Ahadith

محمد بن مقاتل نے ہم سے بیان کیا کہ عبداللہ (بن مبارک) نے ہمیں خبر دی۔ ہشام بن عروہ نے ہمیں بتایا۔ ہشام نے اپنے باپ سے، ان کے باپ نے حضرت عائشہؓ سے روایت کی۔ وہ فرماتی تھیں: چمڑے کی ڈھال یا لوہے کی ڈھال سے کم قیمت کی چیز میں چور کا ہاتھ نہیں کاٹا جاتا تھا۔ اِن میں سے ہر ایک ڈھال قیمتی ہوتی۔ اس حدیث کو وکیع اور ابن ادریس نے ہشام سے، ہشام نے اپنے باپ سے مُرسل روایت کیا۔

ابراہیم بن منذر نے ہم سے بیان کیا کہ ابوضمرہ نے ہمیں بتایا۔ موسیٰ بن عقبہ نے ہم سے بیان کیا۔ موسیٰ نے نافع سے، نافع نے حضرت عبداللہ بن عمر رضی اللہ عنہما سے روایت کی۔ اُنہوں نے کہا: نبی صلی اللہ علیہ وسلم نے ایک ڈھال کی وجہ سے کہ جس کی قیمت تین درہم تھی ایک چور کا ہاتھ کاٹا۔محمد بن اسحاق نے بھی اس کو روایت کیا اور لیث نے کہا: مجھ سے نافع نے (بجائے ثَمَنُهُ کے) قِيمَتُهُ بیان کیا۔

اسماعیل بن عبداللہ نے ہم سے بیان کیا۔ اُنہوں نے کہا: ابن وہب نے مجھے بتایا۔ اُنہوں نے یونس سے، یونس نے ابن شہاب سے، ابن شہاب نے عروہ سے، عروہ نے حضرت عائشہؓ سے روایت کی کہ نبی صلی اللہ علیہ وسلم نے ایک عورت کا ہاتھ کاٹا۔ حضرت عائشہؓ فرماتی تھیں:اور اِس کے بعد وہ آیا کرتی تو میں اس کی ضرورت کو نبی صلی اللہ علیہ وسلم کے سامنے پیش کرتی اس نے توبہ کی تھی اور اس کی توبہ اچھی طرح ہوئی۔

عبداللہ بن محمد (جعفی)نے ہم سے بیان کیا کہ ہشام بن یوسف نے ہمیں بتایا۔ معمر نے ہمیں خبر دی۔ معمر نے زہری سے، زہری نے ابوادریس (خولانی) سے، ابوادریس نے حضرت عبادہ بن صامت رضی اللہ عنہ سے روایت کی۔ اُنہوں نے کہا: ایک جماعت کے ساتھ میں نے رسول اللہ ﷺ سے بیعت کی۔ آپؐ نے فرمایا: میں تم سے اس بات کی بیعت لیتا ہوں کہ تم کسی چیز کو بھی اللہ کا شریک نہ ٹھہراؤ اور نہ تم چوری کرو اور نہ اپنی اولاد کو قتل کرو اور نہ تم بہتان باندھو جسے تم اپنے سامنے دیکھتے بھالتے گھڑو اور بھلی بات میں میری نافرمانی نہ کرو۔ سو جس نے تم میں سے اس عہد کو پورا کیا تو اس کا اجر اللہ کے ذمہ ہوگا اور جس نے ان میں سے کوئی گناہ کیا اور دنیا میں اس کی وجہ سے اس کو پکڑا گیا تو یہ اس کے لئے کفارہ ہو گا اور اس کو گناہ سے پاک کرنے کا موجب ہو گا اور جس کی اللہ نے پردہ پوشی کی تو اُس کا معاملہ اللہ کے سپرد ہے اگر چاہے تو اُس کو سزا دے اگر چاہے تو اس کی پردہ داری کرتے ہوئے اس سے درگزر کر دے۔ ابوعبداللہ (امام بخاریؒ)نے کہا: اگر چور اپنے ہاتھ کاٹے جانے کے بعد توبہ کرلے تو اس کی شہادت قبول کی جائے گی اور اسی طرح ہر سزا یافتہ جب توبہ کرلے تو اس کی شہادت قبول کی جائے گی۔