Ahadith

اصبغ (بن فرج) نے ہم سے بیان کیا، کہا: (عبداللہ) ابن وہب نے مجھے بتایا۔ ابویحيٰ نے جو کہ فلیح بن سلیمان ہیں ہمیں خبر دی۔ ابویحيٰ نے ہلال بن اُسامہ سے، ہلال نے حضرت انس بن مالک رضی اللہ عنہ سے روایت کی۔ انہوں نے کہا: نبی صلی اللہ علیہ وسلم نہ تو گالی دیا کرتے تھے اور نہ بد خُلق تھے اور نہ ہی لعنت کیا کرتے تھے۔ ناراضگی کے اظہار کے وقت ہم میں سے کسی کو یہ فرماتے: اسے کیا ہوگیا ہے؟ اس کی پیشانی میں خاک لگے۔

عمرو بن عیسیٰ نے ہم سے بیان کیا کہ محمد بن سواء نے ہمیں بتایا۔ روح بن قاسم نے ہم سے بیان کیا۔ روح نے محمد بن منکدر سے، ابن منکدر نے عروہ سے، عروہ نے حضرت عائشہؓ سے روایت کی کہ ایک شخص نے نبی صلی اللہ علیہ وسلم کے پاس اندر آنے کی اجازت مانگی۔ جب آپؐ نے اُس کو آتے دیکھا، آپؐ نے فرمایا: کیا ہی بُرا ہے خاندان کا بھائی اور کیا ہی بُرا ہے خاندان کا بیٹا۔ جب وہ آ کر بیٹھ گیا تو نبی صلی اللہ علیہ وسلم اسے خندہ پیشانی سے ملے اور اس سے کھل کر بلاتکلف باتیں کیں۔ جب وہ شخص چلا گیا تو حضرت عائشہؓ نے آپؐ سے کہا: یا رسول اللہ! جب آپؐ نے اس شخص کو دیکھا تھا تو آپؐ نے ایسا ایسا فرمایا تھا۔ پھر آپؐ اس سے خندہ پیشانی سے ملے اور اس سے کھل کر بے تکلفی سے باتیں کیں۔ رسول اللہ صلی اللہ علیہ وسلم نے فرمایا: عائشہؓ! تم نے مجھے کب بد اخلاق دیکھا تھا؟ قیامت کے روز اللہ کے نزدیک بد ترین لوگ وہ ہوں گے جن کو لوگ ان کے شر سے بچنے کے لئے چھوڑ دیں گے۔

عمرو بن عون نے ہم سے بیان کیا کہ حماد نے جو زید کے بیٹے ہیں ہمیں بتایا۔ انہوں نے ثابت سے، ثابت نے حضرت انسؓ سے روایت کی۔ انہوں نے کہا: نبی صلی اللہ علیہ وسلم لوگوں میں سب سے زیادہ خوبصورت تھے اور سب لوگوں سے زیادہ سخی تھے اور سب سے زیادہ بہادر تھے۔ ایک رات مدینہ کے باشندے گھبرا گئے اور لوگ آواز کی طرف چل پڑے تو نبی صلی اللہ علیہ وسلم ان کو سامنے سے آتے ہوئے ملے۔ آپؐ اس آواز کی طرف تمام لوگوں سے پہلے گئے تھے۔ اور آپؐ یہ فرما رہے تھے: قطعاً گھبراؤ نہیں، قطعاً گھبراؤ نہیں۔ اور آپؐ حضرت ابوطلحہؓ کے گھوڑے پر سوار تھے جو ننگی پیٹھ تھا، اُس پر زین نہ تھی۔ آپؐ کے گلے میں تلوار لٹک رہی تھی۔ آپؐ نے فرمایا: اس کو تو میں نے ایک دریا پایا ہے۔ یا (فرمایا:) یہ تو دریا ہے۔

سعید بن ابی مریم نے ہم سے بیان کیا کہ ابوغسان (محمد بن مطرف) نے ہمیں بتایا، کہا: ابوحازم نے مجھ سے بیان کیا۔ ابوحازم نے حضرت سہل بن سعدؓ سے روایت کی۔ انہوں نے کہا: ایک عورت نبی صلی اللہ علیہ وسلم کے پاس ایک بُردہ لائی۔ حضرت سہلؓ نے لوگوں سے پوچھا: کیا تم جانتے ہو کہ بُردہ کیاہے؟ لوگوں نے کہا: اوپر اُوڑھنے کی بُر دار چادر۔ حضرت سہلؓ نے کہا: بُردہ اوپر اوڑھنے کی وہ بُر دار چادر ہوتی ہے جس میں اس کا حاشیہ بُنا ہوا ہو۔ وہ کہنے لگی: یارسول اللہ! میں یہ آپؐ کو پہنانے کے لئے لائی ہوں۔ نبی صلی اللہ علیہ وسلم نے اس کو لے لیا۔ آپؐ کو اس کی ضرورت تھی۔ آپؐ نے اس کو پہنا۔ پھر صحابہ میں سے ایک شخص نے آپؐ کو پہنے ہوئے دیکھا اور کہنے لگا: یا رسول اللہ! یہ کیا ہی عمدہ چادر ہے۔ آپؐ مجھے یہ پہننے کے لئے دے دیں۔ آپؐ نے فرمایا: اچھا۔ جب نبی صلی اللہ علیہ وسلم اُٹھ کر چلے گئے تو اس کے ساتھیوں نے اس کو ملامت کی۔ کہنے لگے: تم نے اچھا نہیں کیا۔ جب تم نے نبی صلی اللہ علیہ وسلم کو دیکھا کہ آپؐ نے اس کو ایسے وقت میں لیا ہے کہ آپؐ کو اس کی ضرورت تھی، پھر تم نے آپؐ سے یہ مانگ لی۔ تم اچھی طرح جانتے ہو کہ آپؐ ایسے نہیں کہ آپؐ سے کوئی چیز مانگی جائے اور اسے نہ دیں۔ اس نے کہا: جب نبی صلی اللہ علیہ وسلم نے اس کو پہنا تو میں نے اس کی برکت کی اُمید رکھتے ہوئے اس کو مانگا تا کہ میں اس میں کفنایا جاؤں۔