Ahadith

ایوب بن سلیمان نے ہم سے بیان کیا کہ ابوبکر بن ابی اویس نے ہمیں بتایا۔انہوں نے سلیمان بن بلال سے، سلیمان نے صالح بن کیسان سے روایت کی۔ ابن شہاب نے کہا: حضرت انس بن مالکؓ نے مجھے خبر دی کہ رسول اللہ صلی اللہ علیہ وسلم عصر کی نماز پڑھتے اور اُن مضافات میں جایا کرتے تھے جو مدینہ کی بلندی پر واقع ہیں اور ابھی سورج بلند ہی ہوتا۔ اور لیث نے یونس سے روایت کرتے ہوئے اتنا بڑھایا اور یہ بلندی پر واقع گاؤں چار یا تین میل دور ہیں۔

اسماعیل نے ہم سے بیان کیا کہ مالک نے مجھے بتایا۔ انہوں نے عمرو سے جو مطلب کے غلام تھے، عمرو نے حضرت انس بن مالک رضی اللہ عنہ سے روایت کی کہ رسول اللہ صلی اللہ علیہ وسلم کو اُحد دکھلائی دیا تو آپؐ نے فرمایا: یہ وہ پہاڑہے جو ہم سے محبت رکھتا ہے اور ہم اس سے محبت رکھتے ہیں۔ اے اللہ! ابراہیمؑ نے مکہ کو حرم قرار دیا تھا اور میں مدینہ کے دو پتھریلے کناروں کے درمیان جو جگہ ہے اُس کو حرم قرار دیتا ہوں. (حضرت انس بن مالکؓ کی طرح) حضرت سہلؓ نے بھی اُحد کے متعلق نبی صلی اللہ علیہ وسلم سے یہی روایت کیا۔

عمرو بن علی نے ہم سے بیان کیا کہ عبدالرحمٰن بن مہدی نے ہمیں بتایا۔ مالک نے ہم سے بیان کیا۔ مالک نے خبیب بن عبدالرحمٰن سے، خبیب نے حفص بن عاصم سے، حفص نے حضرت ابوہریرہؓ سے روایت کی۔ انہوں نے کہا: رسول اللہ صلی اللہ علیہ وسلم نے فرمایا: میرے گھر اور منبر کے درمیان جنت کے باغات میں سے ایک باغ ہے اور میرا منبر میرے حوض پر ہے۔

موسیٰ بن اسماعیل نے ہم سے بیان کیا کہ جویریہ نے ہمیں بتایا۔ انہوں نے نافع سے، نافع نے حضرت عبداللہ (بن عمرؓ) سے روایت کی۔ انہوں نے کہا: نبی صلی اللہ علیہ وسلم نے گھڑدوڑ کرائی ۔ وہ گھوڑے جو کہ گھڑ دوڑ کے لئے تیار کئے گئے تھے اُن کو چھوڑا گیا اور ان کی دوڑ حفیاء سے ثنیۃ الوداع تک تھی اور جو تیار نہیں کئے گئے تھے اُن کی دوڑ ثنیۃ الوداع سے بنوزُریق کی مسجد تک تھی اور حضرت عبداللہؓ بھی ان لوگوں میں سے تھے جنہوں نے گھوڑے دوڑائے۔

قتیبہ (بن سعید) نے ہم سے بیان کیا۔ انہوں نے لیث سے، لیث نے نافع سے، نافع نے حضرت ابن عمرؓ سے روایت کی۔ اور اسحاق نے ہم سے بیان کیا کہ عیسیٰ اور ابن ادریس اور ابن ابی غنیہ نے ہمیں بتایا۔ ان سب نے ابوحیان سے، ابوحیان نے شعبی سے، شعبی نے حضرت ابن عمر رضی اللہ عنہما سے روایت کی۔ انہوں نے کہا: میں نے حضرت عمرؓ سے سنا جبکہ وہ نبی صلی اللہ علیہ وسلم کے منبر پر کھڑے تھے۔