Ahadith

ابو بکر بن عبد اللہ بن قیس اپنے والد سے روایت کرتے ہیں کہ نبی ﷺ نے فرمایا مومن کے لئے جنت میں ایک خیمہ ہوگا جو ایک خولدار موتی سے بنا ہوا ہوگا جس کی لمبائی ساٹھ میل ہوگی مومن کے لئے اس میں اہل و عیال ہوں گے۔ مومن ان کے پاس جائے گا اور وہ (خیمہ کے مختلف حصوں میں رہنے والے) ایک دوسرے کو نظر نہیں آئیں گے۔

ابو بکر بن عبد اللہ بن قیس اپنے والد سے روایت کرتے ہیں کہ رسول اللہﷺ نے فرمایا جنت میں ایک خیمہ ہوگا جو ایک خولدار موتی سے بنا ہوگا جس کی وسعت ساٹھ میل ہوگی اس کے ہر کونے میں اہل (وعیال) ہوں گے جو دوسروں کو نظر نہیں آئیں گے، مومن ان پر چکر لگائے گا۔

ابو بکر بن ابی موسیٰ بن قیس اپنے والد سے روایت کرتے ہیں کہ نبیﷺ نے فرمایا خیمہ ایک موتی ہوگا جس کی اونچائی 60 میل ہوگی۔ اس کے ہر کونے میں مومن کے اہل ہوں گے جنہیں دوسرے دیکھ نہ سکیں گے۔

حضرت ابو ہریرہؓ بیان کرتے ہیں کہ رسول اللہﷺ نے فرمایا سَیْحون اور جَیْحون اور فرات اور نیل، یہ جنت کی نہروں میں سے ہیں۔

حضرت ابو ہریرہؓ سے روایت ہے کہ نبی ﷺ نے فرمایا کہ جنت میں کچھ ایسی قومیں داخل ہوں گی جن کے دل پرندوں کے دلوں کی طرح ہوں گے۔

حضرت ابو ہریرہؓ سے روایت ہے کہ رسول اللہﷺ نے فرمایا کہ اللہ بزرگ و برتر نے آدم کو اپنی صورت پر پیدا کیا۔ اس کا قد ساٹھ ہاتھ تھا۔ جب اس نے اسے پیدا کیا تو فرمایا جاؤ اور اس گروہ کو سلام کرو اور وہ فرشتوں کا گروہ تھا جو بیٹھا ہوا تھا اور سنو کہ وہ تمہیں کیا جواب دیتے ہیں کیونکہ وہی تیرا اور تیری ذریت کا سلام ہوگا۔ فرمایا وہ گئے اور کہا السلام علیکم۔ انہوں نے کہا السلام علیک ورحمۃ اللہ۔ انہوں نے اس کے لئے ورحمۃ اللہ کا اضافہ کیا۔ آپؐ نے فرمایا ہر وہ شخص جو جنت میں داخل ہوگا وہ آدم کی صورت پر داخل ہوگا اور اس کا قد ساٹھ ہاتھ ہوگا۔ اس کے بعد اب تک مخلوق چھوٹی ہوتی گئی۔

حضرت عبد اللہؓ (بن مسعود) سے روایت ہے وہ کہتے ہیں رسول اللہ ﷺ نے فرمایا اس دن جہنم کو لایا جائے گا اس کی ستر ہزار لگامیں ہوں گی ہر لگام کے ساتھ ستر ہزار فرشتے ہوں گے جو اسے کھینچ رہے ہوں گے۔

حضرت ابو ہریرہؓ سے روایت ہے کہ نبیﷺ نے فرمایا تمہاری یہ آگ جسے ابن آدم جلاتا ہے جہنم کی گرمی کا 70 واں حصہ ہے۔ لوگوں نے عرض کیا اللہ کی قسم یا رسولؐ اللہ ! یقینا یہی کافی تھی۔ آپؐ نے فرمایا وہ تو اس سے انہتر 69 حصے بڑھائی گئی ہے اور اس کا ہر حصہ اس جیسا گرم ہے۔ ایک روایت میں (کُلُّھَا مِثْلُ حَرِّھَا کی بجائے) کُلُّھُنَّ مِثْلُ حَرِّھَا کے الفاظ ہیں۔

حضرت ابو ہریرہؓ سے روایت ہے کہ ہم رسول اللہﷺ کے ساتھ تھے کہ آپؐ نے ایک آواز سُنی جیسے کوئی چیز گِری ہو تو نبیﷺ نے فرمایا تم جانتے ہو کہ یہ کیا ہے؟ وہ کہتے ہیں ہم نے عرض کیا اللہ اور اس کا رسولؐ بہتر جانتے ہیں۔ آپؐ نے فرمایا یہ پتھر ہے اور آگ میں پھینکا گیا تھا ستر سال سے یہ جہنم میں گرتا چلا جا رہا تھا یہانتک کہ وہ اب اس کی تہہ میں پہنچا ہے۔ ایک اور روایت میں (اِنْتَھَی اِلَی قَعْرِھَا کی بجائے) وَقَعَ فِیْ أَسْفَلِھَا فَسَمِعْتُمْ وَجْبَتَھَا کے الفاظ ہیں یعنی وہ اب سب سے نیچے کی تہہ میں پہنچا ہے اور تم نے اس کے گرنے کی آواز سُنی ہے۔