Ahadith

حضرت ابن عمرؓ بیان کرتے ہیں کہ میں نے حضرت عمرؓ بن خطاب کو رسول اللہﷺ کے منبر پر یہ فرماتے سنا اے لوگو ! شراب کی حرمت نازل ہوئی ہے اور یہ پانچ چیزوں سے بنتی ہے انگور، کھجور، شہد گندم اور جوسے اور خمر وہ ہے جو عقل پر پردہ ڈال دے اور تین چیزیں ایسی ہیں اے لوگو جن کے بارہ میں میں نے چاہا کہ رسول اللہﷺ ہمیں پُر زور تاکید کر دیتے، دادا، کلالہ اور سود کے بعض پہلوؤں کے بارہ میں، ہم اس پر عمل کرتے۔ ایک روایت میں ’’الْعِنَبِ‘‘ہے اور ایک میں ’’اَلزَّبِیْبِ‘‘ ہے۔

قیس بن عباد کہتے ہیں کہ میں نے حضرت ابو ذرؓ کو قسم کھاتے ہوئے سنا کہ یہ آیت ھٰذَانِ خَصْمَانِ اخْتَصَمُوْا فِی رَبِّھِمْ ترجمہ: یہ دو جھگڑا کرنے والے جو اپنے رب کے بارہ میں جھگڑتے ہیں۔ ٭ ان لوگوں کے بارہ میں نازل ہوئی جو بدر کے دن نکلے تھے یعنی حضرت حمزہ حضرت علیؓ اور حضرت عبیدہؓ بن حارث اور ربیعہ کے دو بیٹے عتبہ اور شیبہ اور ولید بن عتبہ۔ ایک روایت میں یُقْسِمُ لَنَزَلَتْ ھٰذَانِ خَصْمَانِ کے الفاظ ہیں۔