Ahadith

حضرت ابن عمرر ضی اللہ عنہما سے روایت ہے کہ رسول اللہﷺ نے رمضان میں وصال کے روزے رکھے۔ لوگوں نے بھی وصال کے روزے رکھے۔ آپؐ نے انہیں منع فرمایا۔ عرض کیا گیا آپؐ وصال کے روزے رکھتے ہیں۔ آپؐ نے فرمایا میں تمہارے جیسا نہیں۔ مجھے کھلایا اور پلایا جاتا ہے۔ ایک اور روایت میں فِیْ رَمَضَانَ کے الفاظ نہیں ہیں۔

حضرت ابوہریرہ ر ضی اللہ عنہ کہتے ہیں رسول اللہﷺ نے وصال (کے روزے رکھنے) سے منع فرمایا مسلمانوں میں سے ایک شخص نے کہا یارسولؐ اللہ! آپؐ وصال کے روزے رکھتے ہیں۔ رسول اللہﷺ نے فرمایااور تم میں سے کون میرے جیساہے۔ میں رات گزارتا ہوں میرا رب مجھے کھلاتا اور پلاتا ہے۔ پھرجب وہ وصال کے روزے رکھنے سے باز نہ آئے تو آپؐ نے ان کے ساتھ ایک دن وصال (کا روزہ) رکھا۔ پھر دوسرے دن بھی پھر انہوں نے نیاچاند دیکھ لیا۔ آپؐ نے فرمایا اگر نیا چاندتاخیرسے نکلتا تو میں تمہارے ساتھ مزید وصال کے روزے رکھتا۔ یہ بات آپؐ نے ان کو تنبیہ کرتے ہوئے فرمائی کیونکہ انہوں نے (وصال کے روزوں ) سے نہ رکنے پر اصرار کیا۔

حضرت ابو ہریرہ ضی اللہ عنہ سے روایت ہے وہ کہتے ہیں رسول اللہﷺ نے فرمایا وصال کے روزے رکھنے سے بچو۔ انہوں نے عرض کیا یا رسولؐ اللہ! آپؐ وصال کے روزے رکھتے ہیں۔ آپؐ نے فرمایاتم لوگ اس (بات) میں میری طرح نہیں ہو۔ میں تو رات گزارتا ہوں جبکہ میرا رب مجھے کھلاتا اور پلاتا ہے پس تم اپنے آپ کو اتنے ہی اعمال کا مکلّف بناؤ جن کی تم طاقت رکھتے ہو۔ ایک روایت میں (فَاکْلَفُوْا مِنَ الْاَعْمَالِ مَا تُطِیْقُوْنَکی بجائے) فَاکْلَفُوْا مَا لَکُمْ بِہِ طَاقَۃٌ کے الفاظ ہیں۔ ایک اور روایت میں ہے کہ نبیﷺ نے وصال (کے روزوں ) سے منع فرمایا۔

حضرت انس ر ضی اللہ عنہ سے روایت ہے وہ کہتے ہیں رسول اللہﷺ رمضان میں (نفل) نماز پڑھ رہے تھے۔ میں آکر آپؐ کے پہلو میں کھڑا ہو گیا۔ ایک اور شخص آیا وہ بھی کھڑا ہو گیا یہاں تک ہم ایک جماعت ہو گئے۔ جب نبیﷺ نے محسوس کیا کہ ہم آپؐ کے پیچھے ہیں تو آپؐ نماز کو مختصر کرنے لگے۔ پھر آپؐ اپنے خیمہ میں چلے گئے اور آپؐ نے ایسی نماز پڑھی جو ہمارے پاس نہیں پڑھی تھی(لمبی اور خشوع وخضوع والی) انسؓ کہتے ہیں جب ہم نے صبح کی تو آپؐ کی خدمت میں عرض کیا کہ آج رات آپؐ کو ہمارے بارہ میں پتہ چل گیا تھا؟آپؐ نے فرمایا ہاں، اسی چیز نے مجھے اس پر آمادہ کیا جو میں نے کیا۔ حضرت انسؓ کہتے ہیں پھر رسول اللہﷺ نے وصال کے روزے رکھنے شروع کئے اور یہ مہینہ کا آخر تھا۔ آپؐ کے صحابہؓ میں بھی بعض وصال کے روزے رکھنے لگے تو نبیﷺ نے فرمایا لوگوں کو کیا ہو گیا ہے کہ وہ وصال کے روزے رکھتے ہیں۔ تم میری طرح نہیں ہو۔ سنو !بخدا اگر میرے لئے مہینہ لمبا ہو جاتااور میں اس طرح مسلسل روزے رکھتا توشدت اختیار کرنے والے اپنی شدت چھوڑ جاتے۔

حضرت انس ر ضی اللہ عنہ سے روایت ہے وہ کہتے ہیں رسول اللہﷺ نے ماہِ رمضان کے ابتدا میں وصال کے روزے رکھے تو مسلمانوں میں سے بھی بعض لوگوں نے وصال کے روزے رکھے۔ آپؐ کو یہ بات پہنچی تو آپؐ نے فرمایا اگرہمارے لئے مہینہ لمبا کر دیا جاتا تو ہم ضرور وصال کے روزے رکھتے چلے جاتے تو شدت کرنے والے اپنی شدت چھوڑ دیتے۔ تم میری طرح نہیں ہو یا فرمایا میں تمہاری طرح نہیں ہوں میں تو اس حال میں رہتا ہوں کہ میرا رب مجھے کھلاتا اور پلاتا ہے۔

ضرت عائشہ ر ضی اللہ عنہا سے روایت ہے آپؓ فرماتی ہیں رسول اللہﷺ نے لوگوں پر رحم فرماتے ہوئے انہیں وصال کے روزے رکھنے سے منع فرمایا۔ لوگوں نے کہا آپؐ وصال کے روزے رکھتے ہیں۔ آپؐ نے فرمایا میں تمہاری طرح نہیں ہوں مجھے میرا رب کھلاتا اور پلاتا ہے۔