Ahadith

مصعب بن سعد سے روایت ہے کہ مجھے میرے والدنے بتایا کہ ہم رسول اللہﷺ کے پاس تھے کہ آپؐ نے فرمایاکیا تم میں سے کوئی اس سے عاجز ہے کہ ہر روز ایک ہزار نیکیاں کمائے۔ آپؐ کے پاس بیٹھے ہوئے(لوگوں ) میں سے ایک پوچھنے والے نے آپؐ سے پوچھا کہ ہم میں سے کوئی ایک ہزار نیکیاں کیسے کما سکتا ہے؟ آپؐ نے فرمایا جو سو مرتبہ تسبیح کرتا ہے تو اس کے لئے ایک ہزار نیکی لکھی جاتی ہے یا ایک ہزار خطائیں اس سے دور کر دی جاتی ہیں۔

حضرت ابو ہریرہؓ بیان کرتے ہیں کہ رسول اللہﷺ نے فرمایا جس نے کسی مؤمن سے دنیاکی تکلیفوں میں سے کوئی تکلیف دور کی تو اللہ اس سے قیامت کے دن کی تکلیفوں میں سے تکلیف دور فرمائے گا اور جو کسی تنگ دست سے آسانی کا معاملہ کرے گااللہ اس کے لئے دنیا اور آخرت میں سہولت پیدا کر ے گا اور جو کسی مسلمان کی پردہ پوشی کرے گا اللہ دنیا و آخرت میں اس کی پردہ پوشی کرے گا۔ جب تک کوئی بندہ اپنے بھائی کی مدد میں لگا رہتا ہے اللہ اس بندہ کی مدد کرتا رہتا ہے اور جو حصول علم کی خاطر کسی راستہ پر چلتا ہے اللہ اس کے ذریعہ اس کے لئے جنت کا رستہ آسان کر دیتا ہے اور جو لوگ اللہ کے گھروں میں سے کسی گھر میں اس کی کتاب پڑھنے کے لئے اور آپس میں ایک دوسرے کو سکھانے کے لئے اکٹھے ہوتے ہیں تو ضرور ان پر سکینت اترتی ہے اور رحمت انہیں ڈھانپ لیتی ہے اور فرشتے انہیں اپنے حلقے میں لے لیتے ہیں اور اللہ ان کا ذکر ان میں کرتا ہے جو اس کے پاس ہیں اور جس کا عمل اسے سست کرے اس کانسب اسے تیز نہیں کرے گا۔ ایک روایت میں تنگ دست پر آسانی کرنے کا ذکر نہیں۔

اَغَرّ اَبِی مُسْلِم سے روایت ہے کہ میں حضرت ابوہریرہؓ اور حضرت ابو سعید خدریؓ پر گواہ ہوں کہ ان دونوں نے نبیﷺ کے بارہ میں گواہی دی کہ آپؐ نے فرمایا کہ لوگ اللہ عزوجل کے ذکر کے لئے بیٹھتے ہیں تو فرشتے انہیں حلقہ میں لے لیتے ہیں اور رحمت ان کو ڈھانک لیتی ہے اور اُن پر سکینت اترتی ہے اور اللہ ان کا ذکر ان میں کرتا ہے جو اس کے پاس ہیں۔

حضرت ابو سعید خدریؓ بیان کرتے ہیں کہ امیرمعاویہؓ مسجد میں ایک حلقہ میں آئے اور کہا تم کس لئے بیٹھے ہو؟ انہوں نے کہا کہ ہم بیٹھے ذکر الٰہی کر رہے ہیں۔ امیر معاویہ نے کہا اللہ کی قسم! کیا تمہیں صرف اس بات نے بٹھایا ہے؟ انہوں نے کہا اللہ کی قسم ہم اسی لئے بیٹھے ہیں۔ امیرمعاویہ نے کہا کہ میں نے تہمت کے طور پر تم سے قسم نہیں چاہی۔ رسول اللہﷺ کے حضور میرے جیسا تعلق رکھنے والا کوئی نہیں جو مجھ سے کم آپؐ سے روایت کرنے والا ہو۔ ایک مرتبہ رسول اللہﷺ اپنے صحابہؓ کے ایک حلقہ میں تشریف لائے اور فرمایا کہ تم یہاں کیوں بیٹھے ہو؟ انہوں نے عرض کیا ہم یہاں اس لئے بیٹھے ہیں کہ ہم اللہ کا ذکر کریں اور جو اس نے اسلام کی ہدایت ہمیں دی ہے اور اس کے ذریعہ ہم پر احسان کیا ہے اس پر اس کی حمد کریں۔ آپؐ نے فرمایا اللہ کی قسم کیا تمہیں صرف اس بات ہی نے بٹھایا ہے۔ لوگوں نے عرض کیااللہ کی قسم ہم اسی لئے بیٹھے ہیں۔ آپؐ نے فرمایامیں نے تہمت کے طور پر تم سے قسم نہیں چاہی بلکہ بات یہ ہے کہ جبرائیل میرے پاس آیا اور اس نے مجھے بتایا ہے کہ یقینا اللہ عزوجل فرشتوں میں تم پر فخر کرتا ہے۔

حضرت اَغَرّ المُزَنِیْ جنہیں صحابی ہونے (کا شرف) حاصل تھا سے روایت ہے کہ رسول اللہﷺ نے فرمایا کہ میرے دل کو پیاس لگائی جاتی ہے٭ اور میں ایک دن میں سو مرتبہ استغفار کرتا ہوں۔

ابو بردہ سے روایت ہے کہ میں نے حضرت اَغَرّ ؓ سے جو نبیﷺ کے صحابہؓ میں سے تھے سُنا کہ حضرت ابن عمرؓ بیان کرتے تھے کہ رسول اللہﷺ نے فرمایا اے لوگو! اللہ کے حضور توبہ کرو میں ایک دن میں سو مرتبہ اس کے حضور توبہ کرتا ہوں۔