Ahadith

سلیمان بن حرب نے ہم سے بیان کیا کہ حماد(بن زید) نے ہمیں بتایا۔ انہوں نے عبیداللہ بن ابی بکر بن انس سے، عبیداللہ نے حضرت انس بن مالک رضی اللہ عنہ سے، حضرت انسؓ نے نبی صلی اللہ علیہ وسلم سے روایت کی۔آپؐ نے فرمایا: اللہ نے رحم پر ایک فرشتہ مقرر کیا ہے اور وہ کہتا جاتا ہے۔ اے ربّ ! اب یہ نطفہ ہے۔ اے ربّ! اب یہ علقہ ہے ۔ اے ربّ ! اب یہ مضغہ ہے اور اگر اللہ نے چاہا کہ اس کی پیدائش کو مکمل کرے تو وہ فرشتہ پوچھتا ہے ۔ اے میرے ربّ ! مرد ہو یا عورت، آیا بدبخت ہو یا نیک بخت اور اس کا رزق کیا ہو اور عمر کیا ہو تو اسی طرح اس کی ماں کے پیٹ میں لکھ دیا جاتا ہے۔

آدم نے ہم سے بیان کیا کہ شعبہ نے ہمیں بتایا۔ یزید رِشک نے ہم سے بیان کیا۔ یزید نے کہا: میں نے مطرف بن عبداللہ بن شخیر سے سنا۔ وہ حضرت عمران بن حصینؓ سے بیان کرتے تھے کہ وہ کہتے تھے: ایک شخص نے کہا: یا رسول اللہ ! کیا جنتیوں کو جہنمیوں سے پہچان لیا جائے گا؟ آپؐ نے فرمایا: ہاں۔ اس نے کہا: پھر عمل کرنے والے کیوں عمل کرتے ہیں؟ آپؐ نے فرمایا: ہر ایک اس کے موافق کام کر رہا ہے جس کے لئے وہ پیدا کیا گیا، یا (فرمایا:) جس کے لئے اسے توفیق دی جاتی ہے۔

مالک بن اسماعیل نے ہم سے بیان کیا کہ اسرائیل نے ہمیں بتایا۔ انہوں نے عاصم (بن سلیمان) سے، عاصم نے ابوعثمان سے،ابوعثمان نے حضرت اُسامہؓ سے روایت کی۔ اُنہوں نے کہا: میں نبی صلی اللہ علیہ وسلم کے پاس تھا کہ اتنے میں آپؐ کے پاس آپؐ کی ایک بیٹی کا قاصد آیاکہ اُن کا بیٹا نزع کی حالت میں ہے۔اور اس وقت آپؐ کے پاس حضرت سعد (بن عبادہؓ)، حضرت اُبَیّ بن کعبؓ اور حضرت معاذ (بن جبلؓ)بیٹھے ہوئے تھے تو آپؐ نے ان کو کہلا بھیجا ۔ اللہ ہی کے لئے ہے جو وہ لے اور اللہ ہی کے لئے ہے جو وہ دے۔ ہر چیز کی ایک مدت مقرر ہے اس لئے چاہیے کہ وہ صبر کرے اور اللہ کی رضا مندی حاصل کرے۔

حبان بن موسیٰ نے ہم سے بیان کیا کہ عبداللہ (بن مبارک) نے ہمیں بتایا۔ یونس (بن یزید) نے ہمیں خبر دی۔ یونس نے زہری سے، زہری نے کہا: مجھے عبداللہ بن محیریز جمحی نے بتایا کہ حضرت ابوسعید خدریؓ نے انہیں بتایا کہ وہ ایک بار نبی صلی اللہ علیہ وسلم کے پاس بیٹھے ہوئے تھے اتنے میں ایک انصاری شخص آیا اور کہنے لگا: یا رسول اللہ ! ہمیں قیدی (عورتیں)ملتی ہیں اور ہم مال پسند کرتے ہیں تو آپؐ کی عزل کرنے کے متعلق کیا رائے ہے؟ رسول اللہ صلی اللہ علیہ وسلم نے فرمایا: کیا تم ایسا کرتے ہو ؟ اگر تم ایسا نہ کرو تب بھی تمہیں کچھ حرج نہیں۔ کیونکہ جو جان بھی اللہ نے مقرر کردی ہے کہ وہ پیدا ہو تو وہ ضرور ہوکر رہے گی۔