Ahadith

حضرت عائشہؓ بیان فرماتی ہیں کہ آل محمد ﷺ نے کبھی متواتر دو دن جو کی روٹی سیر ہو کر نہیں کھائی یہاں تک کہ رسول اللہ ﷺ کی وفات ہو گئی۔

حضرت عائشہؓ بیان فرماتی ہیں کہ آل محمد ﷺ نے کبھی تین دن سے زیادہ گندم کی روٹی سیر ہو کر نہیں کھائی۔

حضرت عائشہؓ بیان فرماتی ہیں کہ آل محمدﷺ نے کبھی بھی تین دن گندم کی روٹی سیر ہو کر نہیں کھائی یہاں تک کہ آپؐ رحلت فرما گئے۔

حضرت عائشہؓ بیان فرماتی ہیں کہ آل محمد ﷺ نے متواتر دو دن گندم کی روٹی سیر ہو کر نہیں کھائی ہاں ان دو میں سے ایک (دن) کھجور ہوتی تھی۔

حضرت عائشہؓ بیان فرماتی ہیں کہ حقیقت یہ ہے کہ ہم آل محمدﷺ مہینہ مہینہ آگ نہ جلا پاتے اور صرف کھجور اور پانی پر ہی ہوتے تھے ایک روایت میں آل محمدؐ کے الفاظ نہیں ہیں اور ایک روایت میں یہ اضافہ ہے کہ اِلَّا اَنْ یَأْتِیَنَا اللُّحَیْمُ سوائے اس کے کہ ہمیں تھوڑا سا گوشت (کہیں سے) آجاتا۔

حضرت عائشہؓ فرماتی ہیں کہ رسول اللہﷺ کی وفات ہوئی تو میری پر چھتی پر کوئی ایسی چیز نہ تھی جو جاندار کھا سکے۔ میری پر چھتی پر موجود کچھ جو تھے جس میں سے میں کھاتی رہی یہاں تک کہ بہت عرصہ گذر گیا پھر جب میں نے انہیں ماپا تو وہ جلد ہی ختم ہو گئے۔

عروہ سے روایت ہے کہ حضرت عائشہؓ بیان فرمایا کرتی تھیں کہ اے میرے بھانجے! بخدا ہم پہلی رات کا چاند دیکھتے پھر پہلی رات کا دوسرا چاند دیکھتے پھر پہلی رات کا تیسرا چاند دیکھتے - دو ماہ میں تین چاند دیکھتے - اور رسول اللہﷺ کے گھروں میں آگ نہ جلتی۔ وہ کہتے ہیں میں نے کہا خالہ آپؐ کا کھانا کیا تھا؟ انہوں نے کہا یہ دو چیزیں کھجور اور پانی یا پھر یہ کہ رسول اللہﷺ کے کچھ انصار ہمسائے تھے۔ ان کے جانور تھے۔ وہ رسول اللہﷺ کی خدمت میں ان کا دودھ بھیجا کرتے تھے۔ آپؐ ہمیں وہ پلایا کرتے تھے۔

نبی ﷺ کی زوجہ مطہرہ حضرت عائشہؓ بیان فرماتی ہیں کہ رسول اللہ ﷺ نے کبھی ایک دن میں دو مرتبہ روٹی اور زیتون کا تیل سیر ہوکر نہیں کھایا یہانتک کہ آپؐ کی وفات ہوگئی۔

حضرت عائشہؓ بیان فرماتی ہیں کہ رسول اللہﷺ کی وفات ہوئی تو اس وقت لوگ ان دو عام چیزوں کھجور اور پانی سے سیر ہوتے تھے۔

حضرت عائشہؓ بیان فرماتی ہیں کہ جب ہم ان عام چیزوں یعنی کھجور اور پانی سے سیر ہونے لگ گئے تھے تو رسول اللہﷺ کی وفات ہوگئی۔ ایک روایت میں (قَدْ شَبِعْنَا کی بجائے) مَا شَبِعْنَا کے الفاظ ہیں۔