Ahadith

حضرت براءؓ سے روایت ہے کہ آخری سورۃ جو مکمل اُتاری گئی سورۃ توبہ ہے اور آخری آیت جو نازل کی گئی آیتِ کلالہ ہے۔ ایک روایت میں تامّہ کی بجائے کاملہ کا لفظ ہے۔

حضرت براءؓ سے روایت ہے انہوں نے کہا کہ آخری آیت جو اتاری گئی یَسْتَفْتُونَک ہے۔

حضرت ابو ہریرہؓ سے روایت ہے کہ رسول اللہﷺ کے پاس کسی فوت شدہ شخص کو لایا جاتا جس پر قرض ہوتا تو آپؐ پوچھتے کیا اس نے اپنے قرضہ کی ادائیگی کے لئے کچھ چھوڑا ہے اگر بتایا جاتا کہ اس نے اتنا چھوڑا ہے جس سے قرض پورا ادا ہو جائے تو آپؐ اس کا جنازہ پڑھتے ورنہ فرماتے تم اپنے ساتھی کا جنازہ پڑھ لو۔ پھر جب اللہ تعالیٰ نے آپؐ کو فتوحات عطا فرمائیں تو آپؐ نے فرمایا میں مومنوں سے ان کی جانوں سے بھی زیادہ قریب ہوں۔ جو شخص فوت ہو اور اس پر قرض ہو تو اس کی ادائیگی میرے ذمہ ہے اور جس نے مال چھوڑا وہ اس کے وارثوں کے لئے ہے۔

حضرت ابو ہریرہؓ سے روایت ہے کہ نبیﷺ نے فرمایا اس کی قسم جس کے ہاتھ میں محمدؐ کی جان ہے رُوئے زمین پر کوئی بھی مومن نہیں مگر میں تمام انسانوں سے اس کے سب سے زیادہ قریب ہوں۔ پس تم میں سے جو کوئی قرض یا چھوٹے بچے چھوڑ جائے میں اس کا ذمہ دار ہوں اور جو کوئی تم میں سے مال چھوڑے تو وہ اس کے رشتہ داروں کا ہے جو بھی ہوں۔

ہمام بن منبہ کہتے ہیں کہ حضرت ابو ہریرہؓ نے نبی ﷺ سے کئی احادیث بیان کیں ان میں سے یہ بھی تھی کہ رسول اللہ ﷺ نے فرمایا میں اللہ کی کتاب میں تمام لوگوں کی نسبت مومنوں کے سب سے زیادہ قریب ہوں۔ پس تم میں سے جو کوئی قرض یا کمزور اولاد چھوڑے تو مجھے بلاؤ میں اس کا ولی ہوں اور تم میں سے جو مال چھوڑے تو اس کا مال اس کے رشتہ داروں کو ملے گا جو بھی ہوں۔

حضرت ابو ہریرہؓ سے روایت ہے کہ نبیﷺ نے فرمایا جس نے مال چھوڑا وہ وارثوں کے لئے ہے اور جس نے (کسی ذمہ داری کا) بوجھ چھوڑا وہ ہمارے ذمہ ہے۔ ایک اور روایت میں (وَمَنْ تَرَکَ کَلًّا فَاِلَیْنَا کی بجائے) وَمَنْ تَرَکَ کَلًّا وَلِیْتُہُ کے الفاظ ہیں۔