Ahadith

حضرت ابو سعید خدریؓ سے روایت ہے وہ کہتے ہیں ایک سفر میں ہم نبیﷺ کے ساتھ تھے کہ ایک شخص اپنی اونٹنی پر سوار آیا۔ راوی کہتے ہیں اس نے دائیں بائیں دیکھنا شروع کیا۔ رسول اللہﷺ نے فرمایا جس شخص کے پاس زائد سواری ہے وہ اسے دے دے جس کے پاس سواری نہیں ہے اور جس کے پاس زائد کھانا ہے، وہ اسے دے دے جس کے پاس کھانا نہیں ہے۔ راوی کہتے ہیں آپؐ نے اموال کی بہت سی اقسام کا ذکر فرمایا یہانتک کہ ہم نے خیال کیا کہ ہم میں سے کسی کا زائد مال پر کوئی حق نہیں ہے۔

ایاس بن سلمہ اپنے والد سے روایت کرتے ہیں وہ کہتے ہیں ہم رسول اللہﷺ کے ساتھ ایک غزوئہ کے لئے نکلے تو ہمیں (کھانے پینے کی) تکلیف سے دوچار ہونا پڑا یہانتک کہ ہم نے اپنی کچھ سواری کے جانور ذبح کرنے کا ارادہ کیا تو اللہ کے نبیﷺ نے ارشاد فرمایا اور ہم نے اپنے توشہ دان ایک جگہ جمع کرلئے اور ہم نے اس کے لئے چمڑے کا دستر خوان بچھایا اور لوگوں کے توشے اس چمڑے کے دسترخوان پر اکٹھے ہوگئے۔ راوی کہتے ہیں میں نے اونچا ہوکر دیکھا تاکہ اندازہ کروں کہ کتنا ہے؟ میں نے اندازہ کیا تو وہ ایک بیٹھی ہوئی بکری کے برابر تھا اور ہم چودہ سو افراد تھے۔ راوی کہتے ہیں ہم نے کھایا یہانتک کہ ہم سب سیر ہو گئے پھر اپنے اپنے تھیلے بھر لئے۔ اس کے بعد اللہ کے نبیﷺ نے فرمایا کیا وضوء کے لئے پانی ہے؟ راوی کہتے ہیں ایک شخص اپنی چھاگل لایا جس میں تھوڑا سا پانی تھا اور اسے ایک پیالہ میں ڈالا اور ہم سب نے وضوء کیا چودہ سو آدمیوں نے پانی کا خوب استعمال کیا۔ راوی کہتے ہیں اس کے بعد پھر آٹھ آدمی آئے۔ انہوں نے کہا کیا وضوء کے لئے پانی ہے؟ تو رسول اللہﷺ نے فرمایا پانی ختم ہو چکا ہے۔