Ahadith

احنف بن قیس سے روایت وہ کہتے ہیں کہ میں قریش کے ایک گروہ میں تھا کہ حضرت ابو ذرؓ یہ کہتے ہوئے گذرے مال جمع کرنے والوں کو اس داغ کی بشارت دو جو ان کی پیٹھ پر لگایا جائے گا اور وہ ان کے پہلوؤں سے نکل جائے گا اور اس داغ کی جو ان کی گردنوں کے پچھلے حصہ میں لگایا جائے گا اور ان کی پیشانیوں سے نکلے گا۔ راوی کہتے ہیں پھر وہ ایک طرف ہوکر بیٹھ گئے وہ کہتے ہیں میں نے پوچھا یہ کون ہیں؟انہوں نے کہا یہ ابو ذرؓ ہیں۔ وہ کہتے ہیں میں ان کی طرف گیا اور کہا یہ کیا بات ہے جو میں نے ابھی آپ کو کہتے سنی ہے؟ انہوں نے کہا میں نے وہی بات کہی ہے جو میں نے ان کے نبیﷺ سے سنی تھی۔ راوی کہتے ہیں میں نے کہا آپ کاان عطایا کے بارہ میں کیا خیال ہے؟ انہوں نے کہا کہ وہ لے لو کیونکہ آج ان سے مدد لی جاتی ہے لیکن اگر یہ تیرے دین کی قیمت ہو تو اسے چھوڑ دو۔

حضرت ابو ہریرہؓ سے روایت ہے جسے وہ نبیﷺ تک پہنچاتے ہیں آپؐ نے فرمایا کہ اللہ تبارک وتعالیٰ فرماتا ہے۔ اے ابن آدم! خرچ کر میں تجھ پر خرچ کروں گا اور فرمایا کہ اللہ کادایاں ہاتھ بھرا ہوا ہے۔ ابن نمیر نے _مَلْأَی کے بجائے مَلْآنُ کالفظ استعمال کیاہے _بہت دائمی طور پررات دن عطا کرنے والا ہے کوئی چیز اس میں کمی نہیں کرتی۔

وہب بن منبہ کے بھائی ہمام بن منبہ سے روایت ہے کہ یہ وہ احادیث ہیں جو حضرت ابو ہریرہؓ نے رسول اللہﷺ سے روایت کرتے ہوئے ہم سے بیان کیں اور انہوں نے کچھ احادیث کا ذکر کیاجن میں سے ایک یہ ہے کہ رسول اللہﷺ نے فرمایا یقینا اللہ تعالیٰ نے مجھے فرمایا ہے خرچ کرمیں تجھ پر خرچ کروں گا اور رسول اللہﷺ نے فرمایا اللہ کا دایاں ہاتھ بھرا ہوا ہے۔ رات دن کی عطاکی کثرت اس میں کچھ کمی نہیں کرتی۔ کیا تم نے نہیں دیکھا کہ جب سے اس نے آسمان اور زمین کو پیدا کیا ہے جو کچھ اس نے خرچ کیا ہے اس نے اس کے دائیں ہاتھ میں جو کچھ ہے اس میں کوئی کمی نہیں کی اور فرمایااس کاعرش پانی پر ہے اور اس کے دوسرے ہاتھ میں روکنے کی طاقت ہے وہ بلند کرتاہے اور نیچا کرتا ہے۔

حضرت ثوبانؓ سے روایت ہے کہ رسول اللہﷺ نے فرمایا سب سے افضل دینارجو آدمی خرچ کرتا ہے وہ دینار ہے جس کو وہ آدمی اپنے اہل و عیال پر خرچ کرتا ہے اور وہ دینار جو آدمی اللہ کی راہ میں اپنی سواری پر خرچ کرتا ہے اور وہ دینار جسے وہ اللہ کی راہ میں اپنے ساتھیوں پر خرچ کرتا ہے۔ ابو قلابہ کہتے ہیں آپؐ نے اہل و عیال سے شروع فرمایا۔ پھر ابو قلابہ نے کہا کہ اجر کے لحاظ سے اس شخص سے زیادہ بڑا کون ہو سکتا ہے جو اپنے چھوٹے بچوں پر خرچ کرتا ہے وہ انہیں سوال کرنے سے بچاتا ہے یا جس کے ذریعہ اللہ تعالیٰ انہیں نفع پہنچاتا ہے یا انہیں غنی کرتا ہے۔

حضرت ابو ہریرہؓ سے روایت ہے کہ رسول اللہﷺ نے فرمایا ایک دینارجو تم نے اللہ کی راہ میں خرچ کیااور ایک دینارجو تم نے گردن(آزاد کرنے کے لئے) خرچ کیا۔ ایک دینار جو تم نے مسکین کو صد قہ دیا۔ ایک دینار جسے تم نے اپنے اہل پر خرچ کیا۔ ان میں سے اجر کے لحاظ سے سب سے بڑا وہ ہے جسے تم نے اپنے اہل و عیال پر خرچ کیا۔

خیثمہ سے روایت ہے وہ کہتے ہیں کہ ہم حضرت عبد اللہ بن عمروؓ کے پاس بیٹھے ہوئے تھے کہ ان کے پاس ان کا خزانچی آیااور اندر داخل ہوا۔ انہوں (حضرت عبد اللہ بن عمروؓ ) نے کہا کیا تم نے غلاموں کوان کی خوراک دے دی ہے؟ اس نے کہا نہیں۔ انہوں نے کہا جاؤ اور انہیں دو۔ انہوں نے کہا رسول اللہﷺ نے فرمایا ہے آدمی کے گنہگار ہونے کیلئے یہی کافی ہے کہ وہ ان سے ان کی خوراک روک لے جن پر وہ اختیار رکھتا ہے۔

حضرت جابرؓ سے روایت ہے کہ بنی عذرۃ میں سے ایک شخص نے اپنے ایک غلام کو اپنے بعد آزاد کیا(یعنی یہ کہا کہ میرے مرنے کے بعد تو آزاد ہے۔) یہ بات رسول اللہﷺ تک پہنچی تو آپؐ نے فرمایا کیا اس کے علاوہ بھی تمہارے پاس مال ہے؟ اس نے عرض کیا نہیں۔ آپؐ نے فرمایا اس (غلام) کو مجھ سے کون خریدے گا؟ حضرت نعیم بن عبد اللہؓ العدوی نے آٹھ سو درہم کے عوض اسے خرید لیا اور وہ (درہم) لاکر رسول اللہﷺ کی خدمت میں پیش کردئیے۔ آپؐ نے وہ (اس غلام کے مالک کو) دے دیئے پھر فرمایا اپنی ذات سے شروع کرو اور اس پر خرچ کرو پھرجوزائد ہو وہ تیرے اہل و عیال کے لئے اور پھر جو زائد ہو وہ تیرے قرابت داروں کے لئے، پھر جو اس سے زائد ہو وہ اس طرح اور اس طرح یعنی اپنے سامنے اور اپنے دائیں اور اپنے بائیں۔ ایک دوسری روایت جوحضرت جابرؓ سے مروی ہے کہ ایک انصاری شخص جسے ابو مذکور کہا جاتا تھا نے اپنے ایک غلام کو جسے یعقوب کہا جاتا تھا اپنے مرنے کے بعد آزاد کیا(یعنی یہ کہا کہ میرے مرنے کے بعد تو آزاد ہے) باقی روایت لیث کی روایت کے مطابق ہے۔

اسحاق بن عبد اللہ بن ابو طلحہ سے روایت ہے انہوں نے حضرت انس بن مالکؓ کو کہتے ہوئے سنا کہ حضرت ابو طلحہؓ مدینہ کے انصارؓ میں سب سے مالدار تھے اور انہیں اپنے اموال میں سے سب سے زیادہ محبوب بیرحاء (نامی باغ) تھا اور وہ مسجد کے سامنے تھا اور رسول اللہﷺ اس میں جایا کرتے تھے اور اس کا خوشگوارپانی پیا کرتے تھے۔ حضرت انسؓ کہتے ہیں کہ جب یہ آیت نازل ہوئی لَنْ تَنَالُوْا الْبِرَّ حَتّٰی تُنْفِقُوْا مِمَّا تُحِبُّوْنَ (آل عمران: 93)کہ تم ہرگز نیکی کو پا نہیں سکوگے یہانتک کہ تم ان چیزوں میں سے خرچ کرو جن سے تم محبت کرتے ہو تو حضرت ابوطلحہؓ رسول اللہﷺ کی خدمت میں حاضر ہوئے اور عرض کیا کہ اللہ اپنی کتاب میں فرماتا ہے لَنْ تَنَالُوْا الْبِرَّ حَتّٰی تُنْفِقُوْا مِمَّا تُحِبُّوْنَ (آل عمران: 93)کہ تم ہرگز نیکی کو پا نہیں سکو گے یہانتک کہ تم ان چیزوں میں سے خرچ کروجن سے تم محبت کرتے ہو اور مجھے اپنے اموال میں سے سب سے زیادہ پسند بیرحاء ہے اور یہ اللہ کی راہ میں صدقہ ہے اور میں اس کی خیر اور اللہ کے ہاں اس کے ذخیرہ ہونے کا امید وار ہوں یا رسولؐ اللہ! آپؐ اسے جہاں چاہیں خرچ فرمائیں۔ رسول اللہﷺ نے فرمایا بہت خوب! یہ تو بڑا نفع مند مال ہے یہ تو بڑا نفع مند مال ہے جو تم نے اس کے بارہ میں کہا ہے میں نے سن لیا ہے میرا خیال ہے کہ تم اسے اپنے قریبی رشتہ داروں میں تقسیم کردو۔ چنانچہ حضرت ابو طلحہؓ نے اسے اپنے قریبی رشتہ داروں اور اپنے چچا زاد بھائیوں میں تقسیم کر دیا۔

حضرت انسؓ سے روایت ہے وہ کہتے ہیں کہ جب یہ آیت نازل ہوئی لَنْ تَنَالُوْا الْبِرَّ حَتّٰی تُنْفِقُوْا مِمَّا تُحِبُّوْنَ (آل عمران: 93)کہ تم ہرگز نیکی کو پا نہیں سکو گے یہانتک کہ تم ان چیزوں میں سے خرچ کروجن سے تم محبت کرتے ہو۔ حضرت ابوطلحہؓ نے کہا میرا خیال ہے کہ ہمارا رب ہم سے ہمارے اموال مانگتا ہے۔ یارسولؐ اللہ!میں آپؐ کو گواہ بناتا ہوں۔ میں اپنی بریحاکی زمین اللہ کی راہ میں دیتا ہوں۔ وہ کہتے ہیں رسول اللہﷺ نے فرمایا تم اسے اپنے قریبی رشتہ داروں کو دے دو۔ راوی کہتے ہیں تو انہوں نے حضرت حسانؓ بن ثابت اور حضرت ابی بن کعبؓ کودے دیا۔