Ahadith

عبدان نے ہم سے بیان کیا کہ میرے باپ نے مجھے بتایا۔ اُنہوں نے شعبہ سے، شعبہ نے عبدالملک سے، عبدالملک نے ربعی سے، ربعی نے حضرت حذیفہؓ سے، اُنہوں نے نبی صلی اللہ علیہ وسلم سے روایت کی۔ آپؐ نے دجال کے متعلق فرمایا کہ اس کے ساتھ پانی اور آگ ہو گی۔ اس کی آگ تو ٹھنڈا پانی اور اس کا پانی آگ ہے۔ حضرت ابن مسعودؓ نے کہا: میں نے رسول اللہ صلی اللہ علیہ وسلم سے یہ سنا۔

سلیمان بن حرب نے ہم سے بیان کیا کہ شعبہ نے ہمیں بتایا۔ اُنہوں نے قتادہ سے، قتادہ نے حضرت انس رضی اللہ عنہ سے روایت کی۔ اُنہوں نے کہا: نبی صلی اللہ علیہ وسلم نے فرمایا: جو نبی بھی مبعوث کیا گیا اُس نے اپنی اُمت کو جھوٹے کانے کے خطرے سے آگاہ کیا۔ دیکھو ! خیال رکھو وہ کانا ہو گا اور تمہارا ربّ کانا نہیں اور اس کی دونوں آنکھوں کے درمیان کافر لکھا ہوا ہوگا۔ اس حدیث کے متعلق حضرت ابوہریرہ ؓاور حضرت ابن عباسؓ نے بھی نبی صلی اللہ علیہ وسلم سے روایت کی۔

ابوالیمان نے ہم سے بیان کیا کہ شعیب نے ہمیں بتایا۔ اُنہوں نے زہری سے روایت کی کہ عبیداللہ بن عبداللہ بن عتبہ بن مسعود نے مجھے خبر دی کہ حضرت ابوسعیدؓ نے کہا: ایک دن رسول اللہ صلی اللہ علیہ وسلم نے ہم سے دجال کے متعلق ایک لمبی بات بیان کی منجملہ اس کے جو آپؐ ہم سے بیان کیا کرتے تھے یہ بات بھی ہے آپؐ نے فرمایا: دجال آئے گا اور اس پر حرام ہو گا کہ مدینہ کے راستوں سے داخل ہو تو وہ ان کھاری زمینوں میں سے کسی زمین پر اُترے گا جو مدینہ کے قریب ہیں اور اُس وقت ایک شخص جو عام لوگوں سے بہتر ہو گا یا فرمایا: بہترین لوگوں میں سے ہوگا، نکل کر اس کے پاس جائے گا اور وہ کہے گا میں جانتا ہوں کہ تم وہی دجال ہو جس کا ذکر رسول اللہ صلی اللہ علیہ وسلم نے ہم سے فرمایا۔ تو دجال کہے گا: بھلا بتاؤ تو سہی کہ اگر میں اس کو مار ڈالوں اور پھر اسے زندہ کروں تو کیا تم اس امر میں شک کرو گے۔ لوگ کہیں گے نہیں۔ چنانچہ وہ اس کو مار ڈالے گا اور پھر اسے زندہ کرے گا اور وہ شخص کہے گا اللہ کی قسم! جتنی بصیرت مجھے آج تمہارے متعلق ہوئی ہے اس سے پہلے نہ تھی۔ دجال چاہے گا کہ اس کو مار ڈالے۔ مگر اس کو اس پر قدرت نہ دی جائے گی۔

ابوالیمان نے ہم سے بیان کیا کہ شعیب نے ہمیں بتایا۔ انہوں نے زہری سے روایت کی نیز اسماعیل (بن ابی اویس) نے بھی ہم سے بیان کیا کہ میرے بھائی نے مجھے بتایا۔ اُن کے بھائی نے سلیمان سے، اُنہوں نے محمد بن ابی عتیق سے، ابن ابی عتیق نے ابن شہاب سے، ابن شہاب نے عروہ بن زبیر سے روایت کی کہ حضرت زینب بنت ابی سلمہؓ نے اُن کو بتایا۔ اُنہوں نے حضرت اُم حبیبہ بنت ابی سفیانؓ سے، اُنہوں نے حضرت زینب بنت جحشؓ سے روایت کی کہ ایک دن رسول اللہ صلی اللہ علیہ وسلم اُن کے پاس گھبرائے ہوئے آئے۔ آپؐ فرما رہے تھے: اللہ کے سوا اَور کوئی معبود نہیں۔ عربوں کی ہلاکت ہے اس شر سے جو بالکل نزدیک آن پہنچا۔ آج یاجوج ماجوج کی دیوار کو اس قدر کھولا گیا ہے اور آپؐ نے اپنی دونوں انگلیوں سے یعنی انگوٹھے اور اس سے جو اس کے ساتھ ملی ہوئی ہے حلقہ بنایا۔ حضرت زینب بنت جحشؓ کہتی تھیں، میں نے کہا یا رسول اللہ ! کیا ہم ہلاک ہوجائیں گے جبکہ ہمارے درمیان اچھے لوگ ہوں گے؟ آپؐ نے فرمایا: ہاں جب گند بہت ہوجائے گا۔