Ahadith

اسحاق بن نصر نے ہم سے بیان کیا کہ عبدالرزاق نے ہمیں بتایا۔ معمر نے ہمیں خبر دی۔ معمر نے زُہری سے، زہری نے ابن مسیب سے، ابن مسیب نے اپنے باپ سے روایت کی کہ ان کا باپ نبی صلی اللہ علیہ وسلم کے پاس آیا۔ آپؐ نے پوچھا: تمہارا نام کیا ہے؟ اُس نے کہا: حَزن۔ آپؐ نے فرمایا: تم سہل ہو۔ اُس نے کہا: میں وہ نام نہیں بدلتا جو میرا نام میرے باپ نے رکھا۔ (سعید) ابن مسیب کہتے تھے: تو پھر اس کے بعد ہم میں سختی اور مصیبت ہمیشہ رہی۔ علی بن عبداللہ اور محمود نے ہم سے بیان کیا اور وہ غیلان کے بیٹے تھے۔ ان دونوں نے کہا: عبدالرزاق نے ہم سے بیان کیا۔ معمر نے ہمیں خبر دی۔ معمر نے زُہری سے، زہری نے ابن مسیب سے، انہوں نے اپنے باپ سے، ان کے باپ نے ان کے دادا سے روایت کرتے ہوئے یہی بتایا۔

صدقہ بن فضل نے ہم سے بیان کیا کہ محمد بن جعفر نے ہمیں خبر دی۔ انہوں نے شعبہ سے، شعبہ نے عطاء بن ابی میمونہ سے، عطاء نے ابورافع سے، ابورافع نے حضرت ابوہریرہؓ سے روایت کی کہ حضرت زینب (بنت ابی سلمہؓ) کا نام بَرّہ تھا۔ (ان سے) کسی نے کہا: اپنے آپ کو پاک سمجھتی ہیں۔ یہ سن کر رسول اللہ صلی اللہ علیہ وسلم نے ان کا نام زینب رکھ دیا۔

(محمد بن عبداللہ) ابن نمیر نے ہم سے بیان کیا کہ محمد بن بشر نے ہمیں بتایا۔ اسماعیل (بن ابی خالد بجلی) نے ہم سے بیان کیا۔ (وہ کہتے تھے:) میں نے حضرت ابن ابی اوفیٰؓ سے پوچھا: کیا آپؓ نے نبی صلی اللہ علیہ وسلم کے بیٹے ابراہیمؓ کو دیکھا ؟ انہوں نے کہا: وہ چھوٹے ہی فوت ہوگئے تھے۔ اور اگر یہ مقدر ہوتا کہ حضرت محمد صلی اللہ علیہ وسلم کے بعد کوئی نبی ہوتو آپؐ کا بیٹا زندہ رہتا۔ مگر آپؐ کے بعد کوئی نبی نہیں۔

سلیمان بن حرب نے ہم سے بیان کیا کہ شعبہ نے ہمیں بتایا۔ انہوں نے عدی بن ثابت سے روایت کی۔ انہوں نے کہا: میں نے حضرت براءؓ سے سنا۔ وہ کہتے تھے: جب (صاحبزادہ) ابراہیم علیہ السلام فوت ہوئے تو رسول اللہ صلی اللہ علیہ وسلم نے فرمایا: جنت میں اس کی ایک دودھ پلانے والی بھی ہے۔

ابوالولید نے ہم سے بیان کیا کہ زائدہ نے ہمیں بتایا۔ زیاد بن علاقہ نے ہم سے بیان کیا۔ (انہوں نے کہا:) میں نے حضرت مغیرہ بن شعبہؓ سے سنا۔ وہ کہتے تھے: جس دن (صاحبزادہ) ابراہیمؓ فوت ہوئے سورج گرہن ہوا۔ اس حدیث کو حضرت ابوبکرہؓ نے نبی صلی اللہ علیہ وسلم سے روایت کیا ۔