Ahadith

حضرت عمر بن خطابؓ فرماتے ہیں کہ رسول اللہﷺ نے فرمایا کہ جس کی نفل عبادت یا اس کا کچھ حصہ سوئے رہنے کی وجہ سے ادا نہ ہو سکا اور پھر اس نے اسے نمازِ فجر اور نمازِ ظہر کے درمیان ادا کر لیا اس کے لئے لکھا جائے گا گویا اس نے اسے رات ہی کو ادا کیا۔

قاسم شیبانی سے روایت ہے کہ حضرت زید بن ارقمؓ نے کچھ لوگوں کو دیکھا جو چاشت کی نماز پڑھ رہے تھے۔ اس پر انہوں نے کہا کیا ان کو پتہ نہیں کہ نماز (چاشت) اس وقت کی بجائے ایک اور وقت افضل ہے۔ یقینا رسول اللہ ﷺ نے فرمایا ہے کہ صلاۃ الاوّابین کا وہ وقت ہے جب اونٹوں کے بچّوں کے پاؤں جلنے لگیں۔

حضرت زید بن ارقمؓ سے روایت ہے وہ کہتے ہیں کہ رسول اللہﷺ اہلِ قُباء کی طرف تشریف لے گئے اور وہ نماز پڑھ رہے تھے۔ آپؐ نے فرمایا صلاۃ الاوابین (اس وقت ہے) جب اونٹ کے بچّوں کے پاؤں جلنے لگیں۔

حضرت ابن عمرؓ سے روایت ہے کہ ایک آدمی نے رسول اللہ ﷺ سے رات کی نماز کے بارہ میں پوچھا۔ رسول اللہ ﷺ نے فرمایا رات کی نماز دو دو (رکعت) ہے۔ پھر جب تم میں سے کسی کو صبح (ہو جانے) کا اندیشہ ہو تو وہ ایک رکعت پڑھے تو وہ اس نماز کو وتر کر دے گی جو اس نے پڑھی ہے۔

سالم اپنے والد سے روایت کرتے ہیں کہ ایک آدمی نے نبی ﷺ سے رات کی نماز کے بارہ میں پوچھا۔ آپؐ نے فرمایا دو دو (رکعت) اور جب تمہیں صبح (ہونے) کا ڈر ہو تو ایک رکعت سے وتر کر لو۔

حضرت عبداللہ بن عمر بن خطابؓ سے روایت ہے وہ کہتے ہیں کہ ایک آدمی کھڑا ہوا اور عرض کیا کہ یا رسولؐ اللہ! رات کی نماز کیسے پڑھنی چاہیے؟ رسول اللہﷺ نے فرمایا رات کی نماز دو دو رکعت ہے۔ اور جب تمہیں صبح (ہونے) کا خیال ہو تو ایک رکعت سے وتر کر لو۔

حضرت عبداللہ بن عمرؓ سے روایت ہے کہ ایک آدمی نے نبی ﷺ سے سوال کیا۔ میں آپؐ کے اور سائل کے درمیان تھا۔ اس نے عرض کیا یا رسولؐ اللہ! رات کی نماز کیسے پڑھنی چاہیے؟ آپؐ نے فرمایا دو دو (رکعت) اور جب تمہیں صبح (ہونے) کا خیال ہو تو ایک رکعت پڑھ لو اور اپنی نماز کے آخر میں وتر ادا کرو۔ پھر کسی شخص نے آپؐ سے شروع سال میں سوال کیا (حضرت ابن عمرؓ کہتے ہیں) اور میں رسول اللہ ﷺ کے قریب اسی جگہ تھا۔ میں نہیں جانتا کہ وہ وہی آدمی تھا یا کوئی اور۔ آپؐ نے اس سے بھی اس جیسی بات فرمائی تھی ایک دوسری روایت میں ثُمَّ سَأَلَہُ رَجُلٌ عَلٰی رَأْسِ الْحَوْلِ اور اس کے بعد کے الفاظ نہیں ہیں۔

حضرت ابن عمرؓ سے روایت ہے کہ نبیﷺ نے فرمایا کہ صبح ہونے سے پہلے پہلے وتر پڑھ لیا کرو۔

حضرت ابن عمرؓ کہتے ہیں جو رات کو نماز پڑھے اسے چاہیے کہ اپنی آخری نماز وتر کرے کیونکہ رسول اللہ ﷺ اس کا ارشاد فرمایا کرتے تھے۔