Ahadith

حضرت ا بنِ عباسؓ سے روایت ہے کہ رسول اللہﷺ نے فرمایا کہ مجھے حکم دیا گیا ہے کہ میں سات ہڈیوں پر سجدہ کروں پیشانی‘ پھر آپؐ نے اپنے ہاتھ سے اپنی ناک کی طرف اشارہ فرمایا‘ اور دو ہاتھ اور دو پاؤں اور دونوں پیروں کی انگلیاں اور ہم کپڑوں اور بالوں کو سنبھالتے نہ رہیں۔

حضرت عبداللہ بن عباسؓ سے روایت ہے کہ رسول اللہﷺ نے فرمایا کہ مجھے حکم دیا گیا ہے کہ میں سات (اعضاء) پر سجدہ کروں (یعنی) پیشانی اور ناک اور دونوں ہاتھ اور دونوں گھٹنے اور دونوں پیر اور بالوں اور کپڑوں کو سمیٹتا نہ رہوں۔

حضرت عباسؓ بن عبد المطلب سے روایت ہے کہ انہوں نے رسول اللہ ﷺ کو فرماتے ہوئے سنا کہ جب بندہ سجدہ کرتا ہے تو اس کے ساتھ سات اعضاء سجدہ کرتے ہیں اس کا چہرہ، اس کے دونوں ہاتھ، اس کے دونوں گھٹنے اور اس کے دونوں پیر۔

حضرت عبداللہ بن عباسؓ سے روایت ہے کہ انہوں نے حضرت عبداللہ بن حارثؓ کو اس طرح نماز پڑھتے دیکھا کہ ان کے سر کے بال پچھلی طرف بندھے ہوئے تھے۔ وہ (حضرت عبداللہ بن عباسؓ) کھڑے ہوئے اور اسے کھولنے لگے۔ جب وہ نماز سے فارغ ہوئے تو حضرت ابن عباسؓ کی طرف متوجہ ہوئے اور کہنے لگے تمہیں میرے سر سے کیا؟ اس پر انہوں نے کہا کہ میں نے رسول اللہ ﷺ کو فرماتے ہوئے سنا کہ اس کی مثال اس کی طرح ہے جو نماز پڑھے اور اس کے ہاتھ بندھے ہوئے ہوں۔

حضرت انسؓ سے روایت ہے وہ کہتے ہیں کہ رسول اللہﷺ نے فرمایا سجدے میں اعتدال سے کام لو اور تُم میں سے کوئی کُتّے کے (بازو) پھیلانے کی طرح اپنے بازو نہ پھیلائے۔

حضرت براءؓ سے روایت ہے وہ کہتے ہیں کہ رسول اللہ ﷺ نے فرمایا کہ جب تم سجدہ کرو تو اپنے ہتھیلیوں کو (زمین پر) رکھو اور اپنی کہنیوں کو اٹھائے رکھو۔

حضرت عبداللہؓ بن مالک بن بُحَیْنَہ سے روایت ہے کہ رسول اللہﷺ جب نماز پڑھتے تو اپنے بازو اتنا کھولتے کہ آپؐ کی بغلوں کی سفیدی ظاہر ہونے لگتی۔ حضرت عمروؓ بن حارث کی ایک روایت میں ہے کہ رسول اللہﷺ جب سجدہ کرتے تو اپنے سجدے میں اپنے بازو اتنا کھولتے کہ آپؐ کی بغلوں کی سفیدی دیکھی جاتی۔ لیث کی روایت میں ہے کہ رسول اللہﷺ جب سجدہ کرتے تو اپنے بازوؤں کو اپنی بغلوں سے اتنا کھول کر رکھتے کہ میں آپؐ کی بغلوں کی سفیدی دیکھ لیتا۔

حضرت میمونہؓ سے روایت ہے آپؓ فرماتی ہیں کہ نبی ﷺ جب سجدہ کرتے تو اگر بکری کا بچہ آپؐ کے سامنے سے گذرنا چاہتا تو گذر سکتا۔

نبی ﷺ کی زوجہ مطہرہ حضرت میمونہ ؓ سے روایت ہے آپ ؓ فرماتی ہیں کہ رسول اللہ ﷺ جب سجدہ کرتے تو اپنے دونوں ہاتھوں کو اتنا کھولتے یعنی ان میں اتنا فاصلہ رکھتے کہ پیچھے سے آپؐ کی بغلوں کی سفیدی دیکھی جا سکتی اور جب بیٹھتے تو اپنی بائیں ران پر تسلّی سے بیٹھتے۔

حضرت میمونہؓ بنت حارث سے روایت ہے وہ فرماتی ہیں کہ رسول اللہ ﷺ جب سجدہ کرتے تو (بازوؤں میں) اتنا فاصلہ رکھتے کہ جو آپؐ کے پیچھے ہوتا وہ آپؐ کی بغلوں کی سفیدی دیکھ لیتا۔ وکیع کہتے ہیں یعنی ان دونوں کی سفیدی