Ahadith

حضرت ابو ہریرہؓ بیان کرتے ہیں کہ رسول اللہﷺ نے فرمایا کہ اس کی قسم جس کے ہاتھ میں محمدؐ کی جان ہے غِفار اور اسلم اور مزینہ جس کا جہینہ سے تعلق ہے یا فرمایا جہینہ جس کا مزینہ سے تعلق ہے قیامت کے دن اللہ کے نزدیک اسد، طے اور غطفان سے بہتر ہوں گے۔

حضرت ابو ہریرہؓ بیان کرتے ہیں کہ رسول اللہﷺ نے فرمایا اسلم اور غِفار اور مزینہ میں سے کچھ یافرمایا جہینہ اور مزینہ میں سے کچھ اللہ کے نزدیک زیادہ بہتر ہیں۔ راوی کہتے ہیں میرا خیال ہے_آپؐ نے فرمایا قیامت کے دن _اسد غطفان، ہوازن اور تمیم سے۔

عبد الرحمان بن ابی بکرۃ اپنے والد سے روایت کرتے ہیں کہ اقرع بن حابسؓ رسول اللہﷺ کی خدمت میں حاضر ہوئے اور عرض کیا کہ اسلم غِفار اور مزینہ میں سے حاجیوں کا مال چوری کرنے والوں نے آپؐ کی بیعت کرلی ہے اور میرا خیال ہے کہ جہینہ کے بارہ میں محمد(راوی) نے شک کا اظہار کیا ہے۔ اس پر رسول اللہﷺ نے فرمایا تمہارا کیا خیال ہے اگر غِفار اور مزینہ _ راوی کہتے ہیں میرا خیال ہے جہینہ_ بہتر ہیں بنی تمیم اور بنی عامر اور اسد اور غطفان سے تو کیا یہ ناکام ہو گئے اور گھاٹے میں پڑ گئے تواس (اقرع بن حابس) نے کہا ہاں۔ آپؐ نے فرمایا مجھے اس کی قسم ہے جس کے ہاتھ میں میری جان ہے وہ ان سے بہت بہتر ہیں۔ ایک اور روایت میں (أَحْسِبُ جُھَیْنَۃُ کی بجائے) جُھَیْنَۃُکے الفاظ ہیں اور أَحْسِبُ کے الفاظ نہیں ہیں اور ایک روایت میں مُحَمَّدُالَّذِیْ شَکَّ کا ذکر نہیں۔

حضرت عبد الرحمان بن ابی بکرہ اپنے والد سے روایت کرتے ہیں کہ رسول اللہﷺ نے فرمایا اسلم اور غِفار اور مزینہ اور جہینہ بہتر ہیں بنی تمیم اور بنی عامر اور دو حلیفوں بنی اسد اور غطفان سے۔

حضرت عبد الرحمان بن ابی بکرہ اپنے والد سے روایت کرتے ہیں کہ رسول اللہﷺ نے فرمایا کہ تمہاراکیا خیال ہے کہ جہینہ اور اسلم اور غِفاربہتر ہیں، بنی تمیم اور بنی عبداللہ بن غطفان اور عامر بن صعصعہ سے۔ یہ فرماتے ہوئے آپؐ نے اپنی آواز بلند فرمائی۔ اس پر انہوں نے عرض کیا یا رسولؐ اللہ ! پھر تو وہ یقینا خائب وخاسر ہوگئے۔ اس پر آپؐ نے فرمایا وہ بہتر ہیں۔ ایک اور روایت میں مزینہ کا بھی ذکر ہے۔

حضرت عدی بن حاتم ؓ بیان کرتے ہیں کہ میں حضرت عمر بن خطابؓ کی خدمت میں حاضر ہوا تو انہوں نے مجھے کہا سب سے پہلا صدقہ جس نے رسول اللہﷺ کے چہرہ کو اور آپؐ کے اصحابؓ کے چہروں کو روشن کردیا، طے (قبیلہ)کا صدقہ ہے جو تم نے رسول اللہﷺ کی خدمت میں پیش کیا۔

حضرت ابو ہریرہؓ بیان کرتے ہیں کہ تین باتوں کی وجہ سے جو میں نے رسول اللہﷺ سے سنی میں ہمیشہ بنی تمیم سے محبت کرتا رہوں گا میں نے رسول اللہﷺ کو فرماتے ہوئے سنا کہ وہ (بنی تمیم) میری امت میں سے دجال پر سب سے زیادہ سخت ہیں۔ وہ (حضرت ابو ہریرہؓ ) بیان کرتے ہیں کہ ان کے صدقات آئے تو نبیﷺ نے فرمایا یہ ہماری قوم کے صدقات ہیں۔ وہ بیان کرتے ہیں کہ ان میں سے ایک قیدی عورت حضرت عائشہؓ کے پاس تھی تو رسول اللہﷺ نے فرمایا(اے عائشہؓ !)اسے آزاد کر دو کہ یہ اسماعیلؑ کی اولاد ہے۔ ایک روایت میں (مِنْ ثَلَاثٍ کی بجائے)بَعْدَ ثَلَاثٍ کے الفاظ ہیں اور ایک روایت میں ہے حضرت ابو ہریرہؓ بیان کرتے ہیں کہ تین خصائل جو میں نے رسول اللہﷺ سے سُنا کہ بنی تمیم میں پائے جاتے ہیں۔ اس کے بعد میں ان سے ہمیشہ محبت کرتا رہوں گا۔ باقی روایت سابقہ روایت کی طرح ہے مگر اس میں یہ بھی ہے کہ آپؐ نے فرمایاکہ وہ جنگوں میں سب سے زیادہ مضبوطی سے لڑنے والے ہیں اور دجال کا ذکر نہیں کیا۔

حضرت ابو ہریرہؓ بیان کرتے ہیں کہ رسول اللہﷺ نے فرمایا کہ تم لوگوں کومعدنیات٭ کے طور پر پاؤ گے۔ ان میں جو جاہلیت میں بہتر تھے وہ اسلام میں بھی بہتر ہیں اگر وہ (دین کی) سمجھ رکھیں اور اس معاملہ (یعنی امارت یا عہدہ) میں سب سے بہتروہ لوگ ہیں جو اس میں پڑنے کو سب سے زیادہ ناپسند کرتے ہیں۔ اور تم لوگوں میں سے بدترین دو چہروں والے کو پاؤ گے جواِن کے پاس ایک چہرہ سے آتا ہے اور اُن کے پاس دوسرے چہرہ سے۔ ایک اور روایت میں یہ الفاظ ہیں ’’تَجِدُوْنَ مِنْ خَیْرِ النَّاسِ فِیْ ہٰذَا الشَأْنِ أَشَدَّھُمْ لَہُ کَرَاھِیَۃً حَتَّی یَقَعَ فِیْہِ‘‘