Ahadith

حضرت انس بن مالکؓ کہتے ہیں کہ رسول اللہﷺ بیت الخلاء میں قضائِ حاجت کے لئے تشریف لے جاتے تو میں اور میرے ساتھ کاایک لڑکا پانی کی چھاگل اور برچھی اٹھائے ہوتے اور آپؐ پانی سے استنجاء کرتے تھے۔

حضرت انس بن مالکؓ کہتے ہیں کہ رسول اللہﷺ قضائِ حاجت کے لئے تشریف لے جاتے تو میں آپؐ کے لئے پانی لے کر جاتا۔ پھر آپؐ اس سے طہارت فرماتے۔

ہمام سے روایت ہے کہ حضرت جریرؓ نے پیشاب کرنے کے بعد وضوء کیا اور اپنے موزوں پر مسح کیا۔ کہا گیا آپؓ ایسا کرتے ہیں؟ انہوں نے کہا ہاں میں نے رسول اللہﷺ کو دیکھا۔ آپؐ نے پیشاب کرنے کے بعد وضوء کیا اور اپنے موزوں پر مسح کیا۔ اعمش کہتے ہیں کہ ابراہیم نے کہا کہ لوگوں کو یہ روایت پسندآتی تھی کیونکہ حضرت جریرؓ کا اسلام (سورۃ) المائدۃ اُترنے کے بعد کا ہے٭۔

ابو وائل کہتے ہیں کہ حضرت ابو موسیٰ ؓ پیشاب کے معاملہ میں بہت متشدّدتھے اور ایک بوتل میں پیشاب کیا کرتے تھے اور کہتے تھے کہ جب بنی اسرائیل میں سے کسی کی جلد پر پیشاب لگ جاتا تو وہ قینچیوں سے اسے کاٹ دیتے۔ حضرت حذیفہؓ نے کہا میں چاہتا ہوں کہ تمہاراصاحب اسقدر شدّت نہ کرے۔ میں نے خود کو دیکھا کہ ایک دفعہ میں اور رسول اللہﷺ جارہے تھے کہ آپؐ ایک باغ کی دیوار کے پیچھے ایک روڑی کے پاس تشریف لائے اور یوں کھڑے ہوئے جس طرح تم میں سے کوئی کھڑا ہوتا ہے، پھر پیشاب کیا۔ میں آپؐ سے پیچھے ہٹ گیا۔ پھر آپؐ نے مجھے اشارہ فرمایا تو میں آیا اور آپؐ کے پیچھے کھڑا ہو گیا یہانتک کہ آپؐ فارغ ہوگئے۔

حضرت مغیرہ بن شعبہؓ روایت کرتے ہیں کہ رسول اللہﷺ قضائِ حاجت کے لئے نکلے تو مغیرہ پانی کا برتن لے کر آپؐ کے پیچھے چلے۔ پس جب آپؐ حاجت سے فارغ ہوئے تو انہوں نے (وضوء کیلئے) آپؐ کے لئے پانی انڈیلا۔ آپؐ نے وضوء کیا اور اپنے موزوں پر مسح کیا۔ ابن رُمح کی روایت میں حِیْنَ کی جگہ حَتّٰی کا لفظ ہے۔ عبد الوہاب بیان کرتے ہیں کہ میں نے یحیٰ بن سعید سے اسی اسناد سے سنا ہے انہوں نے کہا کہ آپؐ نے اپنا چہرہ اور دونوں ہاتھ دھوئے اور اپنے سر کا مسح کیا پھر موزوں پر مسح کیا۔

حضرت مغیرہ بن شعبہؓ سے روایت ہے وہ کہتے ہیں کہ میں ایک سفر میں نبیﷺ کے ساتھ تھا۔ آپؐ نے فرمایا اے مغیرہ! چھاگل لے لو۔ میں نے وہ لے لی۔ پھر میں آپؐ کے ساتھ ہولیا۔ رسول اللہﷺ چلے یہانتک کہ مجھ سے اوجھل ہوگئے۔ آپؐ قضائِ حاجت سے فارغ ہوئے۔ آپؐ تشریف لائے۔ آپؐ پر تنگ آستینوں والا شامی جبہّ تھا۔ آپؐ اس کی آستینوں سے اپنا ہاتھ باہر نکالنے لگے مگر وہ کچھ تنگ تھا۔ پس آپؐ نے اس کے نیچے سے اپناہاتھ نکالا پھر میں نے آپؐ پر پانی انڈیلا اور آپؐ نے نماز کے لئے وضوء کیا اور اپنے موزوں پر مسح کیا پھر نماز ادا فرمائی۔

حضرت مغیرہ بن شعبہؓ کہتے ہیں کہ رسول اللہﷺ قضائَِ حاجت کے لئے باہرتشریف لے گئے۔ جب آپؐ واپس تشریف لائے تو میں آپؐ کے لئے چھاگل لے کرآپؐ سے ملا اور آپؐ کے لئے پانی انڈیلا۔ آپؐ نے اپنے ہاتھ دھوئے۔ پھر اپناچہرہ دھویا پھر اپنے بازو دھونے لگے تو جّبہ تنگ تھا۔ چنانچہ آپؐ نے جبہّ کے نیچے سے دونوں ہاتھ نکالے اور انہیں دھویا اور اپنے سر کا مسح کیااور اپنے موزوں پر مسح کیا، پھر ہمیں نماز پڑھائی۔