Ahadith

حضرت ابوہریرہؓ بیان کرتے ہیں کہ رسول اللہﷺ نے فرمایا یقینا اللہ نے فرمایا ہے جب میرا بندہ ایک بالشت میری طرف بڑھتا ہے تو میں ایک ہاتھ(بڑھ کر)اس سے ملتا ہوں اور جب وہ ایک ہاتھ (بڑھ کر) مجھے ملتا ہے تو میں دو ہاتھ اس کی طرف بڑھتا ہوں اور جب وہ دو ہاتھ میری طر ف آتا ہے تو میں اس سے بھی زیادہ تیزی سے اس کی طرف آتا ہوں

حضرت ابوہریرہؓ بیان کرتے ہیں کہ رسول اللہﷺ مکہ کے ایک رستہ پر چلتے ہوئے ایک پہاڑ پر سے گذرے جسے جمدان٭ کہا جاتا ہے تو آپؐ نے فرمایا چلوچلویہ جمدان ہے۔ مفرّدون آگے نکل گئے ہیں۔ انہوں نے عرض کیا یا رسو لؐ اللہ! مفرّدون کون ہیں؟ آپؐ نے فرمایا کثرت سے اللہ کا ذکر کرنے والے اور ذکر کرنے والیا ں۔

حضرت ابوہریرہؓ سے روایت ہے کہ نبیﷺ نے فرمایا اللہ کے نناوے نام ہیں جس نے انہیں یاد رکھا وہ جنت میں داخل ہو گیا۔ یقینا اللہ وتر ہے اور وتر کو پسند کرتا ہے۔ ایک روایت میں (حَفِظَھَاکی بجائے) اَحْصَاھَا کے الفاظ ہیں یعنی جس نے ان کا شمار کیا۔

حضرت ابوہریرہؓ سے روایت ہے کہ نبیﷺ نے فرمایا اللہ کے نناوے نام ہیں _یعنی ایک کم سو_جس نے ان کا شمار کیا وہ جنت میں داخل ہو گیا۔ ایک روایت میں حضرت ابو ہریرہؓ بیان کرتے ہیں کہ نبیﷺ نے فرمایا کہ وہ(اللہ) وتر ہے اور وتر کو پسند کرتا ہے

حضرت انسؓ بیان کرتے ہیں کہ رسول اللہﷺ نے فرمایا جب تم میں سے کوئی دعا کرے تو اسے چاہئے کہ وہ دعا میں عزم سے کام لے اور یہ نہ کہے اے اللہ! اگر تو چاہے تو مجھے عطا فرما کیونکہ اللہ کو کوئی مجبور نہیں کرسکتا۔

حضرت ابوہریرہؓ سے روایت ہے کہ رسول اللہﷺ نے فرمایاجب تم میں سے کوئی دعا کرے تو یہ نہ کہے کہ اے اللہ! اگر تو چاہے تو مجھے بخش دے، بلکہ چاہئے کہ وہ مانگنے میں عزم سے کام لے اور اسے چاہئے کہ وہ رغبت کوبہت بڑھائے کیونکہ اللہ پر کوئی چیز عطا کرنا بڑی بات نہیں۔

حضرت انسؓ بیان کرتے ہیں کہ رسول اللہﷺ نے فرمایا تم میں سے کوئی کسی تکلیف کے اترنے پر موت کی خواہش نہ کرے۔ اگر اسے خواہش کئے بغیر کوئی چارہ نہیں تو یہ کہے اللَّھُمْ اَحْیِنِیْ مَا کَانَتِ الْحَیَاۃُ خَیْرًا لِیْوَتَوَفَّنِیْ اِذَا کَانَتِ الْوَفَاۃُ خَیْرًا لِیْاے اللہ! مجھے اس وقت تک زندہ رکھیو جب تک زندگی میرے لئے بہتر ہے اور مجھے اس وقت وفات دینا جب وفات میرے لئے بہترہو۔ایک اور روایت میں (لِضُرٍّ نَزَلَ بِہِکی بجائے) مِنْ ضُرٍّ اَصَابَہُ کے الفاظ ہیں