Ahadith

حضرت انس بن مالکؓ بیان کرتے ہیں کہ نبیﷺ حضرت ام سلیمؓ کے گھر آتے اور ان کے بچھونے پر استراحت فرماتے جبکہ وہ وہاں نہ ہوتیں۔ وہ کہتے ہیں ایک دن آپؐ تشریف لائے اور حضرت ام سلیمؓ کے بچھونے پر سو گئے۔ چنانچہ انہیں بلایا گیا اور ان سے کہا گیا کہ یہ نبیﷺ (آئے ہوئے) ہیں اور آپ کے گھر میں آپ کے بچھونے پر سو رہے ہیں۔ وہ کہتے ہیں تو ام سلیمؓ آئیں۔ اس وقت حضورؐ کو پسینہ آیا ہوا تھا اور بستر پر چمڑے کے ٹکڑے پر حضورؐ کا پسینہ جمع ہو گیا۔ انہوں نے اپنی صندوقچی کھولی اور اس پسینہ کو جذب کر کے اپنی شیشیوں میں نچوڑنے لگیں۔ نبیﷺ چونکے اور فرمایا اے ام سلیمؓ! تم کیا کر رہی ہو؟ انہوں نے عرض کیا یا رسولؐ اللہ! ہم اس (پسینہ) سے اپنے بچوں ّ کے لئے برکت حاصل کرنا چاہتے ہیں۔ حضورﷺ نے فرمایا تم نے ٹھیک کیا۔

حضرت انسؓ حضرت ام سلیمؓ سے روایت کرتے ہیں کہ نبی ﷺ ان کے ہاں تشریف لایا کرتے تھے اور ان کے ہاں قیلولہ فرماتے۔ وہ حضورؐ کے لئے ایک چمڑے کی شِیٹ بچھاتیں جس پر آپؐ قیلولہ فرماتے۔ آپؐ کو پسینہ بہت آتا تھا اور وہ آپؐ کے پسینہ کو جمع کرتیں اور پھر اسے خوشبو میں اور شیشیوں میں ڈالتیں۔ نبی ﷺ نے فرمایا اے ام سلیمؓ! یہ کیا؟ انہوں نے عرض کیا آپؐ کا پسینہ ہے جسے میں اپنی خوشبو میں مِلا تی ہوں۔

حضرت عائشہؓ بیان فرماتی ہیں کہ رسول اللہ ﷺ پر ٹھنڈی صبح کو بھی وحی اُترتی تو آپؐ کی پیشانی سے پسینہ بہنے لگتا۔

حضرت عائشہؓ بیان فرماتی ہیں کہ حارث بن ہشامؓ نے نبیﷺ سے پوچھا کہ آپؐ پر وحی کیسے آتی ہے؟ آپؐ نے فرمایا کبھی تو وہ گھنٹی کی جھنکار کی مانند میرے پاس آتی ہے اور وہ مجھ پر سب سے زیادہ سخت ہوتی ہے۔ پھر وہ مجھ سے منقطع ہوتی ہے کہ مجھے یاد ہو چکی ہوتی ہے اور کبھی کوئی فرشتہ آدمی کی صورت پر (میرے پاس آتا ہے) اور جو وہ کہتا ہے میں اسے یاد کر لیتا ہوں۔

حضرت عبادہ بن صامتؓ بیان کرتے ہیں کہ جب اللہ کے نبی ﷺ پر وَحی اترتی تو آپؐ کو (احساسِ ذمہ داری کا) شدید احساس ہوتا اور آپؐ کے چہرہ کا رنگ متغیر ہو جاتا۔

حضرت عبادہ بن صامتؓ بیان کرتے ہیں کہ نبی ﷺ پر جب وحی نازل ہوتی تو آپؐ اپنا سر نیچے کر لیتے اور آپؐ کے صحابہؓ بھی اپنے سر نیچے کرتے۔ پھر جب وحی ہو جاتی تو آپؐ اپنا سر اُٹھا لیتے۔

حضرت ابن عباسؓ بیان کرتے ہیں کہ اہلِ کتاب اپنے بالوں کو (پیشانی پر) گراتے تھے جبکہ مشرک مانگ نکالتے تھے۔ رسول اللہ ﷺ جس بارہ میں آپؐ کو کوئی حکم نہ دیا جاتا اُس میں آپؐ اہلِ کتاب کی موافقت پسند فرماتے۔ چنانچہ رسول اللہ ﷺ (پہلے) اپنی پیشانی پر بال گراتے تھے۔ پھر بعد میں آپؐ مانگ نکالنے لگے۔

حضرت براءؓ بیان کرتے ہیں کہ رسول اللہ ﷺ میانہ قد تھے۔ آپؐ کے دونوں شانوں کے درمیان فاصلہ تھا (یعنی سینہ کشادہ تھا) گھنے بالوں والے تھے جو کانوں کی لَو تک تھے۔ آپؐ سرخ رنگ کا جوڑا پہنے ہوئے تھے۔ میں نے آپؐ سے زیادہ خوبصورت کچھ نہیں دیکھا ﷺ۔

حضرت براءؓ بیان کرتے ہیں کہ میں نے کوئی زلفوں والا سرخ جوڑے میں رسول اللہ ﷺ سے زیادہ خوبصورت نہیں دیکھا۔ آپؐ کے بال آپؐ کے کندھوں پر آتے تھے اور آپؐ کے دونوں شانوں کے درمیان فاصلہ تھا۔ آپؐ نہ تو بہت زیادہ لمبے تھے نہ چھوٹے (قد کے) تھے۔ ابو کریب نے کہا کہ آپؐ کے (بہت اور خوبصورت) بال تھے۔

حضرت براءؓ بیان کرتے ہیں کہ رسول اللہﷺ سب لوگوں سے زیادہ خوبرو تھے اور جسمانی بناوٹ میں بھی اُن سب سے زیادہ حسین تھے۔ آپؐ نہ تو بہت زیادہ لمبے تھے اور نہ بہت پستہ قد۔