Ahadith

ابو نعمان محمد بن فضل نے ہم سے بیان کیا کہ جریربن حازم نے ہمیں بتایا۔ حسن (بصری) نے ہم سے بیان کیا کہ حضرت عبدالرحمٰن بن سَمُرہؓ نے ہمیں بتایا۔ انہوں نے کہا: نبی صلی اللہ علیہ وسلم نے فرمایا: عبدالرحمٰن بن سَمُرہ! حکومت کی درخواست نہ کرو۔ اگر مانگنے پر تمہیں وہ دی گئی تو تمہیں اُس کا ذمہ دار ٹھہرایا جائے گا اور اگر بن مانگے تمہیں وہ دی جائے تو پھر تمہاری اس میں مدد کی جائے گی اور اگر تم کوئی قسم کھاؤ اور پھر اس کے سوا کسی دوسری (بات) کو اُس سے بہتر سمجھو تو اپنی قسم کا کفارہ دو اور وہ کروجو بہتر ہے۔

ابونعمان نے ہم سے بیان کیا کہ حماد بن زید نے ہمیں بتایا۔ انہوں نے غیلان بن جریر سے، غیلان نے ابوبُردہ سے، ابوبُردہ نے اپنے باپ سے روایت کی۔ انہوں نے کہا: میں اشعریوں کی ایک جماعت کے ساتھ نبی صلی اللہ علیہ وسلم کے پاس آیا کہ آپؐ سے سواری مانگوں۔ آپؐ نے فرمایا: اللہ کی قسم میں تمہیں سواری نہیں دوں گا اور میرے پاس کوئی سواری نہیں جس پر تمہیں سوار کروں۔ کہتے تھے کہ ہم جب تک اللہ نے چاہا کہ ٹھہرے رہیں ہم ٹھہرے رہے۔ اس کے بعد آپؐ کے پاس تین اونٹ جوعمدہ سفید کہانوں والے تھے، لائے گئے تو آپؐ نے ہمیں ان پر سوار کیا ۔ جب ہم چلے ہم نے کہا یا ہم میں سے کسی نے کہا: اللہ کی قسم ہمیں کبھی برکت نہ دی جائے گی۔ ہم نبی صلی اللہ علیہ وسلم کے پاس آپؐ سے سواری مانگنے آئے تو آپؐ نے قسم کھائی کہ آپؐ ہمیں سواری نہیں دیں گے، پھر آپؐ نے ہمیں سواری دی۔ آؤ ہم نبی صلی اللہ علیہ وسلم کے پاس واپس جائیں اور آپؐ کو یاد دلائیں۔ چنانچہ ہم آپؐ کے پاس آئے تو آپؐ فرمانے لگے: میں نے تمہیں سواری نہیں دی بلکہ اللہ نے تمہیں سواری دی اور بخدا، اللہ نے چاہا تو میں کبھی قسم کھاؤں گا پھر اس کے علاوہ دوسری کو اس سے بہتر سمجھوں گا تو ضرور ہی اپنی قسم کا کفارہ ادا کروں گا اور وہ بات کروں گا جو بہتر ہو یا (فرمایا) جو بہتر ہو وہ کروں گا اور اپنی قسم کا کفارہ دے دوں گا۔

قتیبہ بن سعید نے ہم سے بیان کیا۔ انہوں نے اسماعیل بن جعفر سے، اسماعیل نے عبداللہ بن دینار سے، عبداللہ نے حضرت ابن عمر رضی اللہ عنہما سے روایت کی۔ انہوں نے کہا: رسول اللہ صلی اللہ علیہ وسلم نے ایک دستۂ فوج بھیجا اور اُن پر حضرت اُسامہ بن زیدؓ کو امیر مقرر فرمایا تو بعض لوگوں نے ان کی امارت پر اعتراض کیا۔ رسول اللہ صلی اللہ علیہ وسلم کھڑے ہو گئے، فرمایا: اگر تم اس کی امارت پر اعتراض کرتے ہو تو تم اس سے پہلے اس کے باپ کی امارت پر بھی اعتراض کیا کرتے تھے اور اللہ کی قسم وہ بھی امارت کے یقیناً لائق تھا اور وہ ان لوگوں میں سے تھا جو مجھے بہت ہی پیارے ہیں اور یہ بھی اس کے بعد انہی لوگوں میں سے ہے جو مجھے بہت ہی پیارے ہیں۔