Ahadith

حضرت انس بن مالکؓ سے روایت ہے کہ انہوں نے ایک روز رسول اللہﷺ کے ہاتھ میں چاندی کی انگوٹھی دیکھی پھر لوگ بھی چاندی کی انگوٹھیاں بنوا کر پہننے لگے۔ پھر جب نبیﷺ نے اپنی انگوٹھی پھینکی تو لوگوں نے بھی اپنی انگوٹھیاں پھینک دیں۔

ابن شہاب سے روایت ہے کہ حضرت انس بن مالکؓ نے مجھے بتایا کہ رسول اللہﷺ کی انگوٹھی چاندی کی تھی اور اس کا نگینہ حبشہ کا تھا۔

حضرت انسؓ سے روایت ہے کہ انہوں نے اپنے بائیں ہاتھ کی چھوٹی انگلی کی طرف اشارہ کرتے ہوئے کہا کہ نبیﷺ کی انگوٹھی اس (انگلی) میں ہوتی تھی۔

حضرت ابو بردہؓ سے روایت ہے کہ حضرت علیؓ نے فرمایا کہ رسول اللہﷺ نے مجھے منع فرمایا کہ میں اپنی اس انگلی یا اس انگلی میں انگوٹھی پہنوں۔ راوی کہتے ہیں کہ حضرت علیؓ نے اپنی درمیانی اور اس کے ساتھ والی انگلی کی طرف اشارہ کرتے ہوئے فرمایا۔

حضرت جابرؓ سے روایت ہے کہ میں نے ایک غزوہ میں جو ہم نے کیا نبیﷺ کو فرماتے ہوئے سنا کہ تم زیادہ تر جوتیاں پہنے رکھا کرو کیونکہ آدمی جب تک جوتی پہنے ہووہ سوار ہی ہوتا ہے۔

حضرت ابو ہریرہؓ سے روایت ہے کہ رسول اللہﷺ نے فرمایا کہ جب تم میں سے کوئی جوتا پہنے تو دائیں سے ابتداء کرے اور جب اتارے تو بائیں سے ابتداء کرے اور چاہیے کہ یا دونوں جوتے پہنے یا دونوں ہی اتار دے۔

حضرت ابو ہریرہؓ سے روایت ہے کہ رسول اللہﷺ نے فرمایا کہ تم میں سے کوئی ایک جوتی میں نہ چلے یا تو دونوں پہنے یا دونوں اتار دے۔