Ahadith

عبید بن اسماعیل نے مجھ سے بیان کیا کہ ابواسامہ نے ہمیں بتایا۔ انہوں نے ہشام (بن عروہ) سے، ہشام نے اپنے باپ سے، ان کے باپ نے حضرت عائشہ رضی اللہ عنہا سے روایت کی کہ انہوں نے حضرت اسماءؓ سے ہار لیا تھا اور وہ ضائع ہوگیا۔ رسول اللہ صلی اللہ علیہ وسلم نے اپنے صحابہ میں سے کچھ لوگوں کو اس کی تلاش میں بھیجا اور انہیں نماز کا وقت آگیا اور انہوں نے بغیر وضو ہی نماز پڑھ لی۔ جب وہ نبی صلی اللہ علیہ وسلم کے پاس آئے تو انہوں نے آپؐ سے اس کا شکوہ کیا۔ تب تیمم کی آیت نازل ہوئی۔ اور حضرت اسید بن حضیرؓ (حضرت عائشہؓ سے) کہنے لگے: اللہ آپؓ کو بہتر بدلہ دے۔ کیونکہ اللہ کی قسم! آپؓ سے کبھی کوئی حادثہ پیش نہیں آیا مگر اللہ نے آپؓ کے لئے اس سے نکلنے کی کوئی نہ کوئی صورت ضرور پیدا کردی اور مسلمانوں کے لئے اس میں برکت ڈال دی۔

سعد بن حفص نے ہم سے بیان کیا کہ شیبان (بن عبدالرحمٰن) نے ہمیں بتایا۔ انہوں نے منصور (بن معتمر) سے، منصور نے سالم بن ابی جعد سے، سالم نے کریب سے، کریب نے حضرت ابن عباسؓ سے روایت کرتے ہوئے کہا: نبی صلی اللہ علیہ وسلم نے فرمایا: اگران میں سے کوئی جب وہ اپنی بیوی سے مباشرت کرنے لگے کہے: اللہ کے نام سے۔ اے اللہ! مجھ سے شیطان کو دُور رکھیو اور شیطان کو جو تم نے ہمیں دیا ہے اس سے دور رکھیو، تو پھر اس دعا کی وجہ سے ان دونوں سے ایسا بچہ مقدر ہوگا یا (فرمایا:) ایسا بچہ پیدا ہونے کے لئے فیصلہ کیا جائے گا کہ اس کو شیطان کبھی نقصان نہ پہنچا سکے گا۔

یحيٰ بن بُکَیر نے ہم سے بیان کیا کہ لیث (بن سعد) نے مجھے بتایا۔ انہوں نے عُقَیل سے، عُقَیل نے ابن شہاب سے روایت کی۔ کہتے تھے: مجھے حضرت انس بن مالک رضی اللہ عنہ نے بتایا کہ وہ رسول اللہ صلی اللہ علیہ وسلم کے مدینہ آنے کے وقت دس برس کے تھے اور میری مائیں مجھے نبی صلی اللہ علیہ وسلم کی خدمت میں رہنے کے لئے ہمیشہ کہتی رہتی تھیں اور میں نے آپؐ کی دس سال خدمت کی اور نبی صلی اللہ علیہ وسلم اس وقت فوت ہوئے جب میں بیس سال کا تھا اور میں حجاب کے متعلق جب اس کا حکم نازل کیا گیا تمام لوگوں سے زیادہ واقف تھا اور پہلے پہل جو اس کا حکم نازل کیا گیا تو اس وقت جب رسول اللہ صلی اللہ علیہ وسلم حضرت زینب بنت جحشؓ کو اپنے گھر میں لائے۔ صبح جو نبی صلی اللہ علیہ وسلم اُٹھے تو آپؐ حضرت زینبؓ کے دولہا تھے۔آپؐ نے لوگوں کو دعوت دی اور اُنہوں نے کھانا کھایا پھر چلے گئے اور اُن میں سے کچھ لوگ نبی صلی اللہ علیہ وسلم کے پاس بیٹھے رہے اور دیر تک بیٹھے رہے۔ آخر نبی صلی اللہ علیہ وسلم اُٹھ کر باہر چلے گئے اور میں بھی آپؐ کے ساتھ گیا تا کہ وہ بھی چلے جائیں۔ نبی صلی اللہ علیہ وسلم چل پڑے اور میں بھی چلا یہاں تک کہ آپؐ حضرت عائشہؓ کے حجرے کی دہلیز پر آئے ۔ پھر آپؐ نے خیال کیا کہ وہ چلے گئے ہیں اور آپؐ (یہ خیال کرکے) لوٹے اور میں بھی آپؐ کے ساتھ لوٹا۔ جب حضرت زینبؓ کے پاس اندر آئے تو معلوم ہوا کہ ابھی وہ بیٹھے ہوئے ہیں، اُٹھے نہیں۔ یہ معلوم کرکے نبی صلی اللہ علیہ وسلم لوٹ گئے اور میں بھی لوٹا۔ جب آپؐ حضرت عائشہؓ کے حجرے کی دہلیز پر پہنچے اور خیال کیا کہ وہ نکل گئے ہوں گے تو آپؐ لوٹ آئے اور میں بھی آپؐ کے ساتھ لوٹا تو کیا دیکھا کہ وہ نکل گئے تھے۔ تب نبی صلی اللہ علیہ وسلم نے میرے اور اپنے درمیان پردہ ڈال دیا اور حجاب کا حکم نازل کیا گیا۔

علی (بن عبداللہ مدینی) نے ہم سے بیان کیا کہ سفیان (بن عیینہ) نے ہمیں بتایا۔ اُنہوں نے کہا: حمید (طویل) نے مجھے بتایا کہ اُنہوں نے حضرت انس رضی اللہ عنہ سے سنا، وہ کہتے تھے:نبی صلی اللہ علیہ وسلم نے حضرت عبدالرحمٰن بن عوفؓ سے پوچھا اور اُنہوں نے ایک انصاری عورت سے شادی کی تھی، تم نے اُس کو مہر کتنا دیا؟ اُنہوں نے عرض کیا، کھجور کی گٹھلی برابر سونا۔ اور (اِسی سند سے) حُمَید سے مروی ہے، اُنہوں نے کہا کہ میں نے حضرت انسؓ سے سنا وہ کہتے تھے کہ جب صحابؓہ مدینہ میں آئے تو مہاجرین انصار کے پاس اُترے اور حضرت عبدالرحمٰنؓ بن عوف حضرت سعدؓ بن ربیع ؓ کے پاس اترے تھے۔ حضرت سعدؓ نے کہا: میں تمہیں اپنی جائیداد آدھی دئیے دیتا ہوں اور اپنی دونوں بیویوں میں سے ایک سے تمہارے لیے دست بردار ہو جاتا ہوں۔حضرت عبدالرحمٰنؓ نے کہا: اللہ تمہیں تمہاری بیویوں اور تمہارے مال میں برکت دے۔ پھر وہ منڈی کو گئے اور وہاں بیچا اورخریدا اور کچھ پنیر اور گھی نفع میں لیا اور آخر اُنہوں نے شادی کی اور نبی صلی اللہ علیہ وسلم نے اُن سے فرمایا: ولیمہ کرو گو ایک بکری سہی۔