Ahadith

ابوالیمان نے ہم سے بیان کیا کہ شعیب نے ہمیں خبر دی۔ انہوں نے زُہری سے روایت کی، کہا: سلیمان بن یسار نے مجھے بتایا کہ حضرت عبداللہ بن عباس رضی اللہ عنہما نے مجھے خبر دی۔ انہوں نے کہا: رسول اللہ صلی اللہ علیہ وسلم نے قربانی کے دن فضل بن عباسؓ کو اپنے پیچھے اُونٹنی کی پشت پر سوار کر لیا اور فضلؓ خوبصورت شخص تھے۔ نبی صلی اللہ علیہ وسلم لوگوں کے لئے ٹھہر گئے کہ اُن کے سوالوں کا جواب دیں۔ اور خثعم (قبیلہ) کی ایک خوبصورت عورت سامنے سے آئی کہ رسول اللہ صلی اللہ علیہ وسلم سے مسئلہ پوچھے۔ فضلؓ اس کو دیکھنے لگے اور ان کو اس کا حسن پسند آیا۔ نبی ﷺ نے مڑ کر جو دیکھا تو فضلؓ اس کو دیکھ رہے تھے۔ تو آپؐ نے اپنا ہاتھ پیچھے کر کے فضلؓ کی ٹھوڑی کو پکڑا اور اس کے منہ کو پھیر دیا تا کہ اسے نہ دیکھے۔ وہ کہنے لگی: یا رسول اللہ! اللہ کا فرض حج کے متعلق اپنے بندوں پر ایسے وقت مقرر ہوا کہ میرا باپ اتنا بوڑھا تھا کہ اونٹنی پر سیدھا نہیں بیٹھ سکتا تھا۔ تو کیا میں اُس کی طرف سے حج کروں تو یہ اس کے حج کو ادا کردے گا؟ آپؐ نے فرمایا: ہاں۔

عبداللہ بن محمد نے ہم سے بیان کیا کہ ابوعامر نے ہمیں بتایا۔ زُہیر (بن محمد) نے ہم سے بیان کیا۔ زہیر نے زید بن اسلم سے، زید نے عطاء بن یسار سے، عطاء نے حضرت ابوسعید خدری رضی اللہ عنہ سے روایت کی کہ نبی صلی اللہ علیہ وسلم نے فرمایا: راستوں پر بیٹھنے سے اپنے آپ کو بچاتے رہو۔ لوگوں نے کہا: یا رسول اللہ! ہمیں تو اپنی مجلسوں سے کوئی چارہ نہیں۔ ہم ان میں بیٹھ کر باتیں کرتے ہیں۔ آپؐ نے فرمایا: اگر تم نے بیٹھنا ہی ہے تو راستے کو اس کا حق دو۔ انہوں نے پوچھا: یا رسول اللہ! راستے کا حق کیا ہوتا ہے؟ آپؐ نے فرمایا: نگاہ نیچی رکھنا اور تکلیف دہ چیز کو ہٹانا اور سلام کا جواب دینا اور بھلی بات کا حکم دینا اور بُری بات سے روکنا۔

عمر بن حفص نے ہم سے بیان کیا کہ میرے باپ نے ہمیں بتایا کہ اعمش نے ہم سے بیان کیا۔ اعمش نے کہا کہ شقیق نےمجھے بتایا۔ شقیق نے حضرت عبداللہ (بن مسعودؓ) سے روایت کی۔ وہ کہتے تھے: ہماری عادت تھی کہ جب نبی صلی اللہ علیہ وسلم کے ساتھ نماز پڑھتے تو ہم یوں کہتے: اللہ پر سلامتی ہو پیشتر اس کے کہ اس کے بندوں پر سلامتی ہو، جبریل پر سلامتی ہو اور میکائیل پر سلامتی ہو اور فلاں اور فلاں پر سلامتی ہو ۔ جب نبی صلی اللہ علیہ وسلم نماز پڑھ چکے تو آپؐ ہماری طرف متوجہ ہوئے اور فرمایا: اللہ ہی تو سلامتی ہے اس لئے جب کوئی تم میں سے نماز میں بیٹھے تو یوں کہے: تمام تحفے اللہ تعالیٰ کے لئے ہیں اور تمام عبادتیں اور مالی قربانیاں۔ اے نبی تجھ پر سلامتی ہو اور اللہ کی رحمت اور برکت ہو۔ہم پر سلامتی ہو اور اللہ کے نیک بندوں پر۔ کیونکہ جب وہ یوں کہے گا تو ہر نیک بندے کو جو آسمان اور زمین میں ہے یہ دعا پہنچے گی۔ پھر یہ کہے: میں گواہی دیتا ہوں کہ اللہ کے سوا کوئی معبود نہیں اور میں گواہی دیتا ہوں کہ محمد اس کے بندے اور اس کے رسول ہیں۔ پھر اس کے بعد بہتر سے بہتر دعا جو مانگنا چاہے مانگے۔

اسحاق بن ابراہیم نے ہم سے بیان کیا کہ روح بن عبادہ نے ہمیں بتایا کہ ابن جریج نے ہم سے بیان کیا۔ انہوں نے کہا: مجھے زیاد نے بتایا کہ ثابت نے ان کو خبر دی جو کہ عبدالرحمٰن بن زید کے غلام تھے۔ ثابت نے حضرت ابوہریرہ رضی اللہ عنہ سے، حضرت ابوہریرہؓ نے رسول اللہ صلی اللہ علیہ وسلم سے روایت کی۔ آپؐ نے فرمایا: سوار پیدل کو سلام کرے اور چلنے والا بیٹھے ہوئے کو اور تھوڑے بہتوں کو۔

قتیبہ (بن سعید) نے ہم سے بیان کیا کہ جریر نے ہمیں بتایا۔ انہوں نے شیبانی سے، شیبانی نے اشعث بن ابی شعثاء سے، اشعث نے معاویہ بن سوید بن مقرن سے، معاویہ نے حضرت براء بن عازب رضی اللہ عنہما سے روایت کی۔ انہوں نے کہا: رسول اللہ ﷺ نے ہمیں سات باتوں یعنی بیمار پرسی کرنے، جنازوں کے ساتھ جانے، چھینک مارنے والے کو جواب دینے اور کمزور کی یاوری کرنے اور مظلوم کی مدد کرنے اور عام طور پر سلام کرنے اور قسم دے کر مانگنے والے کی قسم پورا کرنے کا حکم دیا اور آپؐ نے ہمیں چاندی کے برتن میں پینے، سونے کی انگوٹھی پہننے اور ریشمی لال زین پوشوں پر سوار ہونے اور حریر اور دیباج اور قسی اور استبرق کے پہننے سے منع فرمایا۔