Ahadith

حفص بن عمر نے ہم سے بیان کیا کہ ہشام (دستوائی) نے ہمیں بتایا۔ اُنہوں نے قتادہ سے، قتادہ نے حضرت انسؓ سے روایت کی کہ نبی صلی اللہ علیہ وسلم نے۔ نیز آدم (بن ابی ایاس) نے ہم سے بیان کیا کہ شعبہ نے ہمیں بتایا۔ قتادہ نے ہم سےبیان کیا۔ قتادہ نے حضرت انس بن مالک رضی اللہ عنہ سے روایت کی کہ نبی صلی اللہ علیہ وسلم نے شراب پینے کی وجہ سے چھڑی اور جوتوں سے مروایا اور حضرت ابوبکرؓ نے چالیس کوڑے لگوائے۔

قتیبہ (بن سعید) نے ہم سے بیان کیا کہ ابوضمرہ انس (بن عیاض) نے ہمیں بتایا۔ اُنہوں نے یزید بن ہاد سے، یزید نے محمد بن ابراہیم سے، اُنہوں نے ابو سلمہ سے، ابو سلمہ نے حضرت ابوہریرہ رضی اللہ عنہ سے روایت کی۔ اُنہوں نے کہاکہ نبی صلی اللہ علیہ وسلم کے پاس ایک شخص لایا گیا جس نے شراب پی تھی۔ آپؐ نے فرمایا: اس کو مارو۔ حضرت ابوہریرہ رضی اللہ عنہ کہتے تھے: ہم میں سے وہ بھی تھا جو اپنے ہاتھ سے مار رہا تھا اور وہ بھی تھا جو اپنے جوتے سے مار رہا تھا اور وہ بھی تھا جو اپنے کپڑے سے مار رہا تھا۔ جب وہ واپس لوٹا تو لوگوں میں سے کسی نے کہا: اللہ تمہیں رسوا کرے۔ آپؐ نے فرمایا: ایسا مت کہو۔ شیطان کو اس پر قابو پانے میں مت مدد دو۔

عبداللہ بن عبدالوہاب نے ہم سے بیان کیا کہ خالد بن حارث نے ہمیں بتایا۔ سفیان (ثوری)نے ہم سےبیان کیا۔ ابوحصین (عثمان بن عاصم اسدی) نے ہمیں بتایا کہ میں نے عمیر بن سعید نخعی سے سنا۔ وہ کہتے تھے: میں نے حضرت علی بن ابی طالب رضی اللہ عنہ سے سنا۔ اُنہوں نے کہا: میں جو کسی کو شرعی سزا دوں اور وہ مرجائے تو میں اپنے نفس میں کوئی رنج محسوس نہ کروں سوائے شرابی کے کیونکہ اگر وہ مرجائے تو میں اس کی دیت دوں اور یہ اس لئے کہ رسول اللہ صلی اللہ علیہ وسلم نے اس کے لئے (ایسی)کوئی سزا مقرر نہیں کی۔

یحيٰ بن بکیر نے ہم سے بیان کیا کہ لیث نے مجھے بتایا۔ اُنہوں نے کہا: خالد بن یزید نے مجھے بتایا۔ خالد نے سعید بن ابی ہلال سے، سعید نے زید بن اسلم سے، زید نے اپنے باپ سے، اُن کے باپ نے حضرت عمر بن خطابؓ سے روایت کی کہ نبی صلی اللہ علیہ وسلم کے زمانہ میں ایک شخص ہوا کرتا تھا۔ اُس کا نام عبداللہ تھا اور حمار کے لقب سے بلایا جاتا تھا اور وہ رسول اللہ صلی اللہ علیہ وسلم کو ہنسایا کرتا تھا اور نبی صلی اللہ علیہ وسلم نے اُس کو شراب کی وجہ سے کوڑے بھی لگائے تھے۔ ایک دن اس کو لایا گیا۔ آپؐ نے اس کو سزا دینے کا حکم دیا تو اُس کو کوڑے لگائے گئے۔ لوگوں میں ایک شخص بولا۔ اے اللہ ! اس کو اپنی رحمت سے دور رکھنا۔ کتنی ہی بار اسے پکڑ کر لایا گیا۔ نبی صلی اللہ علیہ وسلم نے فرمایا: اس پر لعنت نہ کرو۔ اللہ کی قسم ! میں تو یہی جانتا ہوں کہ وہ اللہ اور اس کے رسول سے محبت رکھتا ہے۔

علی بن عبداللہ بن جعفر نے ہم سے بیان کیا کہ انس بن عیاض نے ہمیں بتایا۔ (عبداللہ) بن ہاد نے ہم سےبیان کیا۔ اُنہوں نے محمد بن ابراہیم سے، محمد بن ابراہیم نے ابوسلمہ (بن عبدالرحمٰن) سے، ابوسلمہ نے حضرت ابوہریرہؓ سے روایت کی۔ وہ کہتے تھے کہ نبی صلی اللہ علیہ وسلم کے پاس ایک شرابی لایا گیا۔ آپؐ نے اس کو مارنے کا حکم دیا۔ تو ہم میں سے وہ بھی تھا جو اُس کو اپنے ہاتھ سے مار رہا تھا اور ہم میں سے وہ بھی تھا جو اُس کو اپنے جوتے سے مار رہا تھا اورہم میں سے کوئی ایسا بھی تھا جو اُس کو اپنے کپڑے سے مار رہا تھا۔ جب وہ واپس لوٹا تو ایک شخص بولا: اس کو کیا ہوگیا۔ اللہ اس کو رسوا کرے۔ تو رسول اللہ صلی اللہ علیہ وسلم نے فرمایا: تم اپنے بھائی کے خلاف شیطان کے مددگار نہ بنو۔