ دوسرے (فریق کے لوگوں) نے دیت کو قبول کر لیا۔ رسول اللہﷺ نے فرمایا اللہ کے بندوں میں سے ایسے بھی ہوتے ہیں جو اللہ پر اگر قسم کھائیں تو اللہ تعالیٰ ضرور اسے پورا کر دیتا ہے۔

حضرت عبد اللہؓ سے روایت ہے وہ کہتے ہیں کہ رسول اللہﷺ نے فرمایا مسلمان شخص کا خون جو گواہی دیتا ہے کہ اللہ کے سوا کوئی معبود نہیں اور یہ کہ میں اللہ کا رسول ہوں جائز نہیں ہے سوائے تین باتوں میں سے ایک کے۔ شادی شدہ زناکار اور جان کے بدلے جان اور اپنے دین کو چھوڑنے والا جو جماعت سے علیحدگی اختیار کرنے والا ہو۔

حضرت عبد اللہؓ سے روایت ہے وہ کہتے ہیں کہ رسول اللہﷺ ہمارے درمیان کھڑے ہوئے اور فرمایا اس کی قسم جس کے سوا کوئی عبادت کے لائق نہیں۔ ایک مسلمان شخص کا خون جائز نہیں جو گواہی دیتا ہے کہ اللہ کے سوا کوئی عبادت کے لائق نہیں اور یہ کہ میں اللہ کا رسولؐ ہوں سوائے تین افراد کے، اسلام کو چھوڑنے والا جو جماعت سے علیحدگی اختیار کرنے والا ہو اور شادی شدہ زنا کار اور جان کے بدلے جان۔ راوی احمد کو اس میں شک ہے کہ المُفَارِق لِلْجَمَاعَۃِ فرمایا تھا یا المُفَارِق الْجَمَاعَۃَ فرمایا تھا۔ ایک اور روایت میں وَالَّذِي لَا إِلَهَ غَيْرُهُ کے الفاظ نہیں ہیں۔