Ahadith

اور حضرت ابو ہریرہ سے روایت ہے کہ نبی ﷺ نے فرمایا کہ ایک دفعہ حضرت ایوب ننگے نہا رہے تھے کہ سونے کی مکڑیاں ان پر آگریں اور حضرت ایوب انہیں اپنے کپڑے میں لپیں بھر بھر کر ڈالنے لگے۔ اس پر ان کے رب نے انہیں پکارا: ایوب! کیا میں نے تجھے اس سے جس کو تو دیکھ رہا ہے، بے نیاز نہیں کر دیا؟ انہوں نے کہا: ہاں، بے شک تیری عزت کی قسم، لیکن مجھے تیری برکت سے بے نیازی نہیں ہے۔ یہ روایت ابراہیم نے موسیٰ بن عقبہ سے، موسیٰ نے صفوان بن سلیم سے، صفوان نے عطاء بن یسار سے۔ عطاء نے حضرت ابو ہریرہ سے۔ حضرت ابو ہریرہ نے نبی ﷺ سے روایت کی۔ انہوں نے یوں کہا: اسی اثناء میں کہ حضرت ایوب ننگے نہا رہے تھے۔

ہم سے عبدان نے بیان کیا، کہا: عبداللہ نے ہمیں بتلایا۔ انہوں نے کہا: سفیان نے ہمیں خبر دی۔ انہوں نے اعمش سے۔ اعمش نے سالم بن ابی جعد سے۔ ابو جعد نے کریب سے۔ کریب نے حضرت ابن عباس سے۔ حضرت ابن عباس نے حضرت میمونہ سے روایت کی کہ وہ کہتی تھیں: میں نبی ﷺ کو پردہ کیے ہوئے تھی اور آپ غسلِ جنابت فرما رہے تھے۔ آپ نے اپنے دونوں ہاتھ دھوئے، پھر اپنے دائیں ہاتھ سے اپنے بائیں ہاتھ پر پانی ڈالا اور اپنی شرم گاہ کو اور جو کچھ اسے لگا ہوا تھا اس کو دھویا۔ پھر اپنا ہاتھ دیوار یا زمین پر مل لیا۔ پھر آپ نے وضو کیا جیسا کہ نماز کے لیے وضو کیا کرتے تھے۔ آپ نے پاؤں نہیں دھوئے۔ اس کے بعد آپ نے اپنے جسم پر پانی ڈالا۔ پھر ایک طرف ہو کر آپ نے اپنے دونوں پاؤں دھوئے۔ ابو عوانہ اور ابن فضیل نے پردہ کرنے کے متعلق انہی کی طرح حدیث بیان کی۔

ہم سے عبداللہ بن یوسف نے بیان کیا، کہا: مالک نے ہمیں بتلایا۔ انہوں نے ہشام بن عروہ سے۔ ہشام نے اپنے باپ سے۔ ان کے باپ نے حضرت ابو سلمہ کی بیٹی حضرت زینب سے۔ حضرت زینب نے ام المؤمنین حضرت ام سلمہ سے روایت کی کہ وہ کہتی تھیں: حضرت ابو طلحہ کی بیوی حضرت ام سلیم رسول اللہ صلی اللہ علیہ وسلم کے پاس آئیں اور کہا: یا رسول اللہ! اللہ تعالیٰ حق سے نہیں شرماتا۔ کیا عورت بھی نہائے جب اسے احتلام ہو؟ رسول اللہ صلی اللہ علیہ وسلم نے فرمایا: ہاں، جب پانی دیکھے۔

ہم سے علی بن عبد اللہ نے بیان کیا، کہا: انہوں نے ہم سے بیان کیا۔ انہوں نے کہا: حمید نے ہم سے بیان کیا، کہا: بکر نے ہم سے بیان کیا۔ انہوں نے ابو رافع سے۔ ابو رافع نے حضرت ابو ہریرہ سے روایت کی کہ نبی صلی اللہ علیہ وسلم مدینہ کے راستے پر کسی جگہ پر انہیں ملے اور وہ جنبی تھے۔ (وہ کہتے تھے) میں آپ سے جھجک کر پیچھے ہٹا اور پھر وہ گئے اور نہائے اور اس کے بعد آئے تو آپ نے فرمایا: ابوہریرہ! تم کہاں تھے؟ انہوں نے کہا کہ میں جنبی تھا اس لیے میں نے ناپسند کیا کہ میں آپ کے ساتھ بیٹھوں درآنحالیکہ میں ناپاک ہوں۔ آپ نے فرمایا: سبحان اللہ! مومن تو ناپاک نہیں ہوتا۔

ہم سے عیاش نے بیان کیا، کہا: عبدالاعلیٰ نے ہم سے بیان کیا کہ حمید نے ہمیں بتلایا۔ انہوں نے بکر سے۔ بکر نے ابو رافع سے۔ ابو رافع نے حضرت ابو ہریرہ سے روایت کی۔ انہوں نے کہا کہ مجھے رسول اللہ صلی اللہ علیہ وسلم ملے اور میں جنبی تھا۔ آپ نے میرا ہاتھ پکڑا اور میں آپ کے ساتھ چل پڑا، یہاں تک کہ آپ بیٹھ گئے تو میں کھسک کر چلا گیا اور ڈیرے میں آیا اور نہایا۔ اس کے بعد آیا اور آپ بیٹھے ہوئے تھے تو آپ نے فرمایا: ابو ہریرہ! تم کہاں تھے؟ میں نے آپ کو بتلایا تو آپ نے فرمایا: سبحان اللہ، ابو ہریرہ! مومن ناپاک نہیں ہوتا۔