Ahadith

سالم سے روایت ہے کہ ایک شاعر نے بلال بن عبد اللہ کی تعریف کی اور کہا کہ بلال بن عبد اللہ سب سے بہتر بلال ہے۔ حضرت ابن عمرؓ نے کہا تو نے غلط کہا۔ نہیں، بلکہ رسول اللہ ﷺ کا بلالؓ سب سے بہتر بلالؓ ہے۔

ابو لیلیٰ کندی نے بیان کیا کہ حضرت خبّابؓ، حضرت عمرؓ کے پاس آئے۔ آپؓ (حضرت عمرؓ) نے فرمایا (خبابؓ!) قریب آجائیں، آپ سے زیادہ اس مجلس کا کوئی حقدار نہیں سوائے عمَّارؓ کے۔ حضرت خبّابؓ اپنی پیٹھ پر وہ نشان دکھانے لگے جو مشرکوں کے اذیت دینے کی وجہ سے پڑے تھے۔

حضرت انس بن مالکؓ سے روایت ہے کہ رسول اللہ ﷺ نے فرمایا میری امت میں سے، میری اُمت پر سب سے زیادہ رحم کرنے والے ابوبکرؓ ہیں۔ اللہ کے دین میں ان سب سے زیادہ مضبوط عمرؓ ہیں۔ ان میں سب سے زیادہ حقیقی حیاء والے عثمانؓ ہیں۔ ان میں سے سب سے عمدہ فیصلہ کرنے والے علیؓ بن ابی طالب ہیں۔ ان میں سے سب سے زیادہ اللہ کی کتاب قرآن کو جاننے والے اُبیّ بن کعبؓ ہیں۔ ان میں سے سب سے زیادہ حلال و حرام کو جاننے والے معاذ بن جبلؓ ہیں اور ان میں سے سب سے زیادہ فرائض کو جاننے والے زید بن ثابتؓ ہیں۔ سنو! ہر امت کیلئے ایک امین ہوتا ہے اور اس امت کا امین ابو عبیدہ بن جرّاحؓ ہیں۔

حضرت عبد اللہ بن عمرو ؓ نے بیان کیا کہ میں نے رسول اللہ ﷺ کو فرماتے ہوئے سنا نہ زمین نے اٹھایا ،اور نہ آسمان نے سایہ کیا ،کسی شخص پر، جو گفتگو میں ابو ذر ؓ (غفاری) سے زیادہ سچا ہو۔

حضرت براء بن عازب ؓ نے بیان کیا کہ رسول اللہ ﷺ کو ریشمی کپڑے کا ایک ٹکڑا تحفہ دیا گیا۔ لوگ اسے ہاتھوں میں لینے لگے۔ رسول اللہ ﷺ نے فرمایا کیا تم اس سے تعجب کرتے ہو؟ لوگوں نے عرض کیا جی ہاں یا رسولؐ اللہ! آپؐ نے فرمایا اس کی قسم جس کے ہاتھ میں میری جان ہے جنت میں سعد ؓ بن معاذ کے رومال، اس سے کہیں زیادہ اچھے ہیں۔

حضرت جابرؓ نے بیان کیا کہ رسول اللہﷺ نے فرمایا سعدؓ بن معاذ کی وفات پر خدائے رحمان عزّوجل کا عرش ہِل گیا۔

حضرت جریر بن عبد اللہ بَجلی ؓ نے بیان کیا کہ جب سے مَیں نے اسلام قبول کیا۔ رسول اللہ ﷺ نے مجھے کبھی (ملاقات سے) نہیں روکا اور جب بھی آپؐ نے مجھے دیکھا آپؐ مسکرائے۔ میں نے حضورؐ کی خدمت میں شکایت کی کہ میں گھوڑے پر جم کر نہیں بیٹھ سکتا تو حضورؐ نے میرے سینے پر اپنا دستِ مبارک مارا اور دعا کی اے اللہ ! اسے ثبات بخش اور اسے ہدایت دینے والا اور ہدایت یافتہ بنا دے۔

حضرت رافع بن خدیج ؓ نے بیان کیا کہ جبریل ؑ یا کہا کوئی فرشتہ نبی ﷺ کے پاس آیا اور کہا کہ آپ لوگ اُن کو جو آپ میں سے بدر میں شریک ہوئے کس درجہ میں شمار کرتے ہیں؟ فرمایا وہ ہم میں سب سے بہتر ہیں۔ اس (فرشتے) نے کہا ایسے ہی (ہم میں سے جو بدر میں شریک ہوئے) وہ ہمارے نزدیک سب سے بہتر ملائکہ ہیں۔