Ahadith

حضرت ابو ہریرہؓ سے روایت ہے وہ کہتے ہیں رسول اللہﷺ نے فرمایا نہ کوئی فرع ہے اور نہ عتیرہ ہے۔ ابن رافع نے اپنی روایت میں یہ بات زائد بیان کی کہ فرع پہلا بچہ ہے جسے مشرک ذبح کیا کرتے تھے۔

حضرت ام سلمہؓ سے روایت ہے کہ نبیﷺ نے فرمایا جب تم ذی الحجہ کا ہلال دیکھو اور تم میں سے کسی کا ارادہ قربانی کرنے کا ہو تو وہ اپنے بال (کاٹنے) اور نا خن (تراشنے) سے رکا رہے۔

عمر بن مسلم بن عمار بن اکیمہ لیثی سے روایت ہے وہ کہتے ہیں میں نے سعید بن مسیّب کو کہتے سنا کہ میں نے نبیﷺ کی زوجہ مطہرہ حضرت ام سلمہؓ کو کہتے ہوئے سنا کہ رسول اللہﷺ نے فرمایا جس شخص کے پاس قربانی کا جانور ہو جسے وہ قربان کرنا چاہتا ہے تو جب ذی الحجہ کی پہلی رات کا چاندنکل آئے تو جب تک وہ قربانی نہ کرلے اپنے بال اور ناخن ہر گز نہ کاٹے۔ عمرو بن مسلم بن عمار بن لیثی نے بیان کیا کہ ہم قربانیوں سے کچھ پہلے حمام میں تھے بعض لوگوں نے بال صاف کئے۔ حمام کے بعض لوگوں نے کہا کہ سعید بن مسیب اسے ناپسند کرتے ہیں یا کہا اس سے منع کرتے ہیں (راوی کہتے ہیں ) میں سعید بن مسیّب سے ملا اور ان سے اس بات کا ذکر کیا۔ انہوں نے کہا اے میرے بھتیجے! یہ تو ایسی روایت ہے جسے بھلادیا گیا ہے اور چھوڑدیا گیا۔ مجھے نبیﷺ کی زوجہ مطہرہ حضرت ام سلمہؓ نے بتایا انہوں نے کہا کہ نبیﷺ نے فرمایا۔ ۔ ۔ ۔

ابو طفیل عامر بنؓ واثلہ بیان کرتے ہیں وہ کہتے ہیں کہ میں حضرت علیؓ بن ابی طالب کے پاس تھا کہ آپؓ کے پاس ایک شخص آیا اور کہا کہ نبیﷺ آپؓ سے کیا راز کی باتیں کیاکرتے تھے۔ وہ کہتے ہیں آپؓ ناراض ہوئے اور کہا نبیﷺ مجھ سے کوئی ایسی راز کی بات نہیں کرتے تھے جسے وہ دوسرے لوگوں سے چھپاتے ہوں۔ ہاں مگر آپؐ نے مجھے چار باتیں بتائیں۔ وہ کہتے ہیں پھر اس نے کہا کہ اے امیر المؤ منین !وہ کیا ہیں؟ وہ کہتے ہیں آپؐ نے فرمایا اللہ اس پر لعنت کرے جو اپنے باپ پر لعنت کرے اور اللہ اس پر لعنت کرے جو غیر اللہ کے لئے ذبح کرتا ہے۔ اور اللہ اس پر لعنت کرے جو کسی بدعتی کو پناہ دے اور اللہ لعنت کرے اس پر جو زمین کے نشان کو بدلے۔

ابو طفیلؓ سے روایت ہے وہ کہتے ہیں ہم نے حضرت علیؓ بن ابی طالب سے کہا کہ ہمیں کچھ بتائیں جو رسول اللہﷺ نے آپؐ سے علیحدگی میں کیں۔ انہوں نے کہا مجھے آپؐ نے کوئی ایسی راز کی بات نہیں بتائی جو دوسروں سے چھپائی ہو، ہاں میں نے آپؐ کو فرماتے ہوئے سنا اللہ اس پر لعنت کرے جو غیر اللہ کے لئے ذبح کرتا ہے۔ اور اللہ لعنت کرے اس پر جو کسی بدعتی کوپناہ دیتا ہے۔ اور اللہ لعنت کرے اس پر جو اپنے والدین پر لعنت کرتا ہے۔ اور اللہ لعنت کرے اس پر جو(زمین کے لئے) نشان تبدیل کرتا ہے۔

ابو طفیلؓ سے روایت ہے وہ کہتے ہیں حضرت علیؓ سے سوال کیا گیا کہ کیا رسول اللہﷺ نے آپؓ لوگوں کو کسی بات میں خاص کیا ہے؟ انہوں نے کہا رسول اللہﷺ نے ہمیں کوئی ایسی خاص بات نہیں بتائی جودوسرے سب لوگوں کو عام طور پر نہ بتائی ہو سوائے اس کے کہ جو میری اس تلوار کے میان میں ہے۔ وہ کہتے ہیں پھر انہوں نے صحیفہ نکالا جس میں لکھا ہوا تھا اللہ اس پر لعنت کرے جو غیر اللہ کے لئے ذبح کرتا ہے اور اللہ لعنت کرے اس پر جو زمین کے نشان چوری کرتا ہے۔ اور اللہ لعنت کرے اس پر جو اپنے والد پر لعنت کرتا ہے۔ اور اللہ لعنت کرے اس پر جو کسی بدعتی کوپناہ دیتا ہے۔