Ahadith

حضرت ابو ذرؓ سے روایت ہے وہ کہتے ہیں کہ رسول اللہﷺ نے فرمایا کہ جب تم میں سے کوئی نماز پڑھنے کے لئے کھڑا ہو تو اگر اس کے سامنے کجاوے کے پچھلے حصے جتنا ہو تو وہ اسے سترہ بنا لے لیکن اگر اس کے سامنے کجاوے کے پچھلے حصہ جتنا نہ ہو تو اس کی نماز گدھا، عورت اور سیاہ کتّا توڑ دیں گے، میں نے پوچھا اے ابو ذر سیاہ کتے کا سرخ کتے سے اور زرد کتے سے (فرق کا) کیا معاملہ ہے؟ وہ کہنے لگے اے میرے بھائی کے بیٹے جس طرح تم نے مجھ سے پوچھا ہے میں نے بھی رسول اللہﷺ سے سوال کیا تھا تب آپؐ نے فرمایا کہ سیاہ کتا شیطان ہے۔ (شریر ہوتا ہے)۔

حضرت ابو ہریرہؓ سے روایت ہے وہ کہتے ہیں کہ رسول اللہﷺ نے فرمایا کہ عورت، گدھا اور کتّا نماز توڑ دیتے ہیں اور کجاوے کے پچھلے حصہ کی طرح کی کوئی چیز اس سے بچاتی ہے۔

حضرت عائشہؓ سے روایت ہے کہ نبیﷺ رات کو نماز پڑھتے تھے اور میں آپؐ کے درمیان اور قبلہ کے درمیان جنازہ کے رکھنے کی طرح (لیٹی ہوئی) ہوتی تھی۔

حضرت عائشہؓ سے روایت ہے آپؓ بیان کرتی ہیں کہ نبیﷺ رات کو اپنی تمام نماز ادا فرماتے اور میں آپؐ کے اور قبلہ کے درمیان (لیٹی ہوئی) ہوتی تھی، پھر آپؐ جب وتر (پڑھنے) کا ارادہ فرماتے تو مجھے جگا دیتے اور میں بھی وتر پڑھتی۔

عروہ بن زبیر سے روایت ہے وہ کہتے ہیں کہ حضرت عائشہ ؓ نے کہا کہ نماز کو کیا چیز توڑتی ہے؟ وہ کہتے ہیں کہ ہم نے کہا کہ عورت اور گدھا۔ اس پر آپ ؓ نے فرمایا کہ عورت تو کوئی بُرا جانور ہوئی! یقینًا میں نے اپنے تئیں دیکھا ہے کہ میں رسول اللہ ﷺ کے سامنے جنازے کے رکھنے کی طرح (لیٹی ہوئی) ہوتی اور آپ ؐ نماز پڑھ رہے ہوتے۔

مسروق حضرت عائشہؓ سے روایت کرتے ہیں کہ آپؓ (حضرت عائشہؓ) کے پاس ان چیزوں کا ذکر ہوا جو نماز توڑتی ہیں کتا، گدھا اور عورت۔ اس پر حضرت عائشہؓ نے فرمایا کہ تم نے ہمیں گدھوں اور کتّوں سے مشابہہ بنا دیا ہے۔ خدا کی قسم! میں نے رسول اللہﷺ کو نماز پڑھتے دیکھا ہے اور میں تخت پر آپؐ کے اور قبلہ کے درمیان لیٹی ہوتی جب مجھے ضرورت ہوتی تو مجھے پسند نہ ہوتا کہ بیٹھ کر رسول اللہﷺ کو تکلیف دوں۔ چنانچہ میں (تخت کے) پاؤں کی طرف سے سرک کر چلی جاتی۔

حضرت عائشہؓ سے روایت ہے آپؓ نے فرمایا تم لوگوں نے ہمیں کتّوں اور گدھوں کے برابر کر دیا ہے۔ میں نے اپنے تئیں تخت پر لیٹے ہوئے دیکھا ہے کہ رسول اللہﷺ تشریف لاتے اور تخت کے وسط میں نماز پڑھتے مجھے اس بات سے کراہت ہوتی کہ میں آپؐ کے سامنے آؤں چنانچہ میں تخت کے پایوں کی طرف سے سرکتی ہوئی اپنے لحاف سے باہر آ جاتی۔

حضرت عائشہؓ سے روایت ہے آپؓ فرماتی ہیں کہ میں رسول اللہﷺ کے سامنے سو رہی ہوتی اور میرے پاؤں آپؐ کے سامنے ہوتے تھے۔ جب آپؐ سجدہ کرتے تو مجھے چھوتے اور میں اپنے پاؤں کھینچ لیتی اور جب آپؐ کھڑے ہوتے پھر میں ان کو پھیلا دیتی، نیز آپؓ نے فرمایا کہ ان دنوں گھروں میں چراغ نہیں ہوتے تھے۔

نبی ﷺ کی زوجہ مطہّرہ حضرت میمونہؓ فرماتی ہیں کہ رسول اللہ ﷺ نماز پڑھتے تو میں آپؐ کے پہلو میں ہوتی۔ اس حال میں کہ میں حائضہ ہوتی اور بعض اوقات جب آپؐ سجدہ کرتے تو آپؐ کا کپڑا مجھے چھو جاتا۔