Ahadith

حضرت حنظلہؓ بیان کرتے ہیں کہ ہم رسول اللہﷺ کے پاس تھے۔ آپؐ نے ہمیں وعظ فرمایا اور آگ یاد دلائی۔ وہ کہتے ہیں پھر میں گھر گیا تو بچوں سے ہنسنے لگا اور بیوی سے کھیلنے لگا۔ وہ کہتے ہیں پھر میں باہر آیا اور حضرت ابو بکرؓ سے ملا اور ان سے اس کا ذکر کیا توحضرت ابو بکرؓ کہنے لگے کہ جیسا تم ذکر کر رہے ہو۔ میں نے بھی ایسا ہی کیا ہے۔ (حضرت حنظلہؓ کہتے ہیں ) پھر ہم رسول اللہﷺ سے ملے تو میں نے عرض کیا یارسولؐ اللہ!حنظلہ منافق ہو گیا ہے۔ اس پر آپؐ نے فرمایاجانے دو۔ پھر میں نے آپؐ کو وہ بات بتائی اور حضرت ابو بکرؓ نے بھی کہا کہ میں نے بھی ایسے ہی کیا ہے جیسے اس نے کیا ہے۔ اس پر حضورؐ نے فرمایا اے حنظلہؓ ! یہ وقت وقت کی بات ہے۔ اگر تمہارے دل ایسے ہو جائیں جیسے وہ ذکر کے وقت ہوتے ہیں تو فرشتے تم سے مصافحہ کرتے یہانتک کہ وہ رستوں میں تمہیں سلام کرتے۔ ایک اور روایت میں (عَنْ حَنْظَلَۃَ قَالَ کُنَّاعِنْدَ رَسُوْلِ اللَّہِﷺ فَوَعَظَنَا فَذَکَّرَنَا النَّارَ کی بجائے) عَنْ حَنْظَلَۃَ التَّمِیْمِیِّ الْاُسَیِّدِیِّ الْکَاتِبِ قَالَ کُنَّا عَنْدَ النَّبِیِّﷺ فَذَکَّرَنَا الْجَنَّۃَ وَالنَّارَ کے الفاظ ہیں۔

حضرت ابو ہریرہؓ بیان کرتے ہیں کہ میں نے رسول اللہﷺ کو فرماتے ہوئے سنا کہ اللہ نے رحمت کے سو حصے کئے اور ننانوے حصے اپنے پاس روک لئے اور زمین پرایک حصہ اتارا۔ اسی ایک حصہ کی وجہ سے سب مخلوقات آپس میں ایک دوسرے پر رحم کرتی ہے یہانتک کہ ایک چوپایہ بھی اپنے بچہ پر سے اپنا کھُراٹھا لیتا ہے تا کہ اسے تکلیف نہ پہنچائے۔

حضرت ابو ہریرہؓ سے روایت ہے کہ رسول اللہﷺ نے فرمایا کہ اللہ نے سورحمتیں تخلیق کیں۔ ایک(رحمت) اس نے اپنی مخلوق میں رکھ دی اور ایک کم سو اپنے پاس محفوظ رکھ لیں۔

حضرت ابو ہریرہؓ سے روایت ہے کہ نبیﷺ نے فرمایا کہ اللہ کی سو رحمتیں ہیں جن میں سے اس نے صرف ایک رحمت جنّ و انس، چوپائیوں اور کیڑوں مکوڑوں میں اتاری ہے۔ اس کی وجہ سے وہ آپس میں ایک دوسرے سے شفقت کا سلوک کرتے ہیں۔ اسی (رحمت) کی وجہ سے وہ ایک دوسرے پر رحم کرتے ہیں اور اسی (رحمت) کی وجہ سے جنگلی جانور اپنے بچے پر شفقت کرتے ہیں اور اللہ نے ننانوے رحمت کو مؤخّر فرمارکھا ہے جس کے ذریعہ قیامت کے دن وہ اپنے بندوں پر رحم فرمائے گا۔

حضرت سلمان فارسیؓ بیان کرتے ہیں کہ رسول اللہﷺ نے فرمایا کہ یقینا اللہ کی سو رحمتیں ہیں۔ ان میں سے ایک رحمت ہے جس کی وجہ سے مخلوق باہم ایک دوسرے سے نرمی سے پیش آتی ہے۔ (باقی)ننانوے قیامت کے دن کے لئے ہیں۔

حضرت سلمانؓ بیان کرتے ہیں کہ رسول اللہﷺ نے فرمایا جس دن اللہ نے آسمانوں او ر زمین کو پیدا کیا اس وقت سو رحمتیں پیدا کیں۔ ہر رحمت آسمانوں اور زمین کے درمیان تہ بتہ ہے۔ ان میں سے صرف ایک رحمت اس نے زمین میں رکھی۔ اسی ایک (رحمت)کی وجہ سے والدہ اپنے بچہ پر شفقت کرتی ہے اور جنگلی جانور اور پرندے ایک دوسرے پر رحم کرتے ہیں۔ پھر جب قیامت کادن ہوگاوہ ان (99رحمتوں ) کواس رحمت کے ساتھ مکمل کر دے گا۔