Ahadith

مسدد نے ہم سے بیان کیا ، کہا : یحيٰ بن سعید نے مجھے بتایا۔ عبیداللہ سے مروی ہے ۔انہوں نے کہا: سعید مقبری نے ہم سے بیان کیا ۔انہوں نے اپنے باپ سے، ان کے باپ نے حضرت ابوہریرہؓؓ سے روایت کی کہ نبی صلی اللہ علیہ وسلم مسجد میں تشریف لائے۔ اتنے میں ایک شخص آیا اور اس نے نماز پڑھی۔ پھر آیا اور آپؐ کو سلام کیا۔ آپؐ نے اس کے سلام کا جواب دیا اور فرمایا: واپس جائو اور نماز پڑھو۔ کیونکہ تم نے نماز نہیں پڑھی۔ چنانچہ اس نے نماز پڑھی اور پھر آکر نبی صلی اللہ علیہ وسلم کو سلام کیا۔ آپؐ نے فرمایا : واپس جائو اور نماز پڑھو۔ کیونکہ تم نے نماز نہیں پڑھی۔ چنانچہ اس نے نماز پڑھی اور پھر آکر نبی صلی اللہ علیہ وسلم کو سلام کیا۔آپ نے فرمایا : واپس جائو اور نماز پڑھو۔ کیونکہ تم نے نماز نہیں پڑھی۔ آپؐ نے اس طرح تین بار اسے لوٹایا۔ تو اس نے کہا: قسم ہے اس ذات کی جس نے آپؐ کو حق کے ساتھ بھیجا ہے۔ میں اس سے اچھی نماز نہیںپڑھ سکتا۔ آپؐ مجھے سکھائیں۔ اس پر آپؐ نے فرمایا: جب تم نماز کے لئے کھڑے ہو تو اللہ اکبر کہو۔ پھر قرآن سے جو کچھ تمہیں میسر ہوپڑھو۔ پھر رکوع کرو یہاں تک کہ تمہیں رکوع میں اطمینان ہوجائے۔ پھر سر اٹھائویہاں تک کہ سیدھے کھڑے ہوجائو۔ پھر سجدہ کرو یہاں تک کہ سجدہ میں تمہیں اطمینان ہوجائے۔ پھرسر اٹھائویہاں تک کہ تم اطمینان سے بیٹھ جائو۔ پھر سجدہ کرو یہاں تک کہ سجدہ میں تمہیں اطمینان ہوجائے۔ پھر اسی طرح ساری نماز میں کرو۔

عبداللہ بن مسلمہ نے ہمیں بتایا۔ انہوں نے مالک سے، مالک نے نعیم بن عبداللہ مجمر سے، نعیم نے علی بن یحيٰ بن خلاد زُرَقی سے ۔ انہوں نے اپنے باپ سے ، ان کے باپ نے حضرت رفاعہ بن رافع زرقی ؓ سے روایت کی کہ انہوں نے کہا: ہم ایک دن نبی صلی اللہ علیہ وسلم کے پیچھے نماز پڑھ رہے تھے۔ جب آپؐ نے رکوع سے سر اٹھایا تو آپؐ نے فرمایا: سَمِعَ اللّٰہُ لِمَنْْ حَمِدَہٗ ایک شخص (حضرت رفاعہؓ) نے آپ کے پیچھے سے کہا: رَبَّنَا وَلَکَ الْحَمْدُ حَمْدًا کَثِیْرًا طَیِّبًا مُّبَارَکًا فِیْہِ۔ جب آپ ؐ نماز سے فارغ ہوئے تو آپؐ نے فرمایا: بولنے والا کون ہے ؟ اس نے کہا: میں ۔ آپؐ نے فرمایا: میں نے تیس سے زیادہ فرشتوں کو دیکھا کہ وہ ان الفاظ کی طرف لپک رہے تھے کہ کون پہلے انہیں لکھتا ہے۔